تازه ك له‌چوار ده‌ور كویچه‌گه‌مان بنیات نریان ، فره سه‌رم سوڕمه‌ند وه هیز و قووه‌ت ئه‌و پیاوه ك وه‌و جووره ئه‌و شه‌ڵمانه وه‌پشت ئه‌ڵگردویگ و دریژى شه‌ڵمانه‌گه‌یش نزیكه‌ى په‌نج مه‌تر بوى ، ئه‌یه بیجگه كیش یا وه‌زنه‌گه‌ى. ئمجا هه‌ر وه‌ختى پرسیار له‌لى كردیایم وتیاگ (ئیمه كورد فه‌یلییم) و كوردیش پشتیان قایمه.دویاى ساڵه‌یل فره‌یگ (ئه‌مورى ئامان)ئه‌و وازیزان كه‌موینه‌و ئه‌و پیاویشه ك شه‌ڵمانه‌گه هه‌ڵگردویگ خستنه‌مه ناو هویرو (عه‌باس ئه‌لدیك) هاوردنه هویرم ، ك یه‌كم پاڵه‌وان زوورانبازى ئازاد بوى له‌عراق و دویاخریش بویه پاڵه‌وانیگ جه‌هانى.
بیجگه ئه‌وه‌یش ناوه‌یل تر له‌كورده‌یل فه‌یلى ده‌ركه‌فت جویر (ئه‌نوه‌ر موراد) گۆڵچى وه‌ناوبانگ هه‌ڵوژارده‌ى نیشتمانى عراقى و هه‌ردوگ برا (مه‌حموود ئه‌سه‌د) و (سه‌مه‌د ئه‌سه‌د) وازیزانه‌یل تووپ (پا)و ده‌یه‌ها وه‌زرشكاره‌یل تر له‌گشت شیوه وازییگ.
ئه‌ویسایش وه‌ختى مناڵ بویمن ها له‌هویرمان ك هه‌میشه ئه‌و گوورانى عراقیه وتیایم ك یه‌كم ئاوازدانه‌ر (ملحن) عراقى دایناویگ و ئاوازه‌گه جیواز بوى ئه‌را ده‌یشت نیشتمان و فیزه ئه‌حمه‌د ئه‌ڕاى گوورانى چڕى و بیجگه ئه‌ویش (نه‌جاح سه‌لام و سه‌میره ته‌وفیق و نه‌رجس شه‌وقى)و هونه‌رمه‌نده‌یل تر. ئمجا له‌شوون ئه‌وه‌یش زانستیم ك خاوه‌ن ده‌نگ پڕ له‌سووز و ئاوازدانه‌ر یه‌كیگه له كورده‌یل فه‌یلى ك ئه‌ویش (ره‌زا عه‌لى) بوى.
عه‌باس جه‌میل و جه‌عفه‌ر حه‌سه‌ن و نه‌سیر شه‌مه‌و محه‌مه‌د حسێن گومه‌ر و سه‌ده‌هاتر له‌هونه‌رمه‌نده‌یل و گوورانیچڕه‌یل و سیاسیه‌یل و نویسه‌ر و ئه‌دیب و رووژنامه‌نویس و خه‌باتكه‌ر و شه‌هید و سه‌ركرده‌ى پارته‌یل و ریكخریاگه‌یل جووراو جوور و مامۆستایه‌یل زانكۆ و ده‌رسده‌ر و خاوه‌ن پیشه‌و زوورم بازرگانه‌یل سه‌ركه‌فتگ ، وه‌تایبه‌ت له‌بازاڕ شۆرجه له‌به‌غداو بازاڕ بازرگانه‌یل له به‌سره‌و پیشه‌كاره‌یل عراق ، گشت ئه‌یانه له كورده‌یل فه‌یلى بوین . له‌به‌غدا خوه‌ندگاى تایبه‌ت و جیاواز وه‌خوه‌یان داشتن جویر خوه‌ندگا یا مه‌دره‌سه‌ى فه‌یلى ، بیجگه ئه‌وه‌یش له‌لایه‌ن رووشنهویرى و مه‌یدان كوومه‌ڵایه‌تى و لایه‌نه‌یل تر كه‌مته‌رخه‌م نه‌وینه‌و هه‌میشه ده‌س باڵایش داشتنه له‌گشت چشتیگ ك خزمه‌ت وه وڵات كردگه ، له‌مه‌یدان دینییش وه‌رده‌وام ده‌سه یا مه‌وكب تایبه‌ت وه‌خوه‌یان داشتنه‌و هه‌میشه دیارى بویه‌و تام خوه‌ى داشتگه ، له‌لاین خه‌باتیشه‌وه تائیسه‌یش كورده‌یل فه‌یلى له‌نواى گشت كه‌سیگ بوینه له‌خه‌بات نیشتمانى و چینایه‌تى و كوومه‌ڵایه‌تى ، هه‌ر له‌وه‌ر ئه‌وه‌یش هه‌میشه دڕنده‌یل و دكتاتۆره‌یل دژایه‌تیان كردیان و جویر ته‌به‌عیه‌ى ئیرانى له قه‌ڵه‌م دریان.
كورده‌یل فه‌یلى به‌شدارى له ڕز (پێشمه‌رگه)ى كوردستانیش كردنه‌و شه‌هیدیش پیشكه‌ش وه خاك نیشتمان كردنه ، ته‌نانه‌ت له‌وه‌خت خوه‌ى لق په‌نج پارت دیموكرات كوردستان زوورم كادره‌یلى كورده‌یل فه‌یلى بوین ، وه‌لى له‌وه‌ختیگه‌وه رژیم به‌عس خوه‌ى له عراق دیه‌وه ، دى كورده‌یل فه‌یلى وه‌زع نیشتنیان له‌عراق روى له‌خراوى كردو ئه‌وه بوى فره‌یگ له‌لیان ده‌روه‌ده‌ر و ئاواره كرد وه‌مه‌هانه‌ى ته‌به‌عیه‌ى ئیرانى و ئیسه‌یش له‌شوون ئه‌وه‌ك ساڵه‌یل فره‌یگه سه‌دام و یه‌تیمه‌یلى نه‌مه‌ندن ، وه‌لى هیمان هه‌ر په‌یڕه‌و هه‌مان ره‌فتار و هه‌مان سیاسه‌ت كریه‌یگ وه‌ل كورده‌یل فه‌یلیا له‌ى عراقه ك شوون باوگ و باپیره‌یلیانه‌و هیمان كیشه‌ى شوناسنامه‌و هاوردنه‌وه‌ى ماڵ و موڵك و هه‌قه‌یلیان چه‌وه‌ڕى ره‌حمه‌ته‌و كه‌سیگ نیه خه‌مخوه‌ر راسه‌قینه‌ى ئى ملله‌ت كه‌رامه‌تداره بوود.