له‌لى كه‌فته‌وه‌و ئومیده‌واریم ئامانج داشتووگ و له‌به‌رژه‌وه‌ندى ئاینده‌ى عراق دیموكراسى بووگ و هویچ گرفتیگ نه‌خریه‌یگه ئه‌و نه‌خشه‌ى حكوومه‌ته ك ئامانجى ئه‌وه‌سه وه‌گووره‌ى ئه‌وه بتویه‌نیگ بنه‌مایگ زانستى دامه‌زرنیگ و پشت وه‌پى بووه‌سیگ له‌نه‌خشه‌كیشان و په‌ره‌داین و جى وه‌جیكردن ئه‌و به‌رنامه‌یله ك ئامانجیان ئه‌وه‌سه واقع كویه‌ن وه‌پى فراوانه‌و بكه‌ن ك له‌هه‌گبه‌ى حوكم رژیم به‌عس و پیاوه‌یل زووردارى جویر میرات مه‌نده جیه‌وه ئه‌ڕامان.
له‌ناونى ئه‌و كیشه‌و گرفته‌یله ك بووگه تویش مه‌سه‌له‌ى سه‌رشمارى ، ئه‌ویش كیشه‌ى به‌ش نه‌ته‌وه(حقل القومیه)س ك ئشاره‌ت وه‌پى كریه‌یگ له فایل سه‌رشماریه‌گه‌و هه‌ر بایه‌سه ئشاره‌ت بكه‌یم ئه‌را مه‌سه‌له‌ى ئاینده‌ى ژیارى یا حزارى ، ك مه‌سه‌له‌ى نه‌ته‌وه له‌ئاینده‌ى نزیكیگ بووگه مه‌سه‌له‌ى شووناسنامه‌ى كه‌سى و كاریگه‌رى نه‌یریگ له‌بان مه‌سه‌له‌ى هاووڵاتیبوین ك بایه‌سه له‌بان یه‌كسانى ناونى گشت نه‌ته‌وه‌یل ملله‌ت عراق و تایفه‌یلى بنیات بنریه‌یگ. ئمجا ملله‌ت كورد مادام هه‌ق ئسپاتكردن شوناسنامه‌ى خوه‌ى وه‌رگریگ له‌و ئستماره یا فایل سه‌رشماریه ، دى مه‌سه‌له‌ى چشته‌یل تر جویر ئه‌شره‌ت و تایفه‌و مه‌زه‌و ئه‌وه‌نه گرینگى یا ئه‌همیه‌ت نه‌یریگ ، چوینكه ئشاره‌تكردن و نویسانن نه‌ته‌وه‌ى كورد (القومیه الكوردیه) له ئستماره‌گه له‌گشت چشتیگ تر گرینگتر یاموهمتره ، ئمجا ئه‌و كورده ك ئشاره‌ت ده‌یگه لاى نه‌ته‌وه‌گه‌ى خوه‌یا چ كورد شه‌به‌ك یا ئێزیدى یا سۆرانى یا كرمانجى یا فه‌یلى بووگ هویچ جیاوازى نه‌یریگ و هویچ له‌هاوكیشه نه‌ته‌وایه‌تیه‌گه ئاڵشت نیه‌وگ ، ته‌نیا ئه‌وه نه‌وگ خودانه‌خواسته ئه‌گه‌ر پیكهاته‌یگ بتوایگ له شوناسنامه‌ى نه‌ته‌وه‌یى خوه‌ى ده‌ربچووگ و ئنتما بكا ئه‌را نه‌ته‌وه‌یگ تر ، یا بتوایگ نه‌ته‌وه‌گه‌ى هه‌مان شوناسنامه‌ى دینه‌گه‌ى بووگ جویر یه‌هوودیه‌یل ك ئه‌ویش مه‌سه‌له‌یگ تره‌و باوه‌ڕ نیه‌كه‌یم نه‌ف داشتووگ ئه‌را هه‌ر پیكهاته‌یگ عراقى . تووماركردن یا نویسانن نه‌ته‌وه له‌فایل سه‌رشمارى مه‌سه‌له‌ى قوناغیه نه‌ك ئاینده‌یى ، چوینكه نه‌ته‌وه له‌ئاینده هه‌وه‌جه‌ى خواستیگ نیه ك هاووڵاتى عراقى وه‌پیه‌وه پابه‌ند بووگ ئه‌را وه‌رگرتن هه‌قه‌یلى ، به‌ڵكوو بایه‌سه گشتمان هه‌وڵ بیه‌یم ئه‌را ئه‌وه‌ك گشت هاووڵاتیه‌یل جویر یه‌ك بوون وه كورد و عه‌ره‌ب و توركمان و ئاشوورى و كلدانى و سریانى و ......هتد.
بیجگه ئه‌وه‌یش مه‌سه‌له‌ى پاداگرتن له‌بان ئشاره‌تكردن وه‌دین و مه‌زه‌و له‌تووماره‌یل سه‌رشمارى شایه‌ت ئمڕوو مه‌سه‌لى گه‌رمیگ بووگ ، وه‌لى دویاى چه‌ن ساڵیگ تر ئومیده‌واریم ته‌نیا بووگه مه‌سه‌له‌ى سه‌رشمارى و هویچ په‌یوه‌ندییگ وه‌و چشته‌وه نه‌یاشتووگ ك لاشه‌ى نیشتمان داڕزنیگ.
له‌باوه‌ت كورده‌یل فه‌یلییش له‌گشت عراق هه‌وه‌جه نه‌یرن وه ئه‌وه‌ك ئسپات نه‌ته‌وه‌ى خوه‌یان بكه‌ن ، چوینكه هه‌ر له‌ناوه‌گه‌یان دیاره ك به‌شیگن له‌ملله‌ت كورد ، وه‌لى مه‌سه‌له‌ى تایفى و دین و نازناو یا له‌قه‌ب و ئه‌شره‌ت ، ئه‌یانه چشته‌یلیگن كاریگه‌رى نه‌یرن له‌بان پرووسه‌ى سه‌رشمارى ، چوینكه ئامانج له‌ى پرووسه‌ى سه‌رشماریه له‌گشت حاڵه‌تیگ ئه‌وه‌سه ك به‌رنامه‌ى نه‌فداریگ ئه‌را هاووڵاتیه‌یل دابنریه‌یگ نه‌ك به‌رنامه‌یگ جیاوازى بخه‌یگه ناونیان.