وه‌لى قسه‌يگيش هه‌س ك ئويشن ئاده‌ميزاد نيه‌زانيگ له‌وه‌ر چه نان خوه‌يگ ؟ ئايا له‌وه‌ر ئه‌وه نان خوه‌يگ تا بتويه‌نيگ بژيه‌يگ ؟ يا ئه‌را ئه‌وه‌ك هويره‌و بكه‌يگ ؟ يا هويچكام له‌وانه نيه ، به‌ڵكوو داب و نه‌ريتيگه‌و ئه‌گه‌ر پياده‌ى نه‌كرداگ دونيا ويران بوياگ ؟ ئمجا بيجگه ئه‌يانه ك باسيان كرديم راسه ئه‌گه‌ر ئاده‌ميزاد خواردن نه‌خوه‌يگ نيه‌تويه‌نيگ بژيه‌يگ ، ئه‌گه‌ريش نه‌ژيا ئه‌وه بيگومان نيه‌تويه‌نيگ هويره‌و بكه‌يگ و هوير له داناين و ئبداع بكه‌يگ يا نيه‌تويه‌نيگ روى له‌پيشكه‌فتن و گه‌شه‌كردن بكه‌يگ .
له هه‌مان وه‌خت راسه ئاده‌ميزاد ئه‌گه‌ر بايگ و په‌نا ئه‌را خواردن نه‌وه‌يگ له مه‌عناى ژيان و سروشت و ده‌وروه‌ر نيه‌زانيگ ، وه‌لى نه‌ك وه‌و جووريشه ك تا راده‌يگ به‌ش فره‌يگ له‌ژيان خوه‌ى دابنه‌يگ ته‌نيا ئه‌را خواردن ، له‌وه‌ر ئه‌وه وه‌بى هويچ ده‌سپيچگيگ ئه‌وه‌ك نه‌ته‌وه‌و ملله‌ته‌يل خوهرههڵات ئه‌را خواردنيان ته‌رخانى كردنه ، بى هويره‌وكردن و بى به‌رنامه‌و نامه‌نتقيه ، چوينكه وه چ په‌يمانه‌يگ يا قياسيگ ره‌واسه تاك خوه‌رهه‌ڵاتى و له‌وانه‌يش تاك كورد وه‌تايبه‌ت رووژانه وه‌لاى كه‌مه‌وه (سێ) وه‌خت نان بخوه‌يگ و بويچگترين هويره‌وكردن و ئبداعيگ له خوه‌ى نه‌ياشتووگ ئه‌را ژيان و پيشكه‌فتنى يا پيشخستن كوومه‌ڵگا ! يا تويه‌نيم بويشيم وه‌و هه‌مگه سروشت پرِ له جوانى و ئه‌و هه‌مگه سامان له‌بن نه‌هاتگه ك خوداى گه‌ورا به‌خشاسه‌ى زوورم ناوچه‌يل خوهرههڵات هيمان كه‌مترين هويره‌كردن و ئبداعيگ وه‌پى هاوردنه‌سه‌دى ؟ يا تويه‌نستنه پيشكه‌فتن خاسيگ بارنه ده‌س ؟ ئه‌يه‌و له‌لايگ تره‌وه هه‌ر له‌ناو كوومه‌ڵگاى كورده‌وارى خوه‌مان رووژانه (سێ) وه‌خت نان خوريه‌يگ ، ئمجا وه‌ختيگ ئويشيم نان مه‌به‌سمان له خواردنه له هه‌رسێ تاق شه‌وه‌كيان و نيمه‌رِوان و ئيواران .
فره كه‌س هه‌س تاق شه‌وه‌كيان وه‌بى خواردن (سه‌روپاچه يا جگر) رازى نيه‌ون ، ئه‌گه‌ريش شه‌وه‌كيانيگ خواردنه‌يل جوير (ماس و په‌نير و شير و كه‌ره‌و شورباى نژى )بكه‌نه قه‌واڵتى ئه‌وه هساوى له‌بان خواردن نيه‌كه‌ن و جوير خواردنيگ ساده‌و فه‌قيرانه هساو ئه‌راى كه‌ن ، له شوون ئه‌وه‌يش تاق نيمه‌رِوان يا ئيوارانيش بايه‌سه خواردنيگ له‌ى خواردنه‌يله بووگ جوير (برنج و مامر يا گوشت و بريانى و قووزى و دووڵمه‌و كه‌باب و كفته‌و به‌عزه جاريگ ماسى و......هتد) ، ئه‌يه بيجگه خواردنه‌يل جوير (زه‌ڵاته‌و سه‌وزى و ميوه‌جات و ماساو سه‌رد وببسى و چشته‌يل تر) . وه‌ل ئه‌وه‌يشا ته‌ماشا كه‌يد وه‌سه‌به‌ب تيكڵايى كوومه‌ڵگاى كورده‌وارى خوه‌مان و بازارِه‌يل كوردستان وه دونياى ده‌يشته‌وه چه‌نه‌ها جووره خواردن هاته‌سه ناو ، وه يه‌يش كوومه‌ڵگاى ئيمه بويه‌سه يه‌كيگ له وه‌ناوبانگترين و ده‌وڵه‌مه‌نترن كوومه‌ڵگايه‌يل جه‌هان له خواردن ، ئمجا هه‌ر له‌وه‌ر ئه‌وه‌يش ئاشخانه يا مه‌تعه‌مه‌يل كوردستان خوه‌مان وه يه‌كيگ له ده‌وڵه‌مه‌نترين