وه‌زاره‌ته‌یله بشمارنه‌ى ك كارا نیه له حكوومه‌ت عیراق، وه‌لى ئه‌و بارووه‌زع سه‌خت وتیه‌ڵه ك چینه‌یل فره‌یگ له كوومه‌ڵگاى عیراقى له‌تى ژیان له كووچوه‌پیكردن و هه‌وڵه‌یل ڕژیمه‌یل وه‌رین ئه‌را ناوسڕانن چه‌ن پیكهاته‌ى گرنگیگ و هه‌وڵداین ئه‌را هه‌ڵكه‌نینیان له لاشه‌ى نیشتمان جه‌خت له‌بان ئه‌وه كه‌ید ك ئه‌ركه‌یل گه‌ورا و خه‌ته‌رناكیگ ها سه‌رشان ئى وه‌زاره‌ته، ك وه‌رپرسیاره له گشت ئه‌و كاروباره ك په‌یوه‌ندى وه په‌نابه‌ره‌یل و كووچوه‌پیكریایه‌یل عیراقیه‌و دیرى.
ئمڕوو دویاى ئه‌وه‌گ سه‌رۆك وه‌زیره‌یل كابینه‌ى وه‌زارى خوه‌ى خسته وه‌رده‌س ئه‌نجوومه‌ن نوێنه‌ره‌یل ئه‌را ده‌نگداین له‌بانى ، ئه‌وه ئاشكرا بوى ك وه‌زاره‌ت كووچ وكووچوه‌پیكریایه‌یل بویه یه‌كیگ له‌و وه‌زاره‌ته‌یله ك كه‌فتنه‌سه ده‌س كورد ، له‌ى باوه‌ته وئه‌وه‌گ كورده‌یل فه‌یلى چه‌وه‌ڕیى كه‌ن له‌ى وه‌زاره‌ته و له كاروه‌ده‌سه‌یل كورد له‌چه‌ن هاووڵاتییگ پرسیمن.
هاووڵاتى له‌یلا عبدالهادى جه‌خت له‌بان ئنتماى ڕاسكانى كورد فه‌یلى كرد ك به‌شیگه دانه‌وڕیاى له ملله‌ت كورد، خوه‌شحاڵى خوه‌ى نیشاندا له ئاینده وهاوردنه‌وه‌ى گشت ئه‌و هه‌قه‌یله ك كورده‌یل داواى كردنه و وت:" ئه‌وسا و ئیسایش نه‌خش و ده‌ور خوه‌یان داشتنه له كوومه‌ڵگاى عیراقى و وه‌یانیش به‌شیگن نه‌وڕیاى له ملله‌ت كورد، و ئه‌مید گه‌ورایگیش دیریمن وه ئاینده ك هه‌رچى هه‌قه‌یلمانه دوباره بسینیمنه‌وه ك له لایه‌ن ڕژیم وه‌رینه‌و زه‌فت كریا، و دونیا گشتى باخه‌وه‌ر بوى له ئه‌و زوڵم و زووره ك تویشى هاتیمن له شوون ئه‌وه‌گ دادگاى باڵاى تاوان عیراقى جه‌خت له‌بان ئه‌وه كرد ك ئى تاوانه‌یله تاوان قرانكردن وه‌جه‌من(جینۆساید) وه هه‌ق ئیمه".
له‌لاى خوه‌یه‌و دكتۆر تالب یاسین باپیر داوا له سه‌ركردایه‌تى كوردستانى و كاروه‌ده‌سه‌یل كورد له به‌غدا كرد بایه‌خ بیه‌نه چین كورده‌یل فه‌یلى ك ئه‌وسا زوڵم له‌لى كریا و ئیسه‌یش له لایه‌ن كاروه‌ده‌سه‌یل حكوومه‌ته‌و پشتگووشخریانه و وت:" من ئومیده‌وارم ك سه‌ركردایه‌تى كوردستانى و كاروه‌ده‌سه‌یل كورد له به‌غدا بایه‌خ بیه‌نه چین كورد فه‌یلى و سه‌رپه‌رشتیى بكه‌ن چونكه له سه‌رده‌م ڕژیم وه‌رین زوڵم گه‌ورایگ له‌لى كریا و له‌ى سه‌رده‌میشه پشتگووشخریایه له لایه‌ن كاروه‌ده‌سه‌یل كورد و له‌لایه‌ن حكوومه‌ت عیراقیش".
ئه‌ندام ده‌سته‌ى ئیدارى كوومه‌ڵه‌ى كورده‌یل الفیلیین خالد محمد قاسم مه‌سه‌له‌ى وه‌رگردن پۆست وه‌زاره‌ت كووچ وكووچوه‌پیكریایه‌یل له‌لایه‌ن ئئتلاف فراكسیۆنه‌یل كوردستانى وه مایه‌ى شانازى ودڵخوه‌شى شماره‌ى كرد و جه‌ختیش له‌بان گرنگى ئى وه‌زاره‌ت گرنگه كرد و داواكرد نه‌خشوده‌ورى كاراوه‌بكریه‌ید له ئاینده تا ده‌س زوڵملیكریایه‌یل بگرید و هه‌ڵه‌په‌ڵه بكریه‌ید له چاره‌سه‌ركردن كێشه و گیروگرفته‌گانیان ك یه ماوه‌ى فره‌یگه گیركردیه.
خالد محمد قاسم جه‌خت له‌بان ئنتماى كورده‌یل فه‌یلى كرد ئه‌را ملله‌ت كورد ك تویش واوه‌یلى فره‌یگ هات وه‌ده‌س ئه‌و سیاسه‌ته‌یل ڕه‌گه‌زپه‌رستانه‌ى ڕژیم وه‌رینه و وت:" وه‌شانازى فره‌یگه‌و پیشوازى له‌وه‌كردیمن ك كه‌سایه‌تى كوردیگ له ئئتلاف فراكسیۆنه‌یل كوردستانى پۆست وه‌زاره‌ت كووچ و كووچوه‌پیكریایه‌یل وه‌رگرى، و ئیمه‌یش له‌و وه‌خته ك له‌بان عیراقیه‌ت خوه‌مان جه‌خت كه‌یمن، له‌هویرمانه‌و نیه‌چوود ك كورد ئه‌سڵمه‌نیمن و ئنتمامان ئه‌را نه‌ته‌وه‌ى كورده، و له وه‌زاره‌ت نوو چه‌وه‌ڕى كه‌یمن ك وه‌ل مه‌زڵوومه‌یله‌و بووسیه‌ید و له گشتیان مه‌زڵوومتر كورده‌یل فه‌یلى، و داوا له كاروه‌ده‌سه‌یل ئى وه‌زاره‌ته كه‌یمن هه‌ڵه‌په‌ڵه بكه‌ید له چاره‌سه‌ر كردن ئه‌و كێشه‌یل گیركردیه و په‌یاكردن ڕیگه‌چاره‌یل زامنكه‌ر كووتایى هاوردن وه مه‌ینه‌تیه‌گان ئى چین زوڵملیكریایه".
ئا: كفاح هادى