كفاح مه‌حمود/ دوياى ئه‌وه‌گ گشت هه‌وڵه‌يليگ ئۆپۆزسيۆن و نائۆپۆزسيۆن له جيابويه‌يل به‌عس و ده‌زگايه‌يل سه‌ربازى شكه‌ست هاورد له رمانن رژيم سه‌دام حسين وه كوده‌تا يا راپه‌ڕين، وڵاته‌يل يه‌كگرتگ و هاوپه‌يمانه‌يلى جه‌نگيگ گشتگير له‌بان عراق به‌رپا كردن دوياى ئه‌وه‌گ ده‌وڵه‌ت كوه‌يت داگير بكا، گشتلايگيش پيشبينى ئه‌وه كرديان رمننه‌ى، وه‌لێ ئه‌وه‌گ روێدا ئه‌وه بوێ ك وه ويرانكردن عراق و ژيرخانه ئابووريه‌گه‌ى وسيانه‌وه‌و بردنه‌وه‌ى ئه‌را سه‌رده‌م وه‌رجه كاره‌با، جوور ئه‌وه‌گ بويشێد گووش له سه‌دام حسێن گرتوين ك وتياده ئيران شوونى ناگرن مه‌گه‌ر عراق وه كوومايگ خوه‌ڵ بوينن، ئمجا ئه‌مريكاو هاوپه‌يمانه‌يلى ئه‌و نبوه‌ت يا هه‌ڕه‌شه جيوه‌جى كردن، دوياخريش خوه‌يان كيشانه‌و دوياى ئه‌وه‌گ عراق وه كوومايگ خوه‌ڵ راده‌س كردن، وه‌لێ دانه‌ى ده‌س سه‌دام حسێن، ئمجا گه‌مارۆيش خستنه بان عراق وه ملله‌ت و حكومه‌تيه‌و ئه‌را ساڵه‌يل فريه‌يگ و كار و كرده‌وه‌ى خوه‌ى چه‌سپان له چه‌سپانن كۆيلايه‌تى وه‌ده‌س زرنگترين سواره‌يل كه‌وڕخن (ورسگى و فه‌قيرى) و كه‌ره‌سته‌يل رژيم و پياوه‌يلى، ك شوون و ناوه‌نده‌يل مه‌ترسيدار فريه‌يگ له ره‌فتار و نه‌ريته‌يل كۆمه‌ڵايه‌تى ويران كريان جوور ته‌كريسيگ ئه‌را شكاننه‌وه‌ى رووشهويرى له‌لاى سه‌رۆك و دارده‌سه‌گه‌ى، تا ئه‌وه بوێ به‌نامه‌گه ته‌واو بوێ و ئاشته‌گه هاته كوڵ ئه‌را قۆناغيگ تر ده‌س وه‌پى بكا وه ده‌خاڵه‌ت سه‌ربازى و كووتاييهاوردن وه رژيم سه‌دام حسێن و حزبه‌گه‌ى و داگيركردن عراق و دامه‌زرانن رژيميگ تازه جيا له رژيم وه‌رين و ده‌سوه‌پيكردن سه‌رده‌م تازه‌يگ له مێژوو سياسى و كۆمه‌ڵايه‌تى و ژيارى ئه‌را وڵاته‌گه.
