بوی ك ئه‌و وه‌خته كيشه‌ی قه‌رز بوی له‌ناونی فره‌نساو جه‌زاير ، ئه‌را ئی مه‌به‌سيشه قونسڵ فره‌نسا چووگه لای وه‌رپرسه جه‌زايريه‌گه‌و هه‌ر وه‌بی مه‌به‌س واوه‌شينه‌گه‌ی ده‌سی له‌ده‌سی فڕه به‌سيگ و ده‌يگ له‌كابرای فره‌نسی ، ئمجا فره‌نسای سه‌رده‌م (ريچار) وه‌ك سووكايه‌تيكردنيگ يا ئيهانه‌يگ ته‌ماشای ئی ره‌فتار كه‌يگ و هيز سه‌ربازی تيه‌ريگه كار ، ئمجا هاوشيوه‌ی ئی رويداگه خه‌ريك بوی دوباره‌وه بووگ .
وه‌رجه ماوه‌ی كه‌ميگ گرژييگ له‌ی جووره له‌ناونی توركياو ئسرائيل رويدا ، له‌وه‌رانوه‌ر نيشانداين فلم ( چه‌م گورگه‌يل ) قسه‌يل ره‌خنه‌ئاسای ئه‌ردوغان سه‌رووك وه‌زيره‌يل توركيا له‌دژ ئسرائيل ، جيگر وه‌زير خارجيه‌ی ئسرائيل (دانی ئايالۆن) ك ئی وزاره‌ته ئيسه له‌لايه‌ن حزبه‌يل تونڕه‌و بريه‌يگه رييه‌وه وه سه‌رووكايه‌تی (ليبه‌رمان) داوه‌ت سه‌فير ئه‌نقه‌ره كه‌يگ له‌ئسرائيل و ئيهانه‌ی دبلۆماسيه‌ت ئه‌و وه‌رپرس توركه ئه‌كا . سه‌ره‌تا سه‌فيره‌گه‌ی توركيا نزيكه‌ی نيم سه‌عات چه‌وه‌ڕی ئه‌وه كه‌يگ بچووگه ناو ، دويای ئه‌وه‌يش وه‌ختی چووگه ناو ده‌س ئه‌ڕای به‌يگ و توايگ ته‌وقه وه‌ليا بكه‌يگ ، وه‌لی (ئايالۆن) وه‌ليا ته‌وقه نيه‌كه‌يگ و له‌هه‌مان وه‌خت وه‌ده‌م وچه‌و گرژيگه‌وه له‌بان كورسيه خوارينه داينه‌يگ جوير پرس و پرسكاری يا ته‌حقيقكردن ، بيجگه ئه‌وه‌يش ئايالۆن نه هيليگ په‌رچه‌م توركيا دابنه‌ن ئه‌ڕای نه‌يش ئاو و خواردن بارن ئه‌را ميوانه‌گه‌يان . بيگومان ئی كار ئسرائيليشه سووكايه‌تيكردنيگه ئه‌را ده‌وڵه‌ت توركيا . ئمجا له‌ئه‌نجام ئه‌و كاره توركيا داوای سه‌به‌ب ئه‌و رويداگه كرد له ته‌لئه‌بيب ، ئمجا جيگر وه‌زير ناوبرياگ په‌شيمانی خوه‌ی نيشاندا ، وه‌لی ئه‌نقه‌ره وت ئی په‌شيمانيه به‌س نيه .
عه‌بدوڵڵا گويل سه‌رووك كوومار ، چه‌ن سه‌عاتيگ دانا ئه‌را ئسرائيل ئه‌را ئه‌وه‌ك داوای وه‌خشين بكه‌ن وه‌شيوه‌يگ ره‌سمی له‌لايه‌ن حكوومه‌ته‌وه‌و له‌هه‌مان وه‌خت وت : ئه‌گه‌ر داوای وه‌خشين نه‌كه‌ن سه‌فيره‌گه‌مان له‌ئسرائيل كيشيمنه‌وه ، دی ئه‌وه بوی وه ده‌خاڵه‌تكردن (شه‌يمۆن پێرێز) سه‌رووك ئسرائيل داوای وه‌خشين له ئه‌نقه‌ره كردن ، ك هه‌رچه‌نی حكوومه‌ت ته‌لئه‌بيب وه‌پی ناخوه‌ش بوی . دی ئه‌وه بوی نزمی كورسيه‌گه‌ی وه‌رپرسه توركه‌گه بويه ده‌نگ وباس ميديای توركی و كاردانه‌وه‌ی رای گشتی له‌بانی ك وه( مه‌سه‌له‌ی كورسيه‌گه) ناو نريا . ئی رويداگيشه له‌پاڵ رويداگه‌گه‌ی داڤۆسی ناونی پێرێز و ئه‌ردۆ‌غان ك ئه‌و خسته هوير ئسرائيل دی هيز يه‌كم نيه له‌ناوچه‌گه‌و په‌يوه‌ندييشی وه‌ل توركيا ئه‌و وه‌خته ستراتيجی و بته‌وتره‌و بوود ك په‌يوه‌نديه‌گه‌ی له‌جه‌نراڵه‌يل سه‌ربازيه‌وه دريژه‌و بكه‌يگ ئه‌را ناو مه‌ردم و حكوومه‌ت توركيا .