جیاجیایگن و له ده‌ورگرد هه‌رێمیه‌وه هاتنه، و باسكردن نه‌ته‌وه‌یگ تاكه‌ڕه‌گه‌ز و تاكه‌خوین خه‌یاڵ مه‌حاڵیگه ك له‌وه‌رده‌م كه‌مترین په‌یجووریكردن كوومه‌ڵاتیه وه‌رگه نیه‌گرى.
ئه‌و زوڵم و زووریشه ك تویش كورد فه‌یلى هاتیه، له ڕیڕه‌و شۆڤینییگ سه‌رچه‌وه‌گرتیه له‌لایه‌ن هه‌ڵگره‌یل قه‌ڵه‌مه‌یل (چه‌فت) ك پووشاك پویتریاییگ پووشانه وه‌سف كورد فه‌یلى وه (كورده‌یلیگ له ڕه‌گه‌زه‌و ئیرانى) كه‌ید.
نوێنه‌ر وه‌رین په‌رله‌مان و سه‌ركرده‌ى كوردستانى عبدالخالق زه‌نگه‌نه وه‌ى شیوه باس ئى باوه‌ته كه‌ید و له په‌یوه‌ندییگى وه‌ل ماڵپه‌ڕ شه‌فه‌ق ئویشید:" وه‌داخه‌وه هیمان جه‌ور ئى ڕیڕه‌و چه‌فته كیشیمن؛ ك گوزارش له هه‌ڵوێست یا موقف شۆڤینییگ كه‌ید له لایه‌ن پاشمه‌نییه‌یل ڕژیم وه‌رین(ك به‌شیگ بوین له مه‌كینه میدیاییگه‌ى له عیراق و وڵاته‌یل عه‌ره‌بى).
له باوه‌ت هه‌وڵ و ته‌قه‌لاى سیاسى و میدیایى كوردستانى چه‌وه‌ڕیكریاى ئه‌را كێشه‌ى كورده‌یل فه‌یلى زه‌نگه‌نه جه‌خت له‌بان ئه‌وه‌كرد ك :" بایه‌سه ئاڕاسته‌ى په‌یا بكریه‌ید ئه‌را ڕاسه‌وكردن قانوونه‌یل و بڕیاره‌یل سیاسى له‌لایه‌ن حكوومه‌ت و په‌رله‌مان فیدرالى ئه‌را وه‌شوون كه‌فتن چاره‌نویس بى شوون ونوینكریایه‌یل كورد فه‌یلى، و ئى دۆسیه بایه‌سه وه جاڕداین حكوومییگ ته‌واوبكریه‌ید، ك ئه‌وه به‌رقه‌رار بكه‌ید ك كورده‌یل فه‌یلى هاووڵاتیه‌یلیگ عیراقیین بى هویچ شه‌ك و گومانیگ".
ئه‌ندام وه‌رین مه‌كته‌ب سیاسى یه‌كێتى نیشتمانى كوردستان عادل موراد له په‌یوه‌ندییگى وه‌ل ماڵپه‌ڕ شه‌فه‌ق ئویشى:" قسه‌و وباس و چه‌پى چه‌واشه‌كارى میدیایى له‌باوه‌ت ئیرانیه‌ت كورده‌یل فه‌یلى سیماى مه‌یل ڕه‌گه‌زپه‌رستى پیسیگ وه‌پیه‌و زه‌ق و دیاره چوینكه هویچ جیاوازییگ له‌ناوبه‌ین كورده‌یل فه‌یلى و كورده‌یل سۆرانى و بادینانى نیه، چوینكه گشتیان به‌شیگن له ملله‌ت كورد".
له‌باوه‌ت هه‌ڵوێست میدیاى عه‌ره‌بى له كێشه‌ى كورده‌یل فه‌یلى عادل موراد ئه‌وه ئاشكراكرد ك :" له ساڵه‌یل شه‌س و هه‌فتاى سه‌ده‌ى وه‌رین میدیاكاره‌یل عه‌ره‌ب كورده‌یل له‌یه‌كترى جیاوه نه‌كردیان وه‌لى دویاى شه‌پۆل یا مه‌وجه‌ى ڕه‌گه‌زپه‌رستى له‌لایه‌ن بڕیگ نویسه‌ر و میدیاكار عیراقى په‌یوه‌ند وه ڕژیمه‌یل ڕه‌گه‌زپه‌رست ده‌سكردنه به‌شه‌وكردن كورد ئه‌را ئێزیدى(ك توومه‌تباریان وه‌شه‌یتان په‌رستن كردیان) و شه‌به‌ك و سۆران و بادینان وه مه‌مه‌ر كزه‌وكردن جمشت رزگاریخواز كوردى و كوتكوته‌وكردن ڕووڵه‌یلى، وه‌لى له هه‌مان وه‌خت بایه‌سه ستایش ئه‌و خاوه‌ن قه‌ڵه‌مه‌یل ئه‌سڵمه‌نه بكه‌یمن له‌و نویسه‌ره‌یل عه‌ره‌به ك وه‌گشت قه‌وه‌تیگه‌و وه‌ل ملله‌ت كورده‌و وسیان و پشتگیرى له‌لى كردن له كیچشه ڕه‌واگه‌ى".
