دونيا ، ناو ته‌واوی ( ساتيا راجو ناريانا)س ، وه مه‌عنای (به‌هه‌يشت راسه‌قينه) ، ئی ناويشه ناو يه‌كيگ بويه له فه‌يله‌سووفه‌يل كويه‌ن هندستان .
(سای بابا) له‌دايگ و باوگيگ جفتيار كه‌مده‌س و له‌يه‌كيگ له‌ئاوايه‌يل هندستان وه‌ناو( بوتاباراتی) له‌دايگ بويه ، باوگی ناوی (راجو)ه‌و دايگيشی ناوی (ئيشوارا)س ، دو براو خوه‌يشگيگ تر داشتگه‌و ئيسه هويچكاميان له‌ژيان نه‌مه‌ندنه . سای بابا هه‌ر له‌مناڵيه‌وه كرامه‌ته‌يل فره‌يگ له‌لی ده‌ركه‌فتگه وه‌ك : ماڵيبوين حه‌يوانه‌يل ئه‌ڕای و ژنه‌فتن ئاواز و مۆسيقا وه‌بی وجوود سه‌رچه‌وه‌يگ دياريكرياگ .
هه‌ردوگ رووژنامه‌نويس وه‌ناوبانگ ئوسترالی (كشتور پرۆفيسۆر)و (ئه‌رخا) له‌ساڵ ١٩٧١ له‌باوه‌ت سای بابا چشته‌يل فره‌يگ نويسانه ، هه‌ر له‌و وه‌خته‌وه ك (سای بابا) چيه‌سه مه‌دره‌سه‌ی سه‌ره‌تايی و تواناو به‌هره‌يی له مه‌يدانه‌يل دراماو مۆسيقا له‌لی ده‌ركه‌فتگه ، چه‌ن شعر و گوورانی سۆفيانه‌يگيش له‌و وه‌خته ئه‌را مه‌ردم ئاوايه‌گه‌ی خوه‌يان نويساگه ك شيوازيگ سۆفيگه‌ری وه‌پيه‌وه ديار بوی . ئی كه‌سايه‌تيه سووز و به‌زه‌يی فره‌يگ ديريگ ئه‌را ئه‌و كه‌سه‌يله ك كه‌مئه‌ندامن و له‌خوه‌شيه‌يل ژيان بيبه‌شن ، وه‌ل ئه‌وه‌يشا هويچ خوسه‌و كينه‌تيگيش له‌دڵی نيه‌و ئازار هويچ گيانداريگيش نيه‌يگ .
بۆتاباراتی ، ئه‌و ئاوايی سه‌ره‌تاييه ك (ساتيا) له‌تی له‌دايگ بويه ، تا ئيسه‌يش هه‌ر له‌ورا ژيه‌يگ ، ئی شوونه كوومه‌ڵگايگ جه‌مه‌وكرياگ گريگه خوه‌ی وه‌ل خه‌تيگ شه‌مه‌نده‌فه‌ر يا قتار و شوون تايبه‌ت ئه‌را وچانداين ئه‌و كه‌سه‌يله ك سه‌ردان ئه‌و كوومه‌ڵگا كه‌ن ك ساتيا ناوی ناگه (ماڵ ئاشتی) ، ئه‌يه بيجگه ئه‌وه‌ك له‌گشت شوونيگ جه‌هانه‌وه مه‌ردم ئه‌راسه‌ردان (سای بابا) روی له‌لی كه‌ن ، له‌وه‌ر ئه‌وه زوورم وه‌خته‌يل خوه‌ی له‌ورا به‌يگه سه‌ر ، وه‌لی له تاوسانان چووگه ناوچه‌ی ( بنگلور بريندڤان) .
سای بابا ، سێ په‌رسگای گه‌ورای هندۆسی دروسكردگه ، يه‌كميان له‌شار (بومبای)و دويميان له(ساتيام)و سێيميش له (حه‌يده‌ر ئاباد) . به‌رنامه‌ی رووژانه‌ی سای بابا وه نماز شه‌وه‌كی ده‌س كه‌يگه‌پی ك ناسرياگه وه نماز (ئوم) ، دوياخر خوتبه‌يگ پيشكه‌ش ئه‌كاو دويای ئه‌وه‌يش چه‌ن سرووديگ دينی پيشكه‌ش كريه‌يگ و له‌شوون ئه‌وه‌يش ده‌س كه‌يگه ديدار وه‌ل كه‌سايه‌تييگ دينی وه‌تايبه‌ت له مانگه‌يل ئوكتۆبه‌ر و ته‌شرين دويم .
له‌شوون وه‌ڕيه‌وه‌چگن ئی ری وڕه‌سمه‌يله ، سای بابا ، گه‌رديگه ئاماده‌بويه‌يلا و ئه‌و نامه‌يله وه‌رگريگ ك ئه‌ڕای نويسانه‌سه‌ی و هه‌ر كه‌سيگ و كيشه‌ی خوه‌ی له‌تی خه‌يگه‌ڕوی ، فره‌جاريش قه‌يريگ كه‌رامه‌ت له‌ی پياگه دوينريه‌يگ وه‌ك خاسه‌وكردن كه‌مئه‌ندامه‌يل يا به‌خشين خوڵيگ ك له‌ناو ده‌سيه‌وه تيه‌يگه ده‌يشت ئه‌را شفاو ده‌يگه‌ی ئه‌و كه‌سه‌يله ك ئه‌را نه‌خوه‌شی چنه لای و به‌عزه جاريگيش خوه‌ی چه‌ن كه‌سيگ چڕيگ ئه‌را ئه‌وه‌ك دوياخر ديدار وه‌ليا بكه‌ن وه‌مه‌به‌س پيشكه‌شكردن رينمايی رووحی و به‌خشين زانياری و قه‌يريگ ملوانك و كلكه‌وانه‌يش وه‌دياری ده‌يگه پيان . ئمجا له‌ساڵه‌يل (١٩٦٠)ه‌وه تائيسه وڵاته‌يل رووژئاوا كار وه‌ئامووژگاری و رينمايه‌يل ئی رابه‌ر رووحيه كه‌ن . سای بابا له‌ژيان خوه‌ی ته‌نيا يه‌كجار له‌وڵاته‌گه‌ی خوه‌ی ده‌رچيه ، ك ئه‌ويش چيه‌سه كينياو له‌ورايش په‌يڕه‌وكه‌ره‌يل فره‌يگ ديريگ و چه‌ن مه‌دره‌سه‌يگيش وه‌ناويه‌وه هه‌س ئه‌را هووكاره‌كردن مناڵه‌يل و بيجگه ئه‌وه‌يش ئه‌را گه‌ورايه‌يليش مه‌دره‌سه‌ی دينی تايبه‌ت هه‌س ئه‌را خوه‌ندن رينمايه‌يل سای بابا .