هه‌ر له مانگه‌يل سه‌ره‌تاى داگيركارى، ديارده‌و ده‌سپيشخه‌ريه‌يل گه‌نده‌ڵى ده‌ركه‌فت، ك له ماوه‌ى 17 ساڵ عراق كرده يه‌كيگ له گه‌وراترين وڵاته‌يل جه‌هان له گه‌نده‌ڵى و شكه‌ست، وه‌لێ ئه‌ڵڵاجه‌وى ها له‌ورا گشتلايگ باس له گه‌نده‌ڵى له زوورم ده‌زگايه‌يل ده‌وڵه‌ت تازه ئه‌كه‌ن وه‌بى ئه‌وه‌گ دقه‌ت له‌بان بنه‌مايه‌يل ئى گه‌نده‌ڵى و دروسكردنى بكه‌ن، ك ئه‌ويش سه‌ندن و فرووشتن پۆسته‌يله ك تا ساڵه‌يليگ وه‌رجه رميان رژيم ته‌كليف بوێ نه‌ك ته‌شريف، به‌ڵكوو بار قورسيگيش بوێ له‌بان راسپارياێ له رووژه‌يل سه‌رده‌م پاشايه‌تى و فريه‌جاريش كانديده‌يل عوزرخوازى كرديان ئه‌را وه‌رگرتن ئه‌و پۆسته‌يله له‌وه‌ر حورمه‌تگرتن له خوه‌يان و له وه‌زيفه‌گه، وه‌تايبه‌ت وه‌زيفه جى غرور نه‌وێ وه ئمتيازه‌يلى له‌و سه‌رده‌مه جوور ئه‌وه‌گ ئيسه وجوود ديرێد له حكومه‌ت و په‌رله‌مان يا سه‌ربازى، ئمجا له گرنگترين هووكاره‌يل سه‌رهه‌ڵدان ئى بازاڕه ك خواست گشت ئحساسيگ نيشتمانى يا ئحساس وه هاووڵاتيبوين باڵا و ئنتماى ئازاد كووره‌و بكا، ئه‌و ئمتيازه‌يل فريه بويه ك ژينگه‌ى گونجياگيگ دروسكرد نه‌ك ئه‌را ركابه‌رى، به‌ڵكوو ئه‌را جه‌نگ له‌وه‌ر خاترى و خراوكردن نيشتمان و ره‌وشته‌يل وه‌زيفى گشتى و وه‌رپرسياريێتيه‌يلى له گووشه‌ى تيه‌ريكيگ ك هوويچ شوونيگ نه‌ياشتوود له ئه‌جنداى راسپارياێ، چوينكه بيگومان چه‌و و ئه‌قڵى ها بان ئمتيازات و روێ وه‌ڕ ده‌وڵه‌مه‌نبوين خراو و پويل و دارايى حه‌رام، تا ئه‌وه‌ى بوێ ده‌زگايه‌يل ته‌شريعى و جيوه‌جيكار ئاڵشت بوێ ئه‌را سه‌رمايه‌دارى و عموله‌و بازاڕه‌يل ريككه‌فتن و كۆمپانيايه‌يل درووكانى ك بودجه‌ى وڵاته‌گه چووڵ كردياد تا راده‌يگ ك وه‌يه‌كيگ له گه‌نده‌ڵترين ده‌وڵه‌ت له جه‌هان دانريا، ك وه بازاڕ پۆسته‌يل وه‌زارى و ئدارى گشتييش له ناوه‌ند و پاريزگايه‌يليش نه‌وسيان، به‌ڵكوو مه‌سه‌له‌گه له‌ى دوياخره ره‌سيه ئه‌وه‌گ سه‌رۆك راسپارياێ ئه‌را دامه‌زرانن حكومه‌ت تازه تومه‌تبار لايه‌نه‌يليگ جيوه‌جيكار له په‌رله‌مان كرد وه داين پويل وه ئه‌ندامه‌يل ئه‌نجومه‌ن نوێنه‌ره‌يل ئه‌را ئه‌وه‌گ ئاماده‌ى دانيشتن نه‌ون يا وه‌پيداين متمانه ره‌ته‌و بكه‌ن، يه‌يش ماناى ئه‌وه‌سه سفه‌ته‌يليگ تر له‌ئيسه ديارن ئه‌را سه‌ندن يا فرووشتن پۆست سه‌رۆك وه‌زيره‌يل له وڵاته‌گه ك زوورم هيزه‌يل سياسى جيوه‌جيكار پابه‌ند نيه‌ون وه قه‌وڵه‌يليان ك دانه‌سه‌ى مه‌ردم وڵاته‌گه، وه‌تايبه‌ت ده‌ستوور هه‌ميشه‌يى وڵات له كتاويگ فڕه‌ديارێ زياتر نيه له‌بان رفه‌يل نويسينگه‌ى وه‌رپرسه‌يل ك ته‌نيا ئه‌را جوانى هيشتتنه‌سه‌ى!
دوياخريش ره‌حمه‌ت له‌و كه‌سه‌گ ئاگادارمان كرد وه‌و په‌نده ك وتگه ئه‌وسا خوداوه‌نديان له خورما دروس كرديان، ئمجا هه‌ناى وه‌رسگى ته‌نگ وه‌پيان هه‌ڵچنێد ده‌نه‌ى ده‌ما، ئيسه‌يش نه‌وه‌يليان هه‌ر جوور دويه‌كه‌ى باوگ باپيره‌يليانن!.