ئه‌ویش ئه‌وه بیوك ناو یه‌كگرتگیگ ئه‌رامان له‌ده‌ستورهه‌ریم كوردستان چه‌سپانگه ك ئه‌ویش ( كلدانی سریانی ئاشوری ) ه وهه‌میش گونجانن ئوتونومی ئه‌را ئی به‌شه له‌مله‌ت كوردستان له‌ده‌ستورهه‌ریم ده‌سكه‌فت تاریخی گه‌ورایگه ویه‌یش وه‌پشتگیری سه‌رۆكایه‌تی هه‌رێم وته‌قالای روله‌یل وه‌فادارمله‌ته‌گه‌مان وه‌دی هاتگه تا بنه‌وای بته‌ویگ ئه‌را مال كلدوئاشوری سریانی بنه‌یگ تا له‌وه‌راوه‌ر ره‌شه‌بای ناحه‌زه‌یل ونه‌یاره‌یل مله‌ته‌گه‌مان بوسیه‌یگ ك له‌هه‌رده‌رفه‌ت یافورسه‌تیگ ئه‌را له‌یه‌ك چه‌كانن لاشه‌ی ئی مله‌ته ئستفاده كه‌ن . گه‌وهه‌رله‌دریژه‌ی باوه‌ته‌گه‌ی نیوساس : سه‌رۆك بارزانی وسه‌روك حكومه‌ت هه‌رێم ته‌قالای فه‌ره‌یگ كردنه ئه‌را چه‌سپانن دیموكراسی وپاریزگاری له حقوق ئنسان وچه‌سپانن ماف یاحه‌ق كه‌مه نه‌ته‌وه‌ییه‌گان هه‌رێم كوردستان له‌وانه‌یش حه‌ق كلدانی وسریانی وئاشوری ؛ هه‌رێم كوردستان هه‌م له گوزه‌یشته وهه‌م ئیسه‌یش نمونه‌ی خاسیگ بیوه ئه‌را ژیان هاوبه‌ش وبرایانه وپه‌خشه‌وكردن روشنهیوری یه‌كتروه‌خشین له‌ناونی په‌یره‌و ئاینه‌یل ونه‌ته‌وه‌یل و وه‌هیوچ كه‌س یالایه‌نیگ ری نه‌یاگه كیشمه‌كیش وململانی ئاینی ونه‌ته‌وه‌یی بنه‌یگه‌و وله‌شیون رمیان به‌عس وده‌س وه‌پی كردن كوشتارتایفی هه‌رێم كوردستان ئه‌منترین شیون ئه‌رابراوخوه‌شكه‌یل مه‌سیحی بیوه وقاپیه‌یل خوه‌ی له‌ریوئی به‌شه له‌مله‌ت عراق وازهیشتگه وتائمرویش خزمه‌تیان كه‌یگ . به‌لی وه‌سوپاسه‌وحكومه‌ت هه‌رێم كوردستان تائه‌وره‌گ له‌ده‌سی هاتگه خزمه‌ت وه‌هاولاتیه‌یل مه‌سیحی وكلدانی وئاشوری كردگه‌و ژماره‌ی فه‌ره‌یگیان له دایره‌و ده‌زگا حكومیه‌گان دامه‌زرانگه و ئه‌رابریگیان كومه‌ك مانگانه بریه‌سه‌و زیاترله سه‌د ئاوای ئه‌رایان ئاوه‌دانه‌و كردگه . گه‌وهه‌ریوحنا له‌به‌شیگترباوه‌ته‌گه‌ی نیوساس له‌وه‌ختیگ ته‌قالایل خه‌یرخوازانه‌ی ئه‌نجام دریاگ ئه‌راچه‌سپانن حقوق نه‌ته‌وه‌ییمان له‌وانه‌یش دامه‌زرانن ناوچه‌ی ئوتونومی یاحوكم زاتی به‌رزنرخنیم بایه‌د له سه‌رۆكایه‌تی هه‌رێم وحكومه‌ت وپه‌رله‌مانه‌گه‌ی ته‌شه‌كوربكه‌یم ك داخوازیه‌یل نه‌ته‌وه‌ییمان له‌ده‌ستورهه‌ریم چه‌سپانگه ویه‌یش وه‌رچه‌رخان گرنگیگه