فاتیمە سەڵاح ئەرکەوازی

وەگەرد نواچگن خێراگەی تەکنەلۆژیا و ئەوزەڵ وەخوەی دین ژیری دەسکرد لە دروسکردن ناوڕۆک باوەتەیل و وینەیل، وەکارهاوەریل کوردی زوان رووژانە دوچار گیچەڵەیل زەقیگ بوون لە روی رینویس و رستەسازی زوانەگە، وەگەرد ئەوەگ کە ژیری دەسکرد توانای بیوینەیگ لە دروسکردن وینەیل و رەنگ  لێکدانەوە دیرێد، فرەجار ئەنجام نویسینەیلی کەموکوڕ و پڕ هەڵە  و شوین رەخنەن.

لەی ماوەی کۆتاییە وەکارهاوەریل زوان کوردی لەژیری دەسکرد روی زیایبوین کردیە، یەیش چشت بەدیگ نییە، بەڵکم وە مدوویەو زوانیگ کە سەردەمانیگ لە تەکنەلۆژیا و سەرچەوەیل دیجیتالی کەمینەبوی، ئیرنگە بویەسە زوانیگ باو، باوجی ئەوەگ شوین پرسیارە ئایا ئیمە ژیری دەسکرد هوکارەی کوردی کەیمن یا ژیری دەسکرد ئیمە هووکارەی رێنویس کوردی نوویگمان کەێد؟

ئیرنگە ئیمە چێژ لە وینەیلی دوینیمن و شکست لە پیتەیلی خوەین، جویر ئەوەگ دویرنیەێد وینەیل و نوسینەیل کوردی ئامادەکریەێد لەروی وینە رەنگینی بی ئوونیگ دیرێد باوجی هنای لە دۊزەوکەیمن لە پیت و رێنویس وشەیل یا رستەسازی دەقەیل هەڵەیل فرە زاقیگ ئسفاکریەێد کە هاتێ وەگەرد وەردەوام بوینی کاریگەری نەرێنی وەبان رەسەنایەتی زوان کوردی دروس بکەێد و وشەی و رێنویس هەڵە شوین وشە ورێنویس و رستەسازی رەسەن و دروس بگرێد.

ئیمە توەنیین وەلیفەت لە توانایەیل ئێ پیشکەفتنە وەربگرین باوجی نەک کلیل زوانەگە بدەێن وەپی کە هێمانگ خوەمان وە خاسی هویکارەی   وشەیل دروس و  زانیاری وشەسازی و رستەسازی  نەکردیمنە، راسە ئیمە چێژ لە وینەیل رەنگینی دوینین باوجی نیەود شکست لە پیتەیلیمان بارین.

لە باوتین  هەڵەیل وینە دەقەیل کە دوینریەد نەوەسان پیتەیل وەگەرد یەک و زیای یا کەم کردن پیت و نیشانەیل ژیر و بان پیتەیل کوردیە و تێکلاکردنی وەرد پیتەیل عەرەبیە، کە خاسترە وەکارهاوەرەیل وە جیا ئەو بەش نویسینە زیای بکەن وەرجە ئەوەگ رویوەروی رەخنەبوون و هەمیش زانیاری هەڵە زیایبوود وەبان زوانەگە.

ئیرنگە وەخت ئەوەگ هاتیە وەکارهاوەرەیل وە ژیری مامەڵە وە ژیری دەسکرد بکەن دارشتن راس و پاراستن رەسەنایەتی بکەنە مەرج سەرەکی وەرجە بڵاوکردن ناوڕۆکەگە.