و جایه‌ڵ جوانه‌یل وه‌پیسترین شیواز ڕه‌سانه كووچ وه‌پیكردن ئه‌را ده‌وڵه‌ته‌یل هاوساو كاریگ كرد كه‌س نه‌كردویگه‌ى. ئه‌وه بوى ئه‌و مه‌ردمه ك روى كردنه ده‌یشت عراق ئه‌وانه‌ك تواناى كاركردن نه‌یاشتن ونه‌تویه‌نستن روى بكه‌نه وڵاته‌یل تر ناچار بوین كه‌لپه‌ل ناوماڵه‌ى خوه‌یان بفرووشن یا به‌شیگ له‌خانگه‌یلیان بفرووشن، چوینكه ئه‌و پویله یا ئه‌و مه‌عاشه ك مانگانه سه‌ندیانه‌ى به‌ش گوزران خاسیگیان نه‌كرد، ئمجا له‌و ڕووژگاره‌یلشه تاڕاده‌یگ مه‌عاش مه‌ردم جویر یه‌ك بوى و جیاوازى له‌یوایگ نه‌وى له‌ژیان ڕووژانه‌یان، وه‌لى دویاى 9 / 4 / 2003 وه‌چه‌ن مانگیگ گویڕانكارى په‌یا بوى له مانگانه‌ى كارمه‌ند و سه‌ربازه‌یل و سه‌د قات زیاى كرد، یه‌یش بویه هووكار خاسه‌وبوین گوزرانیان، وه‌لى فه‌قیره‌یل هه‌ر له‌وه‌زع خوه‌یان مه‌ندن و له‌گوزرانیان خاسه‌و نه‌وى، ئمجا له‌شوون چه‌ن ساڵیگ بازداین نائاسایى كه‌فته وه‌رچه‌ومان له‌لایه‌ن شماره‌ى فره‌یگ له هاووڵاتیه‌یله‌وه‌و له‌وه‌خت كه‌میگ ، ئه‌ویش وه‌په‌یمانه یا قیاس وه‌ل ئه‌و بڕه داراییه ك ئه‌وسا داشتنه‌سه‌ى وله‌هه‌مان وه‌خت وه‌ره‌و دویاهاتن مه‌ردمان فره‌یگ له‌ڕوى ماددیه‌وه له‌ڕوڵه‌یل ئى ملله‌ته‌و كه‌فتنیان وه‌ناو حاڵه‌ت نه‌دارى سه‌ختیگ وه‌سه‌به‌ب نه‌وین ده‌رفه‌ت و هه‌ل كاركردن و ده‌س نه‌وردنیان ئه‌را ماڵ حه‌رام ، ئه‌یه‌ی بیجگه زیایكردن شماره‌ى بى سه‌رپه‌رش و یه‌تیم و بیوه‌ژنه‌یل وه‌سه‌به‌ب تون وتیژى تایفى و كووچ وه‌پیكردن مه‌زه‌وى ك هووكاره‌گه‌ى تیرۆرسته‌یل بوین له‌كوشتن وه‌جه‌م مه‌ردمه‌یل. ئمجا ئایا دى وه‌خت ئه‌وه ناتگه له‌ى وڵاته ك وه‌پى ئویشن (وڵات موسڵمان) لایگ له‌و به‌دبه‌خته‌یل و فه‌قیره‌یله بكریه‌یگه‌وه ، وه‌تایبه‌ت ده‌وڵه‌مه‌نه‌یل و سه‌رمایه‌داره‌یل ك له‌بار قورس فه‌قیره‌یل كه‌مه‌و بكه‌ن تا ئه‌وانیش بتویه‌نن له سه‌ختى ژیان بپه‌ڕنه‌وه‌و گوزرانیان خاستره‌و بووگ له‌و وه‌زع فه‌قیرى و نه‌دارى و بیبه‌شیه ك دیرنه‌ى له ئاسانترین ڕوى وه‌ڕوى بوینه‌وه‌ى ژیان؟ تاكه‌ى بیلیم ئه‌زره‌ت وه مه‌رگ خوه‌یان بخوازن و تام جووره‌ها تیه‌ڵى بكه‌ن؟ ئمجا په‌یغه‌مبه‌ر خودا(س .خ) له‌ى باوه‌ته‌وه فه‌رمایش كردگه(هویچ ملله‌تیگ عه‌زاو جویر ئه‌و ملله‌ته نه‌خوارد ك له‌شانیه‌ت فه‌قیره‌یلى كه‌مه‌و كریا). ئمجا هویچ تامیگ نه‌یریگ ئه‌گه‌ر ماڵ دونیا داشتوید و له‌ڕوى نه‌داره‌و فه‌قیره‌یل ده‌سد واز نه‌وگ، ئمجا ئایا نیه‌تویه‌نیم وه‌گشتمانه‌وه به‌شدارى له‌زه‌رده‌خه‌نگیگ بكه‌یم و بنه‌یمنه‌ى بان لیو فه‌قیره‌یل و ته‌ماشاى ره‌حمه‌ت خودا بكه‌یم و به‌زه‌ییمان بایگه خیزانه‌یل كه‌مده‌س و نه‌دار.