مه‌ندياگه‌وه‌و ملله‌ته‌گه‌مانيش هه‌ميشه وه‌رگری يا دفاع له وجوود خوه‌ی كردگه‌و هه‌ر له خه‌بات و خه‌باتكاری بويه‌و قوربانی فره‌يگ داگه‌و دريژه داسه خه‌بات .
به‌رپابوين شووڕش ئه‌يلوول ١٩٦١ وه سه‌رووكايه‌تی باوگ روح نه‌ته‌وه‌ی كورد مسته‌فا بارزانی ئه‌را خاتر هاوردنه‌وه‌ی هه‌قه‌يل ملله‌ت كورد بوی . شووڕش ئه‌يلوول له‌گشت دانيشتن و گفتوگووه‌يلی وه‌ل كاروه‌ده‌سه‌يل به‌غدايا ده‌سوه‌ردار كه‌ركووك نه‌ويه ك به‌شيگه له كوردستان و جياوه نيه‌وگ و بارزانی نه‌مر رووژيگ له رووژان واز له‌بان كوردستانيبوين كه‌ركووك ناوردگه‌و هه‌ميشه ئسپات ئه‌وه كردگه ك كه‌ركووك كوردستانه .
له‌شوون ئه‌وه‌ك به‌عس گشت ريگه‌يگ هاورده كار ئه‌را له‌ناوبردن شووڕش كوردستان وه‌تايبه‌ت له ساڵ ١٩٦٩ ، وه‌لی هويچ وه‌پی نه‌كرياو ناچار بوی مل بچه‌منيگ و سه‌دام حسێن ره‌سانه سێداره‌و په‌نا ئه‌را بارزانی نه‌مر برد ئه‌را دانيشتن و گفتوگوو ، مه‌عنای ئه‌وه‌سه خه‌بات پارت ديموكرات كوردستان و ئازايه‌تی پيشمه‌رگه‌يل كوردستان وه سه‌رووكايه‌تی بارزانی نه‌مر فه‌رزی كرده بان به‌عس رمياگ داوای دانيشتن له‌بارزانی نه‌مر بكه‌يگ و تاريخيش شايه‌تيده‌ر ئه‌و رووژگاره‌سه .
يه‌كيگ له مه‌سه‌له‌يل دانيشتن ، ريككه‌فتننامه‌ی ئادار ١٩٧٠ ده‌سنيشانكردن ناوچه‌ی ئۆتۆنۆمی يا حوكم زاتی كوردستان بوی . شاند يا وه‌فد پارت ديموكرات كوردستان له‌وه‌خت دانيشتنه‌گه له‌باوه‌ت ئه‌نجامداين سه‌رشمارييگ گشتی له‌عراق ، سه‌رشماريه‌گه‌ی ١٩٦٥ قه‌بوول نه‌كرد ، چوينكه له‌سه‌رده‌م عه‌بدولسه‌لام عارف ئه‌نجام درياويگ و شيوه‌يگ له ره‌گه‌زپه‌رسی دژ وه نه‌ته‌وه‌ی كورد له‌تی بوی ، هه‌ر له‌وه‌ر ئه‌وه‌يش شاند پارتی ، سه‌رشماری ١٩٥٧ پيشنيار كرد و به‌عس رمياگيش رازی بوی .
ئه‌وه‌ك ئاشكراس له سه‌رشماری ١٩٥٧ له كه‌ركووك كورد زوورمينه بوينه وه‌ل ئه‌و هه‌مگه پاشيلكاری يا ناهه‌قيه ك دژ وه‌كورد كريا ، ئمجا پارتی و به‌عس رمياگ له‌بان ئه‌وه ريككه‌فتن ك له‌شوون ئاشكراكردن ريككه‌فتننامه گامه‌يل جددی بنريه‌يگ ئه‌را ئی مه‌به‌سه‌و له‌و ماوه پارت ديموكرات كوردستان له‌بان لاپه‌ڕه‌يل رووژنامه‌ی (التآخی) هوبر وڕاو ئاماده‌يی خوه‌ی نيشاندا ئه‌را سه‌رخستن ئه‌نجامداين سه‌رشماريه‌گه ، وه‌لی له‌وه‌رانوه‌ر ئه‌وه به‌عس كه‌فته ياده‌كردن سياسه‌ت ته‌عريب به‌دناو له كه‌ركووك و ده‌سكرده جيوازكردن وه‌زيفه‌داره‌يل كورد له كه‌ركووك و دروسكردن وه‌زعيگ تا سه‌رشماريه‌گه هويچ ئه‌نجام خاسيگ له‌لی نه‌كه‌فيگه‌وه ، هه‌ر له‌وه‌ر ئه‌وه‌يش دوياخرياو له‌و ماوه سه‌رووك لوجنه‌ی ئاشتی ئه‌و وه‌خته (مورته‌زا سه‌عيد حه‌ديسی) ره‌حمه‌تی ديداريگ وه‌ل بارزانی نه‌مرا ئه‌نجامداو له‌وه‌ختيگ باس له ئه‌نجامداين سه‌رشماريه‌گه كردگه ، بارزانی نه‌مر وته‌سه‌پی : ئه‌گه‌ر ئه‌نجام سه‌رشماريه‌گه ئه‌وه نيشان به‌يگ ك ئه‌و ناوچه‌يله كوردستانن و له‌و جووره ده‌رنه‌چووگ وه‌گووره‌ی سه‌رشماريه‌گه ، ئه‌وه بارزانی ئاماده نيه دگان وه ئه‌نجام هه‌ڵوژاردنه‌يلا بنه‌يگ ، يه‌يش له‌يوا كرد به‌عس رمياگ هاوار له‌لی هه‌ڵسيه‌يگ . ئمجا رووژنامه‌ی (الثوره)ی به‌عس له يه‌كيگ له شماره‌يلی له ١٩٧٢ هاوار له‌لی هه‌ڵسياو په‌خش ئه‌وه كرد ك بارزانی نه‌مر وته‌سه مورته‌زا حه‌ديسی (كه‌ركووك به‌شيگه له‌كوردستان و ئه‌گه‌ر سه‌رشماريه‌گه له‌يوا نيشان به‌يگ ك زوورم مه‌ردم كه‌ركووك كورد نين ئه‌وه من دگان وه‌پيا نيه‌نه‌م ، من له‌وه‌رده‌م كورد نيه‌تويه‌نم ئه‌وه بگرمه مل و له‌كه‌ركووك واز بارم ، شايه‌ت له‌شوون من ئه‌وه بكريه‌يگ ) .
دی به‌عس ئه‌وه ئه‌رای ئاشكرا بوی ك بارزانی نه‌مر واز له‌كه‌ركووك نياريگ و مكوڕه له‌بانی ئه‌گه‌ر وه‌جه‌نگيش بويه ، ئه‌وه بوی له‌ساڵ ١٩٧٤جه‌نگ له‌بان كه‌ركووك ده‌سكرده‌پی ، يه‌يش يه‌كيگ بوی له هه‌ڵويسته‌يل تاريخی بارزانی نه‌مر له‌بان مه‌سه‌له‌ی كه‌ركووك و بيجگه ئه‌وه‌يش خاوه‌ن ده‌يه‌ها هه‌ڵويست ئازايانه‌س .