باس ئه‌و بارووه‌زع ناڵه‌بار وه‌رده‌وامه كه‌یگ ك زورم ملله‌ته‌یل ناوچه‌گه وه‌ده‌س رژیمه‌یل سیاسی وڵاته‌یلیان تیوشی هاتنه . له‌وانه‌یش سه‌ركوت كردن و ژیر پاخستن حقوق ئنسان و نه‌هیشتن ئازادی و گردن و زندانی كردن ناقانونی و ده‌ركردن بڕیاره‌یل نائاسایی جوور شیوازیگ دایم یانیمچه دایم له ژیان سیاسی . وه گوره‌ی هه‌مان راپۆرت نیمیگ له په‌نابه‌ره‌یل یا لاجئه‌یل جه‌هان هاوڵاتی وڵاته‌یل عه‌ره‌بن و له‌ئاكام شكه‌ست سیاسی و ئابوری و روشنهیوری و گه‌شه‌كردن و زیای بیون بیكاری وتاوان وهه‌ژاری و كه‌مده‌سی هاوڵاتی ئی وڵاته‌یله بان گرنه وه‌ر ئه‌را وڵاته‌یلتر جه‌هان ؛ بی گومان رژیم دكتاتۆری گوزه‌یشته‌ی عراقیش له جومله‌ی ئه‌و رژیمه‌یل سه‌ركوتكه‌ره بیو و به‌ڵكم له‌وان تاوانبارتر و خیونڕیژتر. سه‌ره‌ڕای ئه‌و ناكوكی و جیاوازیه ك له ناونی ئه‌و رژیمه‌یل تاوانباره هه‌س وه‌لی گشتیان ته‌نیا له‌یه‌ك وه‌خت یه‌كه‌وگرن ك ئه‌ویش وه‌خت هه‌ڕه‌شه‌و خه‌ته‌ره ك ئه‌و یه‌كه‌وگرتنه تیوه‌نیم ناوی بنه‌یمه هاوكاری و ته‌نسیق له‌ناونی بانده‌یل گه‌ناته‌كار ؛ ئه‌ڵاجه‌یوییش نیه ئه‌گه‌ر بیوشیم ك ته‌نیا كۆنفرانسه‌یل و دانیشتنه‌یلی له ناونی وڵاته‌یل عه‌ره‌بی سه‌ركه‌فن ك له ناونی وه‌زیره‌یل ناوخوه‌ی و ده‌زگا سیخوریه‌گان ئه‌و وڵاته‌یله وه‌رپاكریه‌ی .
ئمجا ئه‌وهوكاره‌یله ك هیشتنه ملله‌ته‌یل ناوچه‌گه مل كه‌چ ئه‌و سیاسته‌یله بوون و زوڵم وسته‌م رژیمه‌يل قه‌بول بكه‌ن ، فه‌ره‌ن و په‌یوه‌ندی وه گشت لایه‌نه‌یل سیاسی و روشنهیوری وئاینی وپه‌روه‌رده‌یی دیرن و راسیه‌گه‌یش ئه‌وه‌سه ك گشتمان وه‌شیوه‌یگ له شیوه‌یل مه‌سئولیم له‌بان ئی مه‌سه‌له و یه‌یش ئمڕوو وه‌دی ناتگه به‌ڵكم ئاكام مه‌نتقی و سرووشتی كه‌له‌كه بیون غه‌له‌ته‌یل گوزه‌یشته‌و چاره‌سه‌رنه‌كردن ئه‌وغه‌له‌ته‌یله‌سه و بی ده‌سه‌ڵاتی له وه‌راوه‌ر كێشه‌وگرفته‌يل بیوه وهه‌میش نه‌تیوه‌نستیمه له غه‌له‌ته‌یل گوزه‌یشته ده‌رس عبره‌ت بوه‌یم تا له‌ی گیژاوه ك وه زور فه‌رز كریاگه‌سه