دادوه‌ر عه‌لى كه‌مال/ مه‌سه‌له‌ى تاوانه‌يل ئه‌لكترۆنى گرنگى تايبه‌ت ديرێد له‌وه‌ر ئه‌وه‌گ زاينده‌ى شۆڕش زانيارييه ك ئاڵشتكاريه‌يل ئابوورى و كۆمه‌ڵايه‌تى له‌لى كه‌فته‌وه‌و بويه هووكار ده‌ركه‌فتن ئاسوو تازه‌يگ له كۆمه‌ڵگاى زانياريه‌يل, وه‌كارهاوردن كۆمبپيوته‌ريش زياى كرد جوور وه‌سيليه‌گ ئه‌را خه‌زنكردن و چاره‌سه‌ر و هاوردنه‌وه‌ى زانياريه‌يل و جوور يارمه‌تيده‌ريگ گرنگ له كاره‌يل ديزاين و دروسكردن و ئداره‌و په‌ره‌داين وه جيوه‌جيكردنى له ئه‌ركه‌يل بڕيگ له كرده‌وه‌يل هساواته‌و ئه‌را ئه‌رك خزمه‌تگوزارى له بواره‌يل جياجيايگ جوور په‌روه‌رده و ته‌شخيسكردن پزيشكى و ئاسانه‌وكردن مامڵه‌يل و خزمه‌تگوزاريه‌يل بانكى و حجزكردن ئالى ئه‌را جيوازكرن كه‌س و كاڵايه‌يل، ك وه ئه‌وه‌يش هويچ بواريگ نه‌يشه‌و چ بازرگانى يا ئابوورى يا پيشه‌سازى ك گشتى ئه‌يانه كه‌فته كۆمپيته‌ر و رۆڵ سه‌ره‌كى وه‌رگرێد له كاره‌يلێ و په‌ره‌داين وه خزمه‌تگوزاريه‌يليگ ك پيشكه‌شى ئه‌كا، ك وه ئه‌وه‌يش جه‌هان جوور ئاوايى بويچكگيگ وه‌پى هات و بڕيگ حاسبه جه‌ميه‌و كرد وه سيستمه‌يل زانيارى جياجياو له‌ڕێ ئه‌وه‌يشه‌و گشت كسيگ ئه‌تويه‌نێد له‌ڕێ شاشه‌ى كۆمپيته‌ره‌و گشت مه‌رزيگ بووڕێد و بڕه‌سيده زانيارى و ئه‌و چشته‌يله بسێنێد ك هه‌وه‌جه وه‌پى ديرێد، ك دوياخريش بيجگه له قانجازه‌يلێ ئه‌را ئاده‌ميزاد، وه‌لێ وه‌ل ئه‌وه‌يشا ياساشكنيگ ئه‌كريه‌ێد له‌ى سيستمه‌و تاوان له‌ڕييه‌و ئه‌نجام ئه‌دريه‌ێد ك تايبه‌ت وه تاك له‌ڕێ وه‌ناوچگن تايبه‌تمه‌ند يا ده‌خاڵه‌ت له نهێننيه‌يل زانيارى و ژيان تايبه‌ت و خراويكردن ده‌رهه‌قيان يا له‌رێ ده‌سدريژى له‌بان خود سيستمه‌گه‌و كه‌ره‌سه‌يلێ ك له‌ڕوێ ناوده‌وڵه‌تييه‌و ده‌سدريژيه‌يل جوراجوور روێداگه‌و وه‌چه‌ن شيوه‌يگه‌و.
