عه‌لا خه‌تیب / هەنای دەوڵەتەگە توانای گیرهاوردن توندوتیژی و جیوەجیکردن یاسا نەیاشتاد، ئەوە بوودە ژیان دەیشتەکییگ ک مەردم یەکتری خوەن، و هەنای چەک بوودە دادوەر لەناوبەینمان، ئەوە نیشان دەێد ک ئیمە برایەتیمان نەمەن، و هیچ هاوبەشییگ مرۆیی و نیشتمانی گردمانەو نیەکەێد، و نەکەفتیمنە سای چادر وڵات، ک شمشیر کەفتە ناوبەینمان و جیاجیاوە بویمن.
تا سەروەریەگە هالە ژیر کۆنتڕۆڵ تفەنگ بەڕەڵا، قەت نێەتوێەنیمن وە وڵاتەگەمان بووشیمن دەوڵەت، ک هەرچەن وە نیشتمان پەروەری گەزاف بیەیمن و پەرچەمەیل خاکمان بەرزەو بکەیمن و ئیمە هایمنە نا دەوڵەتی، وهەرچەنی سروود نیشتمانی بخوەنیمن.
ئەو قسەیل ناو سروود نشتمانه‌گه‌م وەگەرد بوون خوین ناو مەیدانەیلمان نەگونجیانە، و هیچ ژیانیگ و رزگارییگ نییە تا چەتەگان و مافیاگان وەبان ژیان گەنجەیلمانەو زاڵەو بوینە تا یەک لە شوون یەک وەدەس تاوانباریان بکوشیەن.
وهیچ باسیگ لە هاووڵاتییەتی نییە تا هێزە ئەمنیەگان توانای وسانن لەیاسا دەرچگەیل نەیرن ئەوانەگ لەپشت پەتیەی درووکانی خوەیان شاردنەسەو.
هاووڵاتی واتە ئەندامبوین تەواویگ لە دامەزراو وڵاتەگە، ک هاووڵاتی پلە یەک و پلە دوو نییە.
بەڵکم وەداخەو ک ئەوەگ لە وڵاتەگەمان دوینیمنەی لە وڵات جیوازە، ک ئەو هاووڵاتییە ک خوەشی وە گشت مافەیلی کەێد، خوەی کوڕ میلیشیا وەهێزەگەس یا حزبە دەسڵاتدارەگە یا هووزە تاڵان کەرەگە.
ئەگەر ئەندامیگ لە ملیشیایل مەرگ بوی وە گشت ئاسانیبگ وەبی ژمارە مەردم کوشی، و نیشانەی سەرکردەیی وەرگری، چوونکە وەو گولەیلە ک وەپیان عراقییگ کوشتی، سەروەری وڵاتەگە هاوردیدەو، و داڵگی هەمیشە ئەسرەیلی لەبان قەورەگەی رشنێد، لە قەورسان مه‌ڵه‌وه‌ن مەرگ، لە نەجف ک ئەوەسا وەپی وتیان مه‌ڵه‌وه‌ن ئاشتی.
ئەوانەگ باس لە سەروەری دەوڵەتەگە کەن، بایەدە بزانن ک سەروەری دەوڵەت وە کوشتن لە مەیدانە گشتیەگان نێەوود، و سەروەری دەوڵەت کۆمەڵە بەڕەڵاگان و لەیاسا دەرچگەیل دروسی نێەکەن، سەروەری دەوڵەت تایبەتە وە هێزە ئەمنیەگان و سوپا پاڵەوانەگەی، و حەشدە راستەقینەگەیە، ئەو سوپا ک تیرۆرستەگان دەرکرد، و راپەڕین ئەرا ناو و مێژووی کرد.
هیچ کۆمەڵەیگ یا تاکیگ ئەرای نیە شیوەی دەوڵەتەگە دیاری بکەێد، یا ری هاتنەوەی سامی یا شیوەی پاکەوکردنی.
وەرجەیە دەوڵەتەگە پاکەو بکەیمن، بایەدە خوەمان لە بیماری مەزنی و بوغرایی پاکەو بکەیمن، و بایەدە وە خاسی گفتوگۆ وەگەرد ئەواکان بکەیمن، ک گفتوگۆ خوەی پوڵ پەیوەندی عاقڵانەس. نەگ وەرەو مەیدان نا دەوڵەتی هەلقویڵیمن.
ک جەنگ ناوبەین خەڵک وڵاتەگە سەروەری وڵاتەگە نێتیەرێدەو، و خوەی جەنگ شکستییگە وە گشت پەیمانەگان، تەنانەت سەرکەفتگیش لەی جەنگە خوەی شکست هاوردگە، چوونکە ئەوانەگ لە هەردوگ لاگە کەفن خوەیان خەڵک ئی خاک و جەرگیین.
ئەوەگ دوێەکە ناسریە وەخوەی دی لەگشت لایەنەگان خوەی سیمایگە لە سیمایل نا دەوڵەتی و سیمایگە لە پێشێلکاری دژوە خاکەگە وەگشت کەسەگانی.
هەنای ئاژاوە زاڵەوبوود و خوین بوودە رەنگ شارەگان، واتە دویارووژ نەوەیلمان کەفێدە دەس دوژمنی وخوسەهاتن و کەلتوور تۆڵەسەندنەوە، و دویارووژ نەوەیلمان نیگەرانەو بوود، ک خراوترین میراتییە ئەرا نەوەیل هاتگ هیلێمنە جی، و خراوترین مێژووە ک وەدەس خوەمان نووسیمنەی ، و ئەوەسا کوڕەیلمان لە ئایندە شەرمیان لە کردەوەیلمان تیەێد، ک چەنی جیوازیمن لە حەموڕابی و نوبوخەد نوسسەر و گلگامش و ئەو بابل و سۆمەرە ک بنچینەمان ئەرایان چوودەو، فرە جیوازە لە ئەوەگ تەقەلا ئەرای دەێمن.
ئیمام عەلی (ع) وت: هەرکەس خوازێد یەکسانی لە خوەی ئەرا مەردم بکەێد، بایەدە ئەوەگ خوەشی ئەرا خوەی تیەێد، هەمیش ئەرا مەردم خوەشی باێد.