جموجویل قه‌یریگ له كه‌سایه‌تیه‌یل وه‌ناوبانگ ئسلامى جویر (حه‌سه‌ن ئه‌لبه‌سرى، ئبراهیم كوڕ ئه‌دهه‌م، بالویل داناو.......هتد).
بیگومان هویركردنه‌وه‌ى ئاده‌میزاد له كردگار و گه‌ردین له‌شوون فه‌لسه‌فه، له‌یوا كردگه ك سه‌ره‌تا جووریگ له‌ئازادى سه‌روه‌خوه‌یى دژ ده‌سڵات داشتووگ، ئمجا له‌یوا دیاره دویاخر یه‌كه‌و گرتنه‌و (ته‌ریقه‌ت) پیكهاوردنه جویر ئه‌وه‌ك له‌تاریخ سۆفێزم ئسلامى ده‌ركه‌فیگ ، وه‌لى تویه‌نیم بویشیم گشت فه‌لسه‌فه‌یگ نه‌ویه‌سه ته‌ریقه‌ت. ئه‌وه بوى كه‌مه كه‌مه شێخه‌یل ته‌ریقه‌تیش ناوبانگى ده‌ركردن و ڕابه‌رایه‌تى جموجویل وه‌رده‌وام ئه‌و ڕیچه‌ڵه‌كه كردیان و خوه‌ندگایه‌یل تایبه‌تیگ واز كردیان ئه‌را په‌خشه‌وكردن زانست و ته‌ریقه‌ى ئسلامى جویر(ته‌ریقه‌ى به‌ستامى، ته‌ریقه‌ى جونه‌یدى، ته‌ریقه‌ى قادرى، ته‌ریقه‌ى رفاعى)و تاڕه‌سیه ته‌ریقه‌ى نه‌قشبه‌ندى و ته‌ریقه‌ى كه‌سنه‌زانى و.........هتد.
پرسیاره‌گه له‌یرا ئه‌وه‌سه ك فه‌لسه‌فه‌و ته‌ریقه‌ت وه دریژایى عومرى چ خزمه‌تیگ ره‌سانه كورد؟ له‌یرا بایه‌سه به‌راورد یا مقارنه‌ى ئه‌و سه‌رده‌مه وه‌ل ئیسه‌یا بكه‌یم له‌روى فكر و ڕووشنهویریه‌وه، تا بزانیم مه‌سه‌له‌ى پیشكه‌فتن كورد له‌كوورا گیرخوارد.
ئیمه زانیم هه‌ر جموجویلیگ ئامانجیگ داشتگه، هه‌ر فه‌لسه‌فه‌یگیش شیه‌وكردنیگ دیریگ . ئه‌وسا مه‌ردم له‌هویر ئه‌وه نه‌ویه ك ریڕه‌و نه‌ته‌وایه‌تى بووه‌نه مه‌ژگ ئاده‌میزادو ته‌نیا ڕى ته‌ریقه‌ت و ئسلامیه‌ت گرتنه‌سه‌وه‌ر، یه‌یش وه‌و مه‌عنا ك ته‌نیا ئامانجیان ئه‌وه بویه مقه‌یه‌تى له دینه‌گه بكه‌ن و هویر ئاینده نه‌كردنه‌و نه‌خشه‌یگ ستراتیجى و سه‌ركه‌فتگ وه‌پیان نه‌ویه ئه‌را دویاڕووژ، هه‌ر له‌وه‌ر ئه‌وه‌یش دوینید له‌ڕوى خزمه‌ته‌وه وه‌ملله‌ت كورد كه‌م و كوڕى فره‌یگ ده‌ركه‌فتگه‌و دى كه‌مه كه‌مه فه‌لسه‌فه‌و ته‌ریقه‌تیان ڕوى له‌كزى كردگه، وه‌لى وه‌پاكى و بى غه‌ل وغه‌ش ڕه‌فتار كردنه. بیگومان ته‌ریقه‌ت خوه‌ى له‌خوه‌ى رابه‌رایه‌تیكردن و ڕینماییكردنه، وه‌لى زیاتر مه‌یل سۆفێزم و ده‌وریشانه په‌یڕه‌و كردیان و دى وه‌و جووره خزمه‌ته‌گه‌یان ته‌نیا له‌ڕوى دینه‌وه بویه نه‌ك خاك و نیشتمان و ئاینده‌ى ملله‌ت.