شەفەق نیوز - بەغداد

سەندیکای دەرمانسازەیل عراق، ئمڕوو پەنجشەممە، هوشیاری داد لە شوونهاتەیل ئاڵشتکردن نرخ ئاڵشتکاری دۆلار لەبان نرخەیل دەرمان و هەوەجەیل پزیشکی، و داوا لە حکومەت کرد وە هێشتنەوەی نرخی ئاڵشتکاری ئیرنگەی حەواڵەی هاوردەکردن دەرمان و هەوجەی و کەرەستەیل سەرەتایی  دروستکردنیان.

سەندیکاگە لە بەیاننامەیگ، ک رەسیە  ئاژانس شەفەق نیوز، وت: ئاڵشتکردن نرخ ئاڵشتکاری شوونهاتەیل ئابووری و دارایی و کۆمەڵایەتی گەورەیگ دێرێد لەبان بەش چەودێری تەندروستی، و هاتێ بوودە  مدوو لەکارکەفتن سیستەم نرخانن دەرمان کە پشت بەسێد وە نرخ ئاڵشتکاری 1320 دینار ئەرا دۆلار لە هەشمارکردن نرخ فرووشتن وە هاوڵاتی.

داوا لە حکومەت و ئەنجومەن نوێنەرەیل و بانك ناوەندی و گشت لایەنەیل پێوەندیدار کرد ئەرا گردنەوەر زێکارەیل وەپاراستن بیمارەیل و هاوڵاتییەیل لە قورسی بەرزەوبوین نرخەیل دەرمان، وەتایبەت وە ساڵاچگەیل و دووگیانەیل و مناڵەیل و تویشبویەیل وە بیماری درویژخایەن و بیمارەیل شێرپەنجە و بیماریە سەختەیل.

سەندیکاگە دووپات کرد ک ڕەدبوین لە قەیران دارایی و شوونهاتەیل توەن تێد لەرێ سیاسەتیگ دارایی و ئابووری کارامە، ک بەسیاگە وە پلان کار و رێکارەیل رووشن و خشتەی وەخت دیاریکریاگ، وە شێوەیگ ک مسۆگەر وەدەسهاوردن ئامانجەیل داواکریاگ بکەێد بی ئەوەگ بوودە مدوو دروسبوین قەیرانەیل کە هاووڵاتی گەورەترین زەرەد لەلی دوینێد.

بانك ناوەندی عراقی (دویەکە چوارشەممە) راگەیان ئاڵشتکردن نرخ ئاڵشتکاری فەرمی ئەرا دینار عراقی لەوەرانوەر دۆلار ئەمریکی  بوودە 1520 دینار ئەرا یەک دۆلار لەجیاتی 1320 دینار ئەرا دۆلاریگ کە بویە مدوو کاردانەوەی جەماوەری تویڕەیگ.