كوردى(یه‌كێتى نیشتمانى و دیموكرات كوردستانى) له‌باوه‌ت هه‌ڵویستیان له‌كیشه‌ى فه‌یلى و ڕیك نه‌كه‌فتن له‌بان نه‌خشه‌یگ ستراتیجى و كاركردن له‌بان ده‌ركردن بڕیاریگ ڕه‌سمى له‌لایه‌ن ده‌وڵه‌ت عراقیه‌وه ك سه‌رده‌م گوزه‌یشته‌ى ده‌ركردن و كووچ وه‌پیكردن زووره‌ملى و زه‌فتكردن ماڵ و موڵك كورده‌یل فه‌یلى وه‌پى تاوانبار بكریه‌یگ و قوربانیه‌یلیان له‌بان شه‌هیده‌یل ملله‌ت عراق بشماریه‌یگ و دادگایى بكوشه‌یلیان بكریه‌یگ له داروده‌سه‌ى ده‌زگایه‌یل رژیم وه‌رین و بیجگه ئه‌وه‌یش خیزانه‌یلیان قه‌ره‌بوو یا ته‌عویز بكریه‌ن له‌و هه‌مگه زه‌ره‌د گیانى و داراییه ك وه‌پیان ڕه‌سى و ڕیز و حورمه‌تیان بگیریه‌یگ و هه‌قه‌یلیان بچه‌سپیه‌یگ جویر هاووڵاتى عراقى و له‌هه‌مان وه‌خت دگان وه ڕه‌سه‌نایه‌تى عراقیبوینیان بنریه‌یگ وه‌گووره‌ى كارت نیشتمانى ك دریه‌یگه گشت عراقیه‌یل وه‌بى جیاوازى ڕه‌گه‌زى یا دینى.
پارت دیموكرات كوردستان له‌كارنامه‌ى یا به‌رنامه‌ى كۆنگره‌ى (13)ه‌مین ئاماده‌كریاگ خوه‌ى، كیشه‌ى كورده‌یل فه‌یلى و كورده‌یل تر له‌ناوچه‌یل ناوڕاس و باشوور عراق ئاماده كردگه ئه‌ڕا له‌یه‌كه‌وداین و به‌رنامه‌گه له‌ده‌روازه‌ى ئامانجه‌یل حزبه‌گه‌وه جه‌خت له‌مادده‌ى(7) ئه‌كا له‌بان وه‌رگیریكردن له‌هه‌ق كورده‌یل نیشته‌جى ناوچه‌یل تر له‌عراق و كاركردن له‌بان خاسه‌وكردن و دریژه‌داین په‌یوه‌ندیه‌یل كوومه‌ڵایه‌تى و ڕووشهویرى وه‌لیاناو دویاى ئه‌ه‌یش له‌ده‌روازه‌ى قوربانیه‌یل تاوان كوشتن وه‌جه‌م و تاوانه‌یل دژ ئنسانى جویر(په‌لاماره‌یل ئه‌نفال و كووچ وه‌پیكردن و كاولكرن ئاوایه‌یل و چه‌كه‌یل كیمیاوى).
به‌ند یه‌كم: هه‌ق قوربانیه‌یل و خیزانه‌یلیان:
مادده‌ى(249): ریكخستن نه‌عره‌ته(حمله)یگ نیشتمانى و جه‌هانى وه‌دیكردن چاره‌نویس ده‌یه‌ها هه‌زار ڕوڵه‌یل ملله‌ته‌گه‌مان له‌بارزانیه‌یل و كورده‌یل فه‌یلى و له‌هه‌مان وه‌خت قوربانیه‌یل ئه‌نفال به‌دناو له‌گه‌رمیان و گشت شوونه‌یل تر و زندانیه‌یل سیاسى ك تائیسه‌یش چاره‌نویسیان نادیاره‌و بیجگه ئه‌وه‌یش قه‌ره‌بووكردن ئه‌و قوربانیه‌یل و كه‌س و كاره‌یانه له‌بان گشت زه‌ره‌دیگ ك وه‌پیان ڕه‌سى له‌ڕوى گیانى و داراییه‌وه.