ئه‌گه‌ريش ته‌ماشاى بڕياره‌يل جيوه‌جيكرياێ بكه‌يم چ له‌ئاست ناوچه‌يى يا ناوده‌وڵتى و ئاست سيستمه‌يل سزايى ئه‌را ئه‌نجامداين رێ وشوون ده‌رهه‌ق ئه‌و تاوانه‌يله، دوينيم چه‌ن سه‌ختييگ ئه‌ياده تويشمان، ئه‌ويش له‌وه‌ر ئه‌وه‌گ هيمان سيستم زانياريه‌يل چه‌ن په‌رده‌يگ ها بانى و له بواره‌يل جياجيا وه‌تايبه‌ت له‌ڕوێ ياسايى و له‌وه‌ر وه‌كاربردن جياجياى ته‌كنيكه‌يل كۆمپيته‌ر و هووكاره‌يل په‌يوه‌نديكردن تازه و ده‌ركه‌فتن حاڵه‌ت بۆشايى ته‌شريعى ك هه‌وه‌جه وه ده‌خاڵه‌ت پرووژه‌يگ ديرێد ئه‌را روێ وه‌ڕوێ بوينه‌وه‌ى ئى نه‌مته‌يل تازه‌كرياگه له تاوانه‌يل زانيارى، چوينكه يه‌يش بويه هووكار ئه‌را ئه‌وه‌گ ئى كرده‌وه‌يله ك ده‌قيگ نه‌يرن جورميان بكا يا روێ وه‌ڕوێى بدێده‌و بويه هووكار ئه‌نجامداين ئه‌و تاوانه‌يله وه‌بى رخچگن له سزا وئه‌نجامده‌ره‌يلشى له‌و كه‌سه‌يله نين تاوانه‌يل ئاسايى ئه‌نجام بيه‌ن و ئه‌تويه‌نن هويچ كاريگه‌رييگ نه‌يلنه‌جێ له‌ڕێ په‌ره‌سه‌ندن گه‌ورا ك له‌و سيستمه‌يله دوينريه‌ێد وه ئاسانى وه‌كارهاوردنى ك وه‌كاربه‌رى ئه‌تويه‌نێد خه‌زن به‌يانات په‌يوه‌س وه چالاكيه تاوانكاريه‌گه‌ى بكا له ده‌وڵه‌ت و وه‌كارهاردنى له ده‌وڵه‌تيگ تر و ئه‌تويه‌نيديش شوونه‌وار و نيشانه‌يل ئه‌و تاوانه‌يليشه وه ئاسانى نه‌يلێد له‌ڕوێ سيسته‌م سزايى، به‌ڵكو بويه‌سه سيسته‌م ئه‌نجامده‌ر و هووكاره‌يل په‌يجوورييش كه‌مته‌رخه‌ن له لێكۆڵينه‌وه‌ى كاره‌يل خواست.
ئمجا له‌وه‌رگرتن رێ وشوونه‌يل باو له په‌يجوورى له وشكانن و چڕين تومه‌تبار و داناين شاره‌زايه‌يل و تاووتوێكردن شايه‌تكار يه‌يش كاريگتر دريغيكه‌ره له مواكبه‌ى ئه‌و په‌ره‌سه‌ندنه ك بويه‌سه هه‌وه‌جه‌يگ له‌بان ده‌زگايه‌يل دادوه‌رى ك بتويه‌ند مامڵه وه‌ل ده‌زگايه‌يل ئه‌لكترۆنى و زانياريه‌يل بكا ك به‌شدار ئه‌دێ له ره‌سين ئه‌را راسيه‌يل و ئسپاتكردن يا وه‌دروخستن تاوان له‌بان تومه‌تبار.
ئمجا له‌وه‌خت چه‌وديريكردن هه‌وڵه‌يل ناوده‌وڵه‌تى له له‌ناوبردن تاوان ئه‌لكترۆنى، دوينيم ئى روێ وه‌ڕوێ بوينه‌وه وه‌چه‌ن لايگه‌و ئه‌نجام دريا، جاريگ دانه‌ر ده‌س ئه‌كاده مقه‌يه‌تيكردن به‌يانه‌يل په‌يوه‌س وه ژيان تايبه‌ت و جاريگيش مقه‌يه‌تى له ماف دانه‌ر ئه‌كا له‌بان به‌رنامه‌يگ ك داناسه‌ێ و دوياخريش دوينێد هه‌وڵه‌يل چويچيه‌ن له‌باره‌ى ره‌سينه‌و له‌وه‌ر ئه‌وه‌گ ئى ديارده رووسن نيه وه‌ل دابينكردن وه‌سيله‌يليگ ئه‌را له‌ناوبردنى، ئمجا ئه‌گه‌ر كۆمه‌ڵگاى عه‌ره‌بى وه‌گشتى و عراقى وه تايبه‌ت كاريگه‌ر نه‌دێ وه‌شيوه‌يگ ديار وه مه‌ترسى ئى شيوازه‌يله له تاوان، ئه‌وه مه‌ترسى ئى تاوانه‌يله له‌ى كۆمه‌ڵگايه‌يله ئه‌دێده ژينگه‌يگ چالاك وه ئه‌وه‌ك ئاماده نه‌وين سيسته‌م ته‌شريعى و ته‌كنيكى و ئدارى به‌سه ئه‌را روێ وه‌ڕوێ بويه‌وه‌ى وه ئاستيگ خواست وه به‌راورد وه‌ل ده‌وڵه‌ته‌يل جه‌هان ك وه خه‌ته‌رناكترين تاوانه‌يليگ زاننه‌ى و هه‌ر وه‌و خاتريشه پلان و بڕياره‌يل ئه‌را له‌ناوبردنى په‌ره سه‌ند و زياى كرد.