له پیشخستن كیشه‌ی نه‌ته‌وه‌ییمان و یه‌یش ئه‌گه‌رنیشانه‌ی چشتیگ بووگ ؛ نیشانه‌ی ریبازدروس وشیوازدیموكراسی سه‌ركردایه‌تی وسه‌روكایه‌تی حكومه‌ت هه‌رێمه له ره‌فتار وه‌ل داخوازی كه‌مه نه‌ته‌وایه‌تیه‌گان وپاریزگاری له مافه‌یلیان وه‌گوره‌ی ده‌ستور. چه‌سپانن ناو یه‌كگرتگی ئه‌را كه‌مایه‌تیه ئاینیه‌گان له‌ده‌ستورهه‌ریم كوردستان ؛ ته‌نیا سه‌ركه‌فتن ئراده‌ی مله‌ته‌گه‌مان یا ریوداگیگ ئاسایی یا ده‌سكه‌فتیگ میژووی نیه ؛ به‌لكم له‌دالگ بیون تازه‌یگه ئه‌را مله‌تیگ ك تیوش كاره‌سات وگرفته‌یل فه‌ره‌یگ له ده‌س رژیمه‌یل گوزه‌یشته عراق هاتگه ؛ به‌لی ئی گام ئنسانی سه‌ركردایه‌تی كورده زله‌ی توند مله‌تیگ یه‌كگرتگه له‌ریو ئه‌وانه‌گ تادیوه‌كه ده‌س دریژی كردیانه ئه‌رابان حه‌ق مله‌ته‌یل عراق . چه‌سپانن ناو یه‌كگرتگی ئه‌را كلدوئاشوریه‌یل له ده‌ستورهه‌ریم كوردستان سه‌ركه‌فتنیگه ئه‌را سه‌رجه‌م پیكهاته‌یل مله‌ت عراق وسه‌ركه‌فتنه ئه‌را گشت روله‌یل وه‌فادارمله‌ت عراقه وئه‌را ئه‌وه‌گ ئی ده‌سكه‌فته نه‌وگه هوكاریگ ئه‌را نشونمای روح ره‌گه‌زپه‌ره‌سی ونیشانداین زوربازوو له‌یه‌كتری بایه‌د سه‌رجه‌م روله‌یل كلدوئاشوری وسریانی چ جورشه‌خس وچ جورحزب ولایه‌ن و پیاوه‌یل ئاینی یه‌كبگرن تا وه‌یه‌كه‌و ئه‌را پیشخستن كیشه‌ی مله‌ته‌گه‌مان كاربكه‌ن وگشت ئه‌وگرفته‌یله چاره‌سه‌ربكه‌یم ك له ساله‌یل ساله تیوشیان هاتیمه وهه‌میش كوتایی ئه‌و زولم وسته‌مه بووگ ك چه‌ندین سه‌ده‌س له‌لیمان كریه‌ی . گه‌وهه‌ر یوحه‌نا له‌كوتایی باوه‌ته‌گه‌ی نیوساس : وه‌بی گومان چه‌سپانن مافه‌یلمان له‌ده‌ستورهه‌ریم كوردستان خوه‌شالی خستگه‌سه دل گشت روله‌یلمان وئاینده‌ی خاسیگ ئه‌رایان دیاری كردگه‌و یه‌یش له‌وه‌ختیگه ك ئیمه وه‌ل هه‌ره‌شه‌یل گه‌ورایگ له سه‌رزه‌مین باوگ وباپیره‌یل ریوه‌ریوبیومنه ؛ وه‌لی یه وه‌مه‌عنای ئه‌وه نیه ك ته‌نیا وه‌وه دلخوه‌ش بكه‌یم ك برایه‌یل كورد دانه‌سه‌ی پیمان به‌لكم بایه‌د له‌ی ده‌سكه‌فته سوود بوه‌یم وته‌قالای زیاتریگ بكه‌یم ئه‌را یه‌كخستن په‌یام سیاسیمان وله حكومه‌ت مه‌ركه‌زییش بتوایم ك داخوازیه‌یلمان له ده‌ستورعراق بچه‌سپی له‌وانه‌یش حه‌ق به‌رقه‌راری ناوچه‌ی ئوتونومی.