ك فره له ڕووڵه‌یل كورد فه‌یلى ك له وڵاته‌یل غه‌ریبى په‌یا و بوینه ئیسه نه‌وه‌ى دویم و سێیمن و له لایه‌ن جوگرافیاوه دابه‌ش بوینه‌سه بان ده‌وڵته‌یل فره‌یگ له جه‌هان هه‌ر له وڵات نه‌رویژه‌و بگره‌ى ك ها له له‌نگه‌ر باكوور یا قوتب شه‌مالى تا ڕه‌سیگه وڵاته‌یل خوارین زه‌وى له قاڕه‌ى ئوسترالیا.. چه‌ن نه‌وه‌یگ له كورده‌یل فه‌یلى ك نیشمان خوه‌یان ته‌نیا وه یادگاریه‌یل باوگ و داڵگه‌یلیانه‌و ناسن، یادگاریه‌یل ئه‌و سه‌رده‌مه ك نیشتمان له دووسداشتن وه‌لیانا فره ڕه‌زیلى كردیاد وه‌ختى هه‌ڵمه‌ته‌یل ته‌سفیركردن و بى شوون و نوینكردن دژیان ئه‌نجام دریا له لایه‌ن ڕژیم شۆڤینى به‌عسى... یه‌كیگ له دووسه‌یلمان ك له خیزانه‌یل كورد فه‌یلى له ئیران فره نزیك بوى، ئه‌وه ئه‌رامان باس كرد ك:" ئه‌وه‌گ مایه‌ى ئه‌ڵاجه‌وى هاتن و سه‌رسوڕمانمان بوى، ئه‌وه بوى ك كورده‌یل فه‌یلى فره دڵیان له‌لاى نیشتمانه‌گه‌ى خوه‌یانه‌و بوى و شانازى وه عیراقیه‌ت خوه‌یان كردیان، ئه‌وه‌یشه وه هووكاره‌كردن مناڵه‌یلیان ك وه شیوه‌زووان عیراقى قسه بكه‌ن تا زووان نیشتمانه‌گه‌یان له هویریانه‌و نه‌چوود و هه‌ر وه‌ى جووره‌یشه وه‌ل نه‌وه‌ى دویمیانه‌و ك له ئیران هاتیانه دونیا، هه‌مان ڕه‌فتار داشتن" ... زیاتریش وت :"گرینگترین چشتیگ كورده‌یل فه‌یلى له گشت وڵاته‌یل غه‌ریبى جه‌خت له بانى كردیان ئه‌را نه‌وه‌یل نوویان ئه‌وه بوى ك عیراقین و هه‌میشه یادگاریه‌یل عیراق خستیانه ناو یاد و دڵ و ده‌روینیان".
هه‌رچه‌نى ك كورده‌یل فه‌یلى له وڵاته‌یل غه‌ریبى شناسنامه وه‌رگردیان وه‌لى تا ڕووژ ئمڕوو هه‌وڵ وته‌قه‌لاى ئه‌وه ده‌ن ك شناسنامه‌ى عیراقییان دوباره بسیننه‌وه... له‌ى باوه‌ته گفت و گوویگ ئه‌نجام دایمن وه‌ل یاریده‌ده‌ر به‌ڕێوه‌به‌ر گشتى فه‌رمانگه‌ى كووچكردن له وه‌زاره‌ت كووچ و كووچوه‌پیكریایه‌یل سه‌تار نه‌ورووز ك ئه‌را ماڵپه‌ڕ شه‌فه‌ق وه‌ى جووره قسه‌كرد:" سیفه‌ت (كووچكه‌ره‌یل) هه‌ر له سه‌رده‌م ڕژیم وه‌رینه‌و نانه قه‌ى كورده‌یل فه‌یلیه‌و ، و ئیمه‌یش له وه‌زاره‌ته‌گه‌مان كارنامه‌یگ دانمایمنه تاگه‌ر كورده‌یل فه‌یلى شناسنامه و ڕه‌گه‌زنامه‌ى عیراقى خوه‌یان بسیننه‌وه و ئه‌را ئى مه‌به‌سیشه چه‌ن لوجنه‌یگ پیكهاوردیمنه ك سه‌ردانه‌سه كامپه‌یل كووچوه‌پیكریایه‌یل له ئیران تا بكه‌فنه شوون ئى باوه‌ته و چه‌ن هه‌نگام خاسیگ له‌ى ڕیگه ئه‌ڵگرتیمنه".
له باوه‌ت بارووه‌زع كووچوه‌پیكریایه‌یل فه‌یلى له ئوسترالیا ك له ئیرانه‌و ئه‌را ئه‌ى وڵاته چوینه و كێشه و گیرو گرفت وه‌ل وه‌زاره‌ت كووچ ئوسترالیا دیرن، سه‌تار نه‌ورووز ئه‌وه ئاشكرا كرد ك :"چه‌ن دیداریگ وه‌ل فه‌رمانبه‌ره‌یل وه‌زاره‌ت خارجیه‌ى ئوسترالیا ئه‌نجام دایمنه له باوه‌ت مه‌سه‌له‌ى كورده‌یل فه‌یلى و كێشه‌گه‌یان ئه‌رایان ڕووشنه‌و كردیمنه و چوین یانه له عیراقه‌و ده‌ركریانه و ماڵ و موڵكیان گشتى زه‌فت كریایه وهه‌تا شناسنامه‌یشیان له‌لیان بریاس ك سابت ئه‌وه كه‌ى ك هاووڵاتى عیراقیین و ئه‌وانیش قه‌وڵ دانه پیمان ك وه وردى باخه‌وه‌ر وه‌زاره‌ت كووچ ئوسترالى بكه‌ن له‌ى باوه‌ته".
له باوه‌ت داین ڕه‌گه‌زنامه‌ى عیراقى وه نه‌وه‌یل نوو كورده‌یل فه‌یلى، سه‌تار نه‌ورووز ئویشى:" وه‌ل فه‌رمانگه‌ى سه‌فه‌ر و جنسیه له وه‌زاره‌ت داخلیه ته‌نسیق كردیمن و ئه‌وانیش وه گه‌رمى پیشوازى له پیشنیاره‌گانمان كردن و قه‌وڵ دانه پیمان وه شیوه‌یگ قانوونى و ئسووڵى بكه‌فنه شوون ئى كاره، ئیمه‌یش ئیسه كار له بان ئه‌وه كه‌یمن ك گشت كورده‌یل فه‌یلى له ڕیگه‌ى سه‌فاره‌تخانه‌یل عیراقه‌و له وڵاته‌یل غه‌ریبى ڕه‌گه‌زنامه‌ى عیراقى وه‌ربگرن و پرووژه‌یگیش داشتیمن ك وه ڕیگه‌ى ئه‌نته‌رنێته‌و جیوه‌جیى بكه‌یمن وه‌لى له‌ى باوه‌ته توانامان وه‌گووره‌ى خواست نه‌وى و كاره‌گه سه‌خت بوى، وه‌لى له‌بان ئه‌وه‌یشه‌و ئیمه هیمان هه‌وڵ ده‌یمن كوومه‌ك نه‌وه‌یل نوو كورد فه‌یلى بكه‌یمن تا به‌ڵگه‌نامه‌یل عیراقى خوه‌یان گیر بارن".