له‌به‌شداريكردنيش له‌هه‌ڵوژاردنه‌گه‌ خاسترين جواو بوی ئه‌را گشت ئه‌وانه‌ك خه‌و سه‌ره‌كيان شكه‌ست ملله‌ته‌يل عراقه‌ له‌بونياد ديموكراسی و ژيان هاوبه‌ش سياسی له‌ وڵاته‌گه‌ ، ئمجا ئه‌وه‌يش ك مينيگه‌وه‌ ئه‌را گوزه‌ركردن قوناغه‌ تازه‌گه‌ی عراق و دروسكردن حكوومه‌تيگ خاس و بته‌و ك وه‌شيوه‌يگ گشت پيكهاته‌يل وڵاته‌گه‌ له‌تی به‌شدار بوون ئه‌ركيگه‌و كه‌فيگه‌ بان شان ئه‌و ليسته‌يله‌ ك بردنه‌سه‌وه‌ له‌هه‌ڵوژاردنه‌گه‌ . جاده‌ی عراقيش وه‌جوانی چه‌وديری هه‌ڵويسته‌يل ره‌سمی سه‌ركرده‌ی ئه‌و ليسته‌يله‌ كه‌ن و ئوميديان ئه‌وه‌سه‌ قورتاركردن عراق له‌و قه‌يران سياسيه‌ ك له‌شوون ئازادی وڵاته‌گه‌وه‌ له‌ساڵ ٢٠٠٣ كه‌فته‌سه‌ تی ئامانج يه‌كم ليسته‌يل سه‌ركه‌فتگ بووگ له‌هه‌ڵوژاردنه‌گه‌ی ٧ /٣ / ٢٠١٠ . ئمجا ئه‌وه‌ك په‌يوه‌ندی وه‌هه‌ريم كوردستانيشه‌وه‌ ديريگ شماره‌ی به‌شداری هاووڵاتيه‌يل له‌بان ئاست عراق به‌رزترين ئاست توومار كرد ، دياره‌ ئه‌وه‌يش ئشاره‌تيگه‌ ئه‌را ره‌سين تاك كورد له‌مه‌يدان به‌شداری بڕيار سياسی و باوه‌ڕكردن وه‌ ديموكراسی و متمانه‌ وه‌ حزب و گرووپه‌يل كوردی .

مايه‌ی دڵخوه‌شيه‌ ك گشت ليسته‌يل به‌شداربوی هه‌رێم كوردستان ئه‌را هه‌ڵوژاردنه‌گه‌ی ئه‌نجوومه‌ن نوێنه‌ره‌يل عراق تارادی فره‌خاسيگ رازی بوين له‌و شماره‌ ده‌نگه‌ ك هاوردنه‌ی ده‌س و هه‌ر يه‌كيگ له‌ليان ئه‌وه‌نه‌ی سه‌نگ خوه‌ی كورسی له‌په‌رله‌مان عراق مسۆگه‌ر كرد . ده‌سه‌وه‌ركردن شماره‌يگ كورسييش له‌لايه‌ن هيزه‌يل ئۆپۆزسيۆن كورديشه‌وه‌ هووكاره‌ سه‌ره‌كيه‌گه‌ی چووگه‌وه‌ ئه‌را ئه‌و كه‌ش و هه‌وای ئازادی و ديموكراسيه‌ ك ده‌سڵات كوردی له‌چه‌ن ساڵ گوزه‌يشت ئه‌را گشت حزب وگرووپه‌يل كوردی دابينی كرد و يه‌يش يه‌كيگ بويه‌ له‌ئامانجه‌يل ستراتيجی حكوومه‌ته‌يل يه‌ك له‌شوون يه‌ك هه‌رێم كوردستان . له‌بان ئاست به‌رژه‌وه‌ندی نه‌ته‌وه‌يی هويچ گومانيگ له‌وه‌ نيه‌ ك فره‌يی شماره‌ی كورسيه‌يل له‌په‌رله‌مان عراق ئه‌را كورد و هه‌رێم كوردستان گرينگ ياموهمه‌ ، وه‌لی كام لايه‌ن كوردستانی شماره‌ی كورسيه‌يلی فره‌تره‌ دياره‌ ئه‌وه‌ په‌يوه‌ندی وه‌ خه‌بات و تاريخ حزبه‌يله‌وه‌ ديريگ ك هه‌ر ليستيگ و وه‌گووره‌ی خزمه‌ت و هه‌وڵ خوه‌ی متمانه‌ی مه‌ردم وه‌رگرتگه‌ . وه‌لی خاڵ فره‌ گرينگ ياموهم وه‌لای رای گشتی كوردستانيه‌وه‌ ئه‌وه‌سه‌ ك گشت ئه‌و ليسته‌يل كورديه‌ له‌هه‌ڵوژاردنه‌گه‌ی ٧ / ٣ / ٢٠١٠ی ئه‌نجوومه‌ن نوێنه‌ره‌يل عراق ك كورسی هاوردنه‌سه‌ ده‌س گشتيان له‌ژير يه‌ك سيه‌ماڵ كورده‌واری گرده‌و بوون ، ئه‌ويش له‌وه‌ر خاتر ئه‌وه‌ك گشت لايگ هاوكار وده‌سميه‌تده‌ر بوون ئه‌را مقه‌يه‌تيكردن و مسۆگه‌ركردن هه‌ق و ده‌سكه‌فته‌يل ملله‌ته‌گه‌يان له‌قوناغ تازه‌ی وڵاته‌گه‌يان . ئمجا ئه‌وانه‌يش ك پۆست سه‌رۆكايه‌تی كوومار ئه‌را لايه‌نه‌يل كوردی وه‌ خه‌ت قرمز زانن با له‌خوه‌يان بپرسن له‌ده‌وره‌ی گوزه‌يشت ك سه‌رۆك كوومار كورد بويه‌ له‌كام هه‌ڵويستی جياوازی له‌ناونی پيكهاته‌يل عراق كردگه‌ ؟ يه‌يش له‌وه‌ختيگ كورد دڵنياسه‌ له‌وه‌ك پاداگرتن عه‌ره‌ب عراق له‌ وه‌رنه‌گرتنه‌وه‌ی ئی پۆسته‌ ئه‌را كه‌سايه‌تييگ كوردی ئه‌را ئه‌وه‌سه‌ ك پۆسته‌گه‌ دژ كورد و هه‌رێم كوردستان بارنه‌ كار . ئمجا ئی جووره‌ قسه‌يليگ ره‌سمی يا ناڕه‌سمی شۆڤێنی و تونڕه‌وه‌يل هويچ قيمه‌تيگ سياسی ئه‌ڕای دانيه‌نريه‌يگ له‌لايه‌ن ملله‌ت كوردستانه‌وه‌و ئه‌وانه‌ ئه‌و قسه‌يله‌ كه‌ن خاس زانن گشت چشتگ وه‌گووره‌ی ده‌ستوور بايه‌سه‌ ئه‌نجام بدريه‌يگ له‌چوارچيوه‌ی عراق .