بان كومه‌ڵگایه‌یل خوه‌مان نجات بیه‌یم . وه‌لی به‌ش گه‌ورای مه‌سئولیه‌ته‌گه كه‌فیگه مل ئه‌و سیاسه‌تمه‌داره‌یله ك كاروبار وڵات به‌نه ریه‌و وخاوه‌ن ده‌سه‌ڵاتن ؛ ئه‌را نمونه ده‌وڵه‌ته‌یل عه‌ره‌بی تازه جوور ده‌وڵه‌ته‌یل خاوه‌ن دام وده‌زگا وهاوڵاتیه‌یل ئازاد نه‌تیوه‌نستنه خوه‌یان وه‌شیوه‌ی مودێرن ریكبخه‌ن و له‌ولایشه‌و مه‌ردم جوور تاك وكۆمه‌ڵ نه‌تیوه‌نستنه ئه‌را یه‌كلاوه كردن كیشمه‌كیش وململانیه‌یل خوه‌یان په‌نا بوه‌نه وه‌ر ئه‌قل ومه‌نتق و بنه‌وایه‌یل یا ئه‌ساسه‌یل ره‌وشتی تا جوور ئه‌رزشيگ به‌رزوبڵین سه‌رله‌نوو فه‌رزی بكه‌نه مل كۆمه‌ڵگا ؛ وه‌لی سیاسه‌ت له گشت ئه‌و تایبه‌ت مه‌ندیه‌یل ناو كۆمه‌ڵگا وه نه‌ف وسود خوه‌ی بردو له ململانی ئه‌را وه‌ده‌سه‌وگردن ده‌سه‌ڵات وه‌كاریان برد و ئاكامه‌گه‌ی ئاژاوه و پاشاگه‌ردانی گه‌ورا له سیاسه‌ت وكۆمه‌ڵگا وده‌سه‌ڵات بیو. هه‌روه‌ی خاتره له داڵگ بیون عراق تازه له ناو نه‌خشه‌يگ سیاسی گوماناوی بیو ك جوور كوچگیگ بیو بخریه‌یگه ناو ئاو مه‌نه‌یگ و وه‌رجله ئه‌وه‌گ سه‌قام بگری و ته‌ئسیر سیاسی بنه‌یگه بان ملله‌ته‌یل ناوچه‌گه ك تیه‌نگ ئازادی وئسلاح وگۆڕانن ؛ رژیمه‌یل ناوچه‌گه چ عه‌ره‌بی وغه‌یره
عه‌ره‌بی زیوهاتنه خوه‌یانا و ناقوس خه‌ته‌ركوتان له باوه‌ت له داڵگ بیون عراق تازه وهه‌ر له شیون رمیان به‌عس تائیسه گوڕایگوڕ ته‌قالاكه‌ن تا ئی رژیم تازه له‌عراق له ناو بوه‌ن ك نه‌وادا ته‌ئسیر بنه‌یگه بان ئاینده‌ی ده‌سه‌ڵاتیان چ تا دیوه‌كه له ری وازكردن سنوره‌یلیان له‌ریو ترۆریسته‌یل وخراوكاره‌یل و چ ئمڕوو ك له ناو پرۆسه‌ی سیاسی له ری پیاوه‌یل و وه‌كیله‌یلیان چاڵ ئه‌را عراق وملله‌ته‌گه‌ی كه‌نن . له كوتایی یه مه‌نگه بیوشیم ك هیمانی دێر نیه ئه‌گه‌ر بتوایم غه‌له‌ته‌یل گوزه‌یشته چاره‌سه‌ر بكه‌یم و بوشایه‌یل وه‌دی هاتگ له وه‌زع سیاسی عراق وه‌گشتی پڕه‌و بكه‌یم ؛ وه‌لی ئه‌گه‌ر هه له‌یوا وه‌بی چاره‌سه‌ر بیلیمه‌ی ئه‌و وه‌خته دی دێره و كار له كارگوزه‌یشتگه .