، بيجگه ئه‌وه‌يش كيشه‌ی تايفی و نه‌گونجيان وه‌ل يه‌كترا حاڵه‌تيگ تر ئه‌و شيويانه‌سه ك وه‌رده‌وام بويه‌سه وه‌ربه‌س له‌وه‌رده‌م ريكخستن و يه‌كلاكردنه‌وه‌ی ناكووكيه‌يل ك سه‌ختی فره‌يگ دروس كردگه ئه‌را ئه‌و قه‌واره‌يله ك ئمڕوو تاوانبار كريه‌ن ، وه‌ل ئه‌وه‌يشا رووژ وه رووژ خاڵه‌يل كزو خراويان كه‌فيگه ده‌يشت ، بيگومان يه‌يش چشت راسييگه‌و هويچ گومانيگ له‌تی نيه . وه‌لی ئه‌و سفه‌ته ك زوورم كه‌سايه‌تيه‌يل و سه‌ركرده‌يل حزب جه‌مه‌و كه‌يگ ئه‌وه‌سه ك هه‌وڵ ده‌سه‌وه‌ركردن پايه‌ی كه‌سايه‌تی زياتريگ ده‌يگ له‌پله‌ی ده‌سڵات و ئی كاريشه وه‌ك ئه‌زموونيگ له ناوكووكی و كيشمه‌كيش ئاشكراو دياره .
له‌گشت حاڵه‌تيگ ئه‌وه‌ك ناونی ئی ريكخستن و قه‌واره‌يله جه‌مه‌و كه‌يگ ته‌نيا پرووسه‌يگ كه‌سايه‌تيه له‌وه‌ر خاتر ده‌سڵات وه پله‌ی يه‌كم . ئه‌گه‌ريش له‌يوا نه‌وياتاگ تيكڵايی ئه‌نجام دريا له‌ناونيان ، وه‌لی ئی كاره شكه‌ست هاوردگه‌و ته‌نانه‌ت له‌ناو په‌رله‌مانيش ئاشكراو دياره وه‌شيوه‌يگ ئۆپۆزسيۆن تازه‌يگ .
هه‌ر له‌ی لايه‌نه‌وه حزبه‌يل و سه‌ركرده‌يل تازه‌ی سياسی ك خاوه‌ن حزبن هوير له‌وه نيه‌كه‌ن خوه‌يان بته‌وتره‌و بكه‌ن وه يه‌كڕيزی و سياسه‌ت گونجياگيگ ك له‌بان يه‌ك ريگه جه‌مه‌و بوون و كار دڵنيايی بكه‌ن و سياسه‌ت راسه‌قينه وه‌كار بارن . هه‌ر له‌هه‌مان وه‌ختيش نيه‌تويه‌نن ده‌ور ئۆپۆزسيۆن سه‌ركه‌فتگيگ بووه‌ن ، ئمجا ئه‌وه‌سه هه‌ر سياسه‌تيگ تيه‌رنه كار ته‌نيا له‌وه‌ر به‌رژه‌وندی خوه‌يان و حزبه‌گه‌يانه‌و يه‌يش كيشه‌ی گه‌ورايگه له‌وه‌رده‌م هاووڵاتی و مه‌ردم ك نيه‌تويه‌نن ده‌سنيشان دڵسووز راسه‌قينه‌يان بكه‌ن و هه‌ميشه وه‌رده‌وامی درياسه ئی سياسه‌ت چه‌واشه .
دياره تائيسه ئه‌زموون ساڵه‌يل گوزه‌يشت له‌عراق نه‌ويه‌سه ده‌رسيگ واقعی و خاسيگ ئه‌را دريژه‌داين وه‌كار سياسی سه‌ركه‌فتگ ، چوينكه تائيسه نه‌تويه‌نستنه قانجاز له مه‌عنای ديموكراسی بكه‌ن و له‌خوه‌يانا ديموكراسی وازيكردنيگ شانسيه‌و چاره‌نويس له‌تی هه‌ر كه‌سيگ وه‌گووره‌ی به‌خت خوه‌يه .
ته‌ماشا كه‌يد تا ئيسه له‌عراق ئی حزبه‌گه ناونيتگ له‌و حزبه‌گه بڕيگ و نيه‌تويه‌نن كاره‌يليان وه‌شيوه‌يگ راسه‌قينه ئه‌نجام بيه‌ن و گشت وه‌ختيگ كه‌فتنه‌سه وه‌ر تانه‌ی مه‌ردم هاووڵاتی وزه‌حمه‌ته بتويه‌نن ريكخستنيگ خاس و مه‌نته‌قيانه دروس بكه‌ن و له‌ی خه‌مه ئاسووده بوون و ئی قوناغ نه‌گونجيانه لاوه‌ن و بچنه قوناغيگ تازه‌ی ديموكراسيه‌وه .