و جوانترين ئاشخانه‌يل جه‌هان له‌قه‌ڵه‌م درياگه ، ئه‌يه بيجگه ئه‌وه‌ك ئه‌گه‌ر يه‌كيگ ئه‌را ته‌نيا جاريگ سه‌ردان كوردستان خاك و نيشتمان ئيمه كردويگ و له يه‌كيگ له‌و ئاشخانه‌يل كوردستانه نان خواردويگ يا له‌يه‌كيگ له‌ماڵه‌يل ئيمه ميواندارى كرياويگ ، ئه‌وه بيگومان ئيمه وه(خزمه‌تكه‌ر زگ) ناسيه ! ئمجا له‌يرا ئه‌وه ئه‌رِامان ده‌ركه‌فيگ ك گرنگى يا ئه‌هميه‌تداين تاك و خيزانه‌يل كورد وه (زگ) بويه‌سه داب و نه‌ريتيگ رووژانه‌و تا راده‌يگ خه‌م فره گه‌وراى ژنه‌يل ماڵ هه‌ر له سه‌ره‌تاى ژيانه‌وه تا رووژ ئمرِوو ته‌نيا ئه‌وه بويه ك تاق نيمه‌رِوو يا تاق ئيواره چ خواردنيگ ئه‌را ئه‌ندامه‌يل خيزانيان ئاماده بكه‌ن ؟ يا ئه‌را سوو چ خواردنيگ ئه‌رِايان بنه‌يگه بان و چه بخوه‌ن ؟ تا راده‌يگ له‌وه‌خت نانخواردن هه‌ر تاقيگ ك هيمان نانه‌گه له قورِگيان نه‌چيه‌سه خوار ئه‌ندامه‌يل خيزان هه‌ميشه ئى پرسياره له‌دايگ و خوه‌شكه‌يليان كه‌ن ك ئه‌را تاقيگ تر چ خواردنيگ ئه‌رِايان دروسكه‌ن ؟ ئه‌يه بيجگه ئه‌وه‌ك هه‌ر تاك و خيزانيگ كورد هوير له‌وه كردويگه‌وه ك به‌رنامه‌يگ يا جه‌دوه‌ليگ هه‌فتانه ئه‌را دروسكردن خواردن دابنه‌ن ، تا وه‌لاى كه‌مه‌وه له‌خه‌م ئه‌وه رزگاريان بووگ ك ئه‌را وه‌جبه‌ى دوياتر چ خواردنيگ ئاماده بكه‌ن يا له‌و پرسياره‌يل بى مه‌عنا رزگاريان بووگ ، مه‌عناى ئه‌وه‌سه ژنه‌يل ئيمه‌ى كورد وه دريژايى تاريخ له‌خه‌م ئه‌وه بوينه چ خواردنيگ ئه‌را ئه‌ندامه‌يل خيزانيان ئاماده بكه‌ن ؟
ئه‌ندامه‌يل تر خيزانيش وه‌رده‌وام له‌خه‌م ئه‌وه بوينه ، ك تاق دوياتر يا وه‌جبه‌ى دوياتر چ خواردنيگ ديرن ، ئمجا له‌يرا به‌ش فره‌ى هه‌وڵ و ته‌قلاى وه‌رپرسه‌يل هه‌ر خيزانيگ كورد ئه‌وه بويه ك وه‌رجه گشت چشتيگ كار ئه‌را په‌ياكردن پويل و سامان بكه‌ن تا زگ خوه‌يان و خيزانيان تير بكه‌ن و هويچ تر ! وه‌ل ئه‌وه‌يشا له‌وه‌ر خاتر ئه‌و كاريشه فره ئاسايى بويه له‌لايان ك فره جار په‌نا بووه‌نه وه‌ر چه‌نه‌ها ديارده‌ى ناپه‌سه‌ن و ناشرين و نارِه‌واى وه‌ك (قه‌سه‌مخواردن وه دروو ، يا درووكردن و گرانفرووشى يا له‌لاى به‌عزه كه‌سه‌يليگ ديارده‌ى دزيكردن فره ئاسايى بويه له هاووڵاتى و هاونيشتمانه‌يليان) ئه‌ويش ته‌نيا له‌وه‌ر ئه‌وه‌ك وه زياتر برِه‌سيگ و پويل زياتر په‌يا بكه‌يگ و زياتر بتويه‌نيگ زگى تير بكه‌يگ .
مه‌عناى ئه‌وه‌سه خواردن و تيركردن زگ له‌لاى كورد هه‌ر له زويه‌وه بويه‌سه نه‌ريتيگ باو سه‌رده‌مه‌يل و هه‌مان وه‌خت تاريخيگيش ئه‌راى دروس بويه ، له‌وه‌ر ئه‌وه تويه‌نيم بويشيم : وه‌راسى نه‌ريت فره سه‌قه‌تيگ ديريم ، چوينكه گشتمان له‌وه‌ر خواردن دى نيه‌رِه‌سيمنه ئه‌وه‌ك هويره‌و بكه‌يم و بخوه‌نيم و بنويسيم . تويه‌نيم بويشيم : ئيمه وه‌رج له‌وه‌ك بمريم هه‌ر له‌سه‌ره‌تاوه خوه‌مان مرانيمنه ، چوينكه ژيان هه‌ر خواردن و خواردنيش هه‌ر ئه‌را تيركردن زگ نه‌ويه جوير ئه‌وه‌ك له‌لى فامستيمنه .