له پشت ده‌روه‌چه‌گه ديرم تماشايان كه‌م... چمانێ ئی ديمه‌نه ئاشناس ئه‌رام... پرزه‌يل واران چه خه‌نه‌و هويرم؟ رووژه‌يل سه‌خت ژيان؟ نه!!! خه‌م و خوسه‌يل داڵگم؟ نه!!! ره‌نج و زه‌حمه‌ته‌يل باوگم؟ يه‌يش نه!!! ئارزووه‌يل مه‌حاڵم؟ نه!نه! ...ئيسه كه‌فته هويرم!! جياوازی ناونی ئايمه‌يل... بيلا هويره‌و بكه‌م و بزانم ئايمه‌يل چه‌نيگ وه‌ل يه‌كا فه‌رق ديرن؟
يه‌كيگ خه‌وی تيه‌ێد و ئه‌را خه‌و گوڵه‌جييگ نه‌ێرێ!
يه‌كيگيش لوقمه‌يگ نان ئه‌را سوو نه‌ێرێ!
يه‌كيگيش نيشێ پويله‌گانی شمارێ، تواێ بزانێ دێرێ يا نه‌ێرێ..!
يه‌كيگ ئه‌وقه‌ره ماڵيان گه‌وراس گوم بوود له‌تێ! يه‌كيگيش خانگه‌گه‌ی ئه‌را گشتيان جی نه‌ێرێ..
باوگ تواێد ئه‌را دويه‌ته‌ێ وه‌يلكان بسينێ..هه‌ڵيشيوژنێ وه‌لی پويله‌گه‌ی نه‌ێرێ!
يه‌كيگ ده‌فته‌ره‌گه‌ی پڕی له ره‌سم و خه‌تخه‌تيه، ئه‌وه‌كه‌يش قه‌ڵه‌ميگ ئه‌را نويسانن نه‌ێرێ...!!!
يه‌كيگ ڤيللای كنار ده‌ريايان كوشكه وه‌لی، يه‌كيگ ته‌نانه‌ت له‌ناو خه‌و وخياڵيشی ئاو ده‌ريا نه‌ێرێ...
يه‌كيگ ئه‌را بازى تووپ تواێ، داڵگی ئويشێ يانه گرانن، ئيره له‌لی نه‌ێرێ...
يه‌كيگ رووژ له داڵگبوينی ميوانی ديرێ، گشت تيه‌ن...يه‌كيگيش رووژشمار ئه‌را خه‌تداين رووژه‌يل نه‌ێرێ...!
يه‌كيگ هه‌فته‌يگ جارێ دكتۆره‌گه‌يان تيه‌ێد ئه‌را ماڵيان..له‌شوينيگ تر يه‌كيگ ديرێ مرێ، خه‌رج داك و ده‌رمان نه‌ێرێ...
يه‌ێ كه‌سيگ ئمزاگه‌ی 1000ئنسان تيه‌رزێ، يه‌كيگيش له‌شوون يه‌ك عومر ره‌نج و زه‌حمه‌ت، جارێ ئمزا نه‌ێرێ...
له مه‌دره‌سه باس چشتيگ بوود ك گشت ديرنه‌ێ...يه‌كيگيش پرسێ؟ باوگ م ئه‌را نه‌ێرێ؟
يه‌كيگ دووس ديرێ ته‌ماشای كارتۆن بكه‌ێد، وه‌لی له‌كوو.!؟ يه‌كيگيش ئه‌وقه‌ره ته‌ماشا كردێه، مه‌يل ته‌ماشا نه‌ێرێ.!!
يه‌كيگ پويل نه‌ێرێ تا دو رووژ بچوود ئه‌را شاره‌گه‌ی خوه‌ی...يه‌كيگيش تاقه‌ت ڤيزا كوتان ئه‌را سه‌فه‌ر نه‌ێرێ..!
يه‌كيگ ها فكر ئاخرين رێجيمه‌يل خوراكی...يه‌كيگيش ئه‌وقه‌ره شه‌و و رووژ نان نه‌خوارديه هاز نه‌ێرێ..!
يه‌كيگ ئه‌وقه‌ره ماڵيان گه‌رمه له هه‌ناس كه‌فێ...يه‌كيگيش ئه‌را سه‌رمای ده‌سه‌يلی هه‌ناسيگ گه‌رم نه‌ێرێ..!
كه‌فتمه هوير ئه‌و راسی تيه‌ڵ يه‌كم ساڵ مه‌دره‌سه‌مه، دارا فره چشته‌يل ديرێ وه‌لی سارا نه‌ێرێ.
چه‌نيگی بنويسم؟ يه‌كيگ و دووان و ده و بيس و هزار نيه!!! ئه‌گه‌ر بتويه‌نم پرزه‌يل واران بشمارم، ئه‌و وه‌خته شايه‌د بتويه‌نم گشت فه‌رق ناونی ئايمه‌يليش بنويسم، وه‌لی خودا وه‌هه‌ركه‌سيگ هه‌رچشتيگ دڵی توای بيه‌ێد، گشت چشتيگ ها ده‌س خوه‌ی، هويچ په‌يوه‌ندييگ وه ئاراس و نويساننی نه‌ێرێ؛ كه‌فتمه هوير قسه‌گه‌ی داڵگم، داێمه ئويشێ:"خودايا، شوكرمه ئه‌و بازاڕده، وه‌و سڕ كاروبارده! وه‌يه‌كی ده‌يد گه‌نج و وه يه‌كيگيش ده‌يد ڕه‌نج". يه‌ێ چشت تريش وتيا: "خودايا..!ئه‌وه‌گ نه‌ێرێ بيه‌پی و ئه‌وه‌گيش ديرێ له‌لی نه‌سين".