گۆڕانكاریه‌یله ك له پرۆسه‌یل سیاسی وئه‌منی وڵات وهاوپه‌یمانیه‌یل تازه‌ی ناونی حزب وهێزه سیاسیه‌گان ناو وده‌یشت په‌رله‌مان وه‌دی هاتنه . ئه‌را نموونه ئئتلاف عراقی جاران ك زورم هێزه‌یل مه‌زه‌بی شیعه‌و چه‌ن شه‌خسیه‌تیگ ته‌كنوكرات گردیاده خوه‌ی ته‌نیا چه‌ن مانگ له‌شوین هه‌ڵوژاردنه‌يل په‌رله‌مانی گوزه‌یشته له سه‌ربه‌شه‌وكردن ده‌سه‌ڵات ناكوكی كه‌فته ناونییان و ته‌یارسه‌دری وحزب فه‌زیله له‌لی جیاوه بوی وچه‌ن رووژ له‌یه‌وه‌ریش سه‌رله‌نوو هاوپه‌یمانیه‌گه وه‌جیا بوینه‌وه‌ی بڕیگ له هێزه‌یل كویه‌نه‌و هاتنه مه‌یدان چه‌ن لایه‌نیگ تازه زینگه‌و كریا ؛ وه‌لی وه‌شیوه‌یگ جیاوازوله قاڵبیگ نیشتمانی له‌جی مه‌زه‌بی وچه‌ندین هێزتازه له‌ی هاوپه‌یمانی نووه جی خوه‌یان كردنه‌و وحزب ده‌عوه‌یش وه‌ل چه‌ن لاینیگتر سیاسی وعه‌شایر باشوور و ناوچه‌یل خوه‌رئاوای وڵات له رومادی هاوپه‌یمانی تازه‌یگ وه‌ناو ئئتلاف ده‌وڵه‌ت قانون دامه‌زران وجه‌بهه‌ی ته‌وافوقیش ك زورم هێزه‌یل سوننه مه‌زه‌و ناسیونالسته‌یل عه‌ره‌ب گردویگه خوه‌ی له یه‌ك هه‌ڵوه‌شیاو چه‌ندین كیان تازه له‌لی هاته دی وهه‌میش لیست ئه‌لعراقیه له‌یه‌ك چه‌كیاو چه‌ن شه‌خسیه‌تیگیان ئه‌یاد عه‌لاوی هیشتنه جی وكه‌فتن وه‌ل هاوپه‌یمانه‌یل گه‌ورا ئه‌را وه‌ده‌س هاوردن پۆستیگ له په‌رله‌مان وحكومه‌ت ئاینده ؛ بیجگه ئه‌وانه‌یش هه‌ركام له‌وكوتله‌یل وهاوپه‌یمانیه‌یل سیاسیه له‌لایه‌ن هێزیگ هه‌رێمی یا ناوده‌وڵه‌تی پشتگیری كریه‌ن ؛ ئه‌را نموونه ئیران پشتیگری به‌عزی لایه‌نه‌یل شیعه كه‌یگ ئه‌را ئه‌وه‌گ ئاكام هه‌ڵوژاردنه‌يل له به‌رژه‌وه‌ندی خوه‌ی بوود وله‌ولایشه‌و سعودیه پشتگیری بڕیگ له‌لایه‌نه‌یل عه‌ره‌ب سوننه كه‌یگ تا تای ته‌رازیوه‌گه وه‌لای خوه‌یا بشكنیگه‌و وهه‌میش بڕیگتریش له وڵاته‌یل نه‌ته‌وه‌په‌ره‌س عه‌ره‌ب پشتگیری هێزه‌یل شۆفینی وپاشمه‌نه‌ی رژیم به‌عس گوڕوه‌گوڕكه‌ن ئه‌را ئه‌وه‌گ پرۆسه‌ی دیموكراتی عراق بشیونن وئی پرۆسه ده‌سه‌ڵاتیان نه‌خه‌یگه خه‌ته‌ر وتوركیه‌یش ئه‌را ئه‌وه‌گ له‌ی كێب‌ركیه نه‌مینیگه‌جی