میدیاكار دكتۆر كازم مقدادى له په‌یوه‌ندییگى وه‌ل ماڵپه‌ڕ شه‌فه‌ق ئه‌وه ئاشكراكرد :" هه‌ر سووكایه‌تى كردن و گه‌نییگ وه‌هه‌ق كه‌رده‌یل فه‌یلى مه‌عناى سووكایه‌تى كردن و گه‌نییه وه‌هه‌ق ملله‌ت عیراق گشتى و وه‌ختى مه‌هانه‌ى ڕیشگه‌یل ڕه‌گه‌ز لایه‌نیگ وه‌ته‌نیا وه‌كار تیه‌ریه‌ید بى ئه‌وه‌گ هه‌مان ڕه‌فتار وه‌ل ئه‌و چین و نه‌ته‌وه‌گانتره‌و ئه‌نجام بیه‌ید، ئه‌یه وه ئاماژه‌یگه ئه‌را ڕه‌گه‌زپه‌رستى و تایه‌فه‌گه‌رى ، و ئى قسه‌ى هویچ و پویچه ك بڕیگ كه‌س و ڕیكخریاى هه‌میشه ئویشنه‌وه‌ى بویه‌سه به‌شیگ له گوزه‌یشته، و ئمڕوو عیراق موڵك سسته‌م یا ڕژیم سیاسییگ نیه ، به‌ڵكوو ئه‌را گشت عیراقیىیله".
مقدادى پرسیاریش كرد ك:" وه‌رده‌وامبوین ئى كه‌سه‌یله له‌و ڕیڕه‌وه له میدیا ، وه‌باوه‌ڕ من له‌وه‌وه هاتیه ك یانه مینه‌ى به‌ژه‌وه‌ندى خود خوه‌یان و ته‌ره‌فداره‌یلیان كه‌ن، وه‌رده‌وامبوینیشى كاره‌ساتیگ راسكانیه ، بایه‌سه ڕاى گشتى عیراقى ئى هه‌وڵه‌یله بكه‌یده په‌ن و وه‌ل برایه‌یل كورد فه‌یلیه‌و بووسیه‌ى".
حیدر قوتبى مامۆستا له كۆلیژ ره‌سانن یا ئعلام له زانكۆى به‌غدا له په‌یوه‌ندییگى وه‌ل ماڵپه‌ڕ شه‌فه‌ق ئویشى: ئیمه پیشبینى یا توقع ئه‌وه نه‌كردیمن ك چه‌ن كه‌س و لایه‌نیگ وه‌رده‌وام بوون له وه‌كارهاوردن وتار شۆڤینى و ڕه‌گه‌زپه‌رستى له مامله‌ت كردنیان وه‌ل كێشه‌ى كورد فه‌یلى وه‌لى دیاره ئه‌وانه‌گ له باوه‌ش ڕژیم خوینڕژ به‌عسى نیه‌تویه‌نن له ڕیڕه‌وه‌گه‌ى واز بارن".
قوتبى داوا له لایه‌نه‌یل چاودێریكه‌ر و قه‌زایى كرد ك ڕوى وه‌ڕوى ئى هه‌ڵمه‌ته‌یل میدیایى زاڵمانه بووسیه‌ن چوینكه یانه گاڵ ده‌ن و هه‌وڵ ده‌ن ئاگر فتنه‌ى نه‌ته‌وه‌یى و تایه‌فى بكه‌نه‌وه و داوا له‌و لایه‌نه‌یله كرد ك سه‌رپه‌رشتیكردن ماف ئاده‌میزاد كردنه‌سه ئه‌رك خوه‌یان ، له ڕوى ئى شیوه‌یل هه‌رزانه بووسن ك ژیان مه‌ردم خه‌نه مه‌ترسى".