میدیاگان عه‌ره‌بی وجه‌هانی گرنگی فراوانیگ دانه ئی ریوداگه و هه‌ركام له‌و میدیایه‌یله خه‌وه‌روراپورت وباوه‌ته‌یل جیاجیایگ له‌و په‌خشه‌و كردن ؛ تلفزیون سی ئین ئین تورك له زوان كاروه‌ده‌سه‌یل ئه‌و شه‌ریكه ك بیره نه‌فتیه‌گان ته‌ق ته‌ق كاركه‌یگ ئیوشیگ : چاله نه‌فتیه‌گان ئی ناوچه له حال حازرتیوه‌نن روژانه چل هه‌زاربه‌رمیل نه‌فت بیه‌ن وئه‌گه‌ركارزیاتریگ له بان ئه‌وچالایله بكریه‌ی شایه‌د به‌رهه‌مه‌گه‌ی روژانه بره‌سیگه ٤٥٠ هه‌زاربه‌رمیل . ئیڤان وتسون ویسم كومیترپه‌یامنیركه‌ناله‌گه‌یش له راپورت تایبه‌تیگ له‌ی باوه‌ته ئیوشیگ : وه‌باوه‌ر من هاوكاری له‌ناونی به‌غداو هه‌ولیرسودمه‌نده وله به‌رژه‌وه‌ندی گشت لایگه و ئی هاوكاری ئستراتیجیه وه‌رده‌وام بووگ . له باوه‌ت كل نه‌فت له چاله‌یل ته‌ق ته‌ق ئه‌را بازاره‌یل جه‌هانییش ئیوشیگ : كاروه‌ده‌سه‌یل ونوینه‌ره‌یل شه‌ریكه‌ی گینیل ئنرژی ك شه‌ریكه‌یگ توركیه وله ته‌ق ته‌ق كاركه‌یگ ئیوشن له‌سه‌ره‌تا به‌رهه‌م چاله نه‌فتیه‌گان ته‌ق ته‌ق چل هه‌زاربه‌رمیله ویه‌یش ده‌سمه‌یه‌ت حكومه‌ت عراق ده‌یگ ئه‌را قه‌ره‌بووكردن ئه‌و كه‌سریه ك له بووجه‌ی ئمسال وه‌دی تیه‌یگ . په‌یامنیره‌گه زیاترئیوشیگ ك ئاشتی هه‌ورامی وه‌زیر سامانه سروشتیه‌گان هه‌ریم كورستان له ووته یاكه‌لیمه‌یگ له ئاهه‌نگ یامه‌راسم تایبه‌تیگ ك له‌وباره‌وه به‌رپا كریاس وه‌تگه له ئاینده به‌رهه‌م ئی چاله‌یل نه‌فتیه ره‌سیگه ٤٥٠ هه‌زاربه‌رمیل . سی ئین ئین تورك له زوان هیلترمان پسپوریاخه‌بیرله‌كاروبارعراق ئیوشیگ داوه‌زیان قیمه‌ت نه‌فت له‌بازاره‌یل جه‌هانی له‌ی چه‌ن مانگ دیواخره حكومه‌ت عراقی ناچاركردگه بگه‌ردیگه شیون سه‌رچاوه‌یل دارایی تازه‌یگ ویه‌یش هیشتگه به‌غدا رازی بووگ هه‌ریم كوردستان نه‌فت ئه‌را ده‌یشت ولات كل بكه‌یگ ووه‌ی جوره به‌غدا سه‌رجه‌م ئه‌وداهاته ك له‌فروش ئه‌ونه‌فته وه‌ده‌س تیه‌یگ به‌یگ وته‌نیا ١٧% ی ده‌یگه حكومه‌ت هه‌ریم كوردستان . سی ئین ئین ته‌ئكید كردگه ك هاوكاری ئه‌نقه‌ره هاوسای هه‌ریم كوردستان وعراق له‌باوه‌ت كل كردن ئه‌وبره نه‌فته ئه‌را بازاره‌یل جه‌هانی خاس بیوه ؛ له‌وه‌ر ئه‌وه‌گ توركیه جاران وه‌توندی ناره‌زایه‌تی خوه‌ی له‌باوه‌ت به‌رهه‌م هاوردن نه‌فت له‌هه‌ریم كوردستان نیشان دیاد ئه‌ویش وه‌خاتر ئه‌وه‌گ رخی چیاد نه‌گ پیول ئه‌ونه‌فته ئه‌را دامه‌زرانن ده‌وله‌تیگ سه‌روه‌خوه‌ی كوردی وه‌كاربگیریه‌ی ؛ وه‌لی له‌ی مانگه‌یل دیواخره په‌یوه‌ندی ناونی ئه‌نقه‌ره وكورده‌یل عراقی وه‌ره‌وخاسی چیه . سی ئین ئین تورك هه‌میش ئیوشیگ كاروه‌ده سه‌یل كورد ته‌ئكید كردنه ك كل كردن نه‌فت هه‌ریم كوردستان ئه‌را بازاره‌یل جه‌هانی له‌ری به‌نده‌رجیهان توركی هه‌لكه‌فتگ له‌بان ده‌ریای چه‌رمگ ناوراس ئه‌نجام گریگ وشایه‌د له ئاینده كل كردن غازسروشتی له هه‌ریم كوردستان ئه‌را ولاته‌یل ئه‌وروپا له ری توركیه وه ئه‌نجام بگری.