مادده‌ى(251) هاوردنه‌وه‌ى گشت ده‌ركریاگ و كووچ وه‌پیكریاگه‌یل ئه‌را ناوچه‌یل ڕه‌سه‌نیان و, وه‌رپرسیاریه‌تى قه‌ره‌بووكردنیان له‌بان گشت زه‌ره‌دیگ ك وه‌پیان ڕه‌سى بخریه‌یگه بان ده‌وڵه‌ت عراقى و له‌وانه‌یش ئاوه‌دانكردنه‌وه‌ى ئاوایه‌یل و شوونه‌یل نیشته‌جیبوینیان.
مادده‌ى(252) هاوردنه‌وه‌ى كورده‌یل فه‌یلى كووچ وه‌پیكریاگ و سه‌ندنه‌وه‌ى ماڵ و موڵكه‌یل جیوازكریاگ و جیوازنه‌كریاگیان و قه‌ره‌بووكردنیان له‌بان گشت زه‌ره‌دیگ ك وه‌پیان ڕه‌سى.
له‌ى باوه‌ته‌وه(شه‌فه‌ق) گفتوگوو وه‌ل شماره‌یگ له په‌یوه‌نداره‌یل ئى كیشه ئه‌نجامدا ك باس له‌باوه‌ته‌یل جووراو جوور كرد:
هه‌قناس وچالاككار مه‌ده‌نى (فایزه باباخان) له‌گفتوگوویگ ئه‌را شه‌فه‌ق ئه‌وه ئاشكرا كردو وت:(گشت ئه‌و هه‌قه‌یله ك له‌كارنامه‌ى پارت دیموكرات كوردستان هات، له‌ده‌ستوور وه‌ئاشكرا دیاره، وه‌لى كیشه له قانوون نیه، به‌ڵكوو له‌چوینیه‌تى داناین ستراتیجیه‌ت و میكانیزم هاوردنه‌وه‌ى هه‌ق فه‌یلیه‌یل و دادوه‌ریه وه‌ل كورده‌یل ده‌یشت هه‌رێم ). فایزه باباخان زیاتر وت: له‌گشت ئه‌یانه گرینگتر یاموهمتر ئه‌وه‌سه ریككه‌فتن و په‌یمانیگ ئمزا بكریه‌یگ له‌ناونى حكوومه‌ت هه‌رێم و حكوومه‌ت مه‌ركه‌زى ئه‌را جى وه‌جیكردن ئى ستراتیجیه‌ته.
له‌لایگ تریشه‌وه، (محه‌مه‌د ئه‌مین ده‌له‌وى) وه‌رپرس لق په‌نج پارت دیموكرات كوردستان له به‌غدا، باس له‌گرینگى یائه‌همیه‌ت كۆنگره‌ى (13)ه‌مین كرد ك بڕیاره له‌وه‌خت نزیكیگ ئه‌نجام بگریگ و وت: ئى كۆنگره گرینگى تایبه‌تیگ دیریگ وه‌گووره‌ى پیشبینیه‌یلى ك زوورم كیشه‌یل ئیسه‌ى جاده‌ى كوردستانى گرته‌سه خوه‌ى و بیجگه كاره‌یلیگ تر له‌باوه‌ت ئه‌همیه‌تداین وه‌كورده‌یل ده‌یشت هه‌رێم وه‌تایبه‌ت كیشه‌ى كورده‌یل فه‌یلى. محه‌مه‌د ده‌له‌وى باس له‌وه‌یش كرد ك(گرینگى یا ئه‌همیه‌ت ئى كۆنگره ئه‌وه‌سه به‌رنامه‌یگ دابنه‌یگ جه‌خت له‌بان لامه‌ركه‌زیه‌ت بكا له‌ده‌ركردن بڕیاره‌یل و دى وه‌و جووریشه ئازادى