گره‌و له‌بان چه‌ن لایه‌نیگ توركمانی له كه‌ركوك وشاره‌یلتر كه‌یگ تا له حكومه‌ت وپه‌رله‌مان ئاینده‌ی عراق شوین پایگ داشتوود وتائه‌وره‌گ وه‌پی كریه‌ی چوو بخه‌یگه به‌ین چه‌رخ ئاوه‌دانی وگه‌شه كردن هه‌رێم كوردستان وته‌گه‌ره بخه‌یگه ری چاره‌سه‌ركردن كێشه‌یل ناونی هه‌ولێرو به‌غدا وه‌تایبه‌ت كێشه‌ی ناوچه‌یل داوڕیاگ له‌هه‌رێم كوردستان له‌وانه‌یش كه‌ركوك ؛ وه‌ی جوره ته‌نیا كورده ك له‌ی ململانی ناهاوسه‌نگه نه‌گ ته‌نیا بی پشتیوانه به‌ڵكه‌م گشت هێزه‌یل هه‌رێمی وته‌نانه‌ت به‌عزی له هێزه‌یل ناوده‌وڵه‌تییش وه‌شوین ده‌رفه‌تیگ گه‌ردن تا ئه‌و نیمچه سه‌روه‌خوه‌ییه ك له قاڵب حكومه‌ت وهه‌ریم كوردستان هاتگه‌سه دی له‌ناوبوه‌ن وده‌س كه‌فته‌یل ملله‌ت كوردستان ك به‌ر ره‌نج وقوربانی وفداكاری چه‌ندین ده‌یه له خه‌بات وخوین داینه ئه‌را هه‌میشه بنه‌نه ژیرخاك ؛ یه‌یش له وه‌ختیگه ك بڕیگ له هێزه‌یل كوردستانی وه‌پیچه‌وانه‌ی ته‌یاره‌گه مه‌له كه‌ن وله‌جی ئه‌وه‌گ ته‌قالا بكه‌ن ریزه‌یل ملله‌ت وهێزه‌یل سیاسی له‌بان بنه‌وای به‌رژه‌وه‌ندی باڵای ملله‌ت یه‌كبخه‌ن ؛ هاوته‌ریب وه‌ل به‌رژه‌وه‌ندی وڵاته‌یل هه‌رێمی ته‌قالای چالاك و گه‌رموگوڕیگ كه‌ن تا ناكوكیه‌یل قویلتره‌و بوون وكورد وه‌چه‌ن لیست بویچگ بویچگ له هه‌ڵوژاردنه‌يل ١٦\١\٢٠١٠ به‌شداری بكه‌یگ وئه‌وسا ئه‌و قورسی جارانیه له حكومه‌ت و په‌رله‌مان عراقی نیه‌منی ونه‌گ ته‌نیا ده‌سكه‌فته‌یل تازه وه‌ده‌س نیه‌تیه‌ری به‌ڵكه‌م پاراستن ده‌سكه‌فته‌یل دو ده‌یه‌ی گوه‌زه‌یشته‌یش كه‌فیگه مه‌ترسیه‌وه‌و وه‌یه‌یش زه‌ره‌د گه‌ورایگه له كێشه‌گه‌مان وهیلیگ كورد بچووده‌و ئه‌را چوارگوشه‌ی یه‌كم . به‌س ته‌نیا ئه‌وه مه‌نگه بویشیم ك هێزه‌یل كوردستانی وه‌خت كوڵیگ وده‌رفه‌ت بویچگیگ له وه‌رده‌میان مه‌نگه تا سه‌رله‌نوو بانه خوه‌یاناو چه‌ویگ گڕبیه‌نه ناوسیاسه‌ته‌یلیان ودواره وه‌یه‌ك لیست ویه‌ك هاوپه‌یمانی له هه‌ڵوژاردنه‌يل په‌رله‌مانی عراق هاوبه‌شی بكه‌ن وبه‌رژوه‌ندی باڵای ملله‌ت وخاك به‌ش به‌شه‌وكریاگ كوردستان له وه‌رچه‌و بگرن.