زیاتریگ ئه‌را لقه‌یل په‌یا بووگ له‌مامڵه‌كردن وه‌ل كیشه‌یل فره‌یگا وه‌بى ئه‌وه‌ك پرسیار مه‌ركه‌ز بكا، ئمجا له‌شوون كۆنگره‌گه‌یش بوودجه یا میزانیه دانریه‌یگ ئه‌را لقه‌یل و تویه‌نن كاره‌یلیان وه‌پى جى وه‌جى بكه‌ن و له‌وانه‌یش ك تایبه‌ته وه‌كورده‌یل ده‌یشت هه‌رێم. له‌باوه‌ت سیاسه‌ت حزب دیموكرات كوردستانیش له‌وه‌رانوه‌ر كورده‌یل ده‌یشت هه‌رێم، وه‌رپرس لق په‌نج محه‌مه‌د ئه‌مین ده‌له‌وى وت: پارت دیموكرات كوردستان هه‌ر له‌سه‌ره‌تاى دامه‌زراننیه‌وه ستراتیجیه‌ت گرینگ یاموهمیگ دانا وه‌تایبه‌ت كورده‌یل ده‌یشت هه‌رێم، وه‌لى ئه‌و وه‌زعه ك عراق و هه‌رێم وه‌پیا گوزه‌ر كرد بویه وه‌ربه‌سیگ له‌وه‌رده‌م جى وه‌جیكردن ئه‌و ستراتیجیه‌ته.
ئه‌ندام په‌رله‌مان وه‌رین و سه‌ركرده له یه‌كێتى نیشتمانى كوردستانى (تانیا ته‌ڵعه‌ت)یش له‌لایه‌ن خوه‌یه‌وه ئه‌و قسه‌یله ره‌ته‌وكرد ك گوایا یه‌كێتى نیشتمانى كوردستانى گرینگى یا ئه‌همیه‌ت نیه‌یگه كیشه‌ى كورده‌یل فه‌یلى و وت: ئى قسه راس نیه، چوینكه یه‌كێتى نیشتمانى له‌دویا كۆنگره‌ى خوه‌ى باس له‌كیشه‌ى كورده‌یل فه‌یلى كرد.
له‌لایگ تره‌وه تانیا ته‌ڵعه‌ت ، ئشاره‌ت وه‌هه‌ڵویسته‌یل سه‌ركوومار جه‌لال تاڵه‌بانى كرد له‌وه‌رانوه‌ر كورده‌یل فه‌یلى و وت: گشت وه‌ختیگ سه‌رۆك تاڵه‌بانى وه‌ل مه‌ینه‌تى كورده‌یل فه‌یلیا بویه‌و شماره‌یگ له‌لیان پۆسته‌یل سه‌ركرده‌یى دیرن له‌ناو یه‌كێتى نیشتمانى و له‌وانه‌یش كه‌سایه‌تى گه‌ورا(عادل موراد).
دویاخریش تانیا ته‌ڵعت وت: من نیه‌توام وه‌ناو یه‌كێتى نیشتمانى قسه بكه‌م، به‌ڵكوو وه‌ناو گشت نوێنه‌ره‌یل كورد له په‌رله‌مان قسه كه‌م ، ئیمه گشتمان له‌هه‌ردوگ حزبه‌گه(پارتى و یه‌كێتى)كار كردیم له‌ناو په‌رله‌مان ئه‌را وه‌ده‌سهاوردن گشت هه‌قه‌یل كورد و له‌وانه‌یش كورده‌یل ده‌یشت هه‌رێم و كورده‌یل فه‌یلى وه‌تایبه‌ت، وه‌لى جى داخه لایه‌نه‌یلیگ له كورده‌یل فه‌یلى مامڵه وه‌ل حزبه‌یلیگ ترا كردن له‌زوورم دیدگایه‌یلیان.