چه‌ن ناوچه‌يگ توركيا ، ئه‌و قسه‌يشه گوزارش له واقعيگ ئه‌كا ك نزيكه‌ی سه‌ده‌يگه وجوود ديريگ و له‌رووژگار ئمڕوويش بويه‌سه گرفتيگ له‌ڕی وه ئه‌ندامبوين توركيا له‌يه‌كێتی ئۆرپاو فره‌يگ له سياسه‌تمه‌داره‌يل توركيايش ماوه‌يگه په‌ی وه‌و راسيه به‌ن ، وه‌لی له‌ژير فشار دامه‌زرياگ سه‌ربازی و دوشمنايه‌تی تونڕه‌وه‌يل نه‌ته‌وه‌ی تورك و كزی پايه‌ی مه‌ردم ئه‌و پارته‌يله له‌و سه‌ردمه حكوومه‌ت دامه‌زرانن جورئه‌ت ئه‌وه نه‌ياشتن دگان وه‌و راسيه بنه‌ن وه ئه‌وه‌ك داوای چاره‌سه‌ركردن كيشه‌ی كورد بكه‌ن و ته‌نيا ئه‌و قسه‌يله نه‌وگ ك دوباره‌و سێباره‌ی كرديانه‌وه‌و ك ئه‌نجامه‌گه‌ی كوشيان و فه‌وتيان شماره‌ی فره‌يگ له سه‌رباز و خه‌ڵك بيتاوان بوی له‌جه‌نگ ده‌وڵه‌ت دژ په‌كه‌كه و كاريگه‌ری جه‌نگه‌گه ئه‌را بان ئابووری توركيا ك ئه‌و وه‌خته ئابووری توركيا فره كز بوی و گه‌شه‌كردن خاسيگ وه‌خوه‌يه‌وه نه‌ی ، ئه‌ويش له‌ئه‌نجام په‌يڕه‌و نه‌كردن سياسه‌ت خاسيگ وه‌ل نه‌ته‌وه‌ی كورد و مه‌ترسی كاروه‌ده‌سه‌يل تورك له ره‌نگدانه‌وه‌ی خراو هه‌ر پيشكه‌فتنيگ له‌وه‌زع نه‌ته‌وه‌يل وه‌ك كورد و ئه‌رمه‌ن و كه‌مه نه‌ته‌وه‌يل تر له‌وڵاته‌يل هاوسا ، يا ئه‌را بان يه‌كپارچه‌يی توركيا . له‌رووژگار ئمڕوويش هه‌وه‌جه‌ی توركيا ئه‌را وه‌ئه‌ندامبوين له‌يه‌كێتی ئۆرپاو هه‌وڵه‌يلی ئه‌را داشتن ده‌ور خاسيگ له‌ناوچه‌گه‌و ده‌ركه‌فتنی وه‌ك گه‌وراهيزيگ هه‌ريمی و ئستغلالكردن پايه‌گه‌ی وه‌ك ده‌روازه‌يگ ئه‌را ئۆرپا له‌وه‌ر خاتر ده‌سكه‌فتن ئه‌و ئامانجه‌يله ، بيگومان ئه‌وه‌يش وه ده‌سه‌وه‌ركردن ئارامی و ئاشتی بووگ له توركيا .
فره‌ن له‌تاريخ ئه‌و كه‌سه‌يله ك له‌وه‌خته‌يل نازگيگ بڕيار تاريخی و چاره‌نويسساز ده‌ن و مه‌رز بيده‌نگی شكنن و دگان وه راسيا نه‌ن ، ك كه‌سه‌يليگ حاشا له‌لی كرديان وه‌بی گووشداين وه‌و ئه‌گه‌ره‌يله ك له‌لی كه‌فيگه‌وه‌و هه‌رچه‌نی له‌سه‌ره‌تا روی وه روی ره‌خنه‌ی تونيگ بوونه‌وه ، وه‌لی دوياخر نه‌وه‌يل ئه‌و وڵاته وه ئاده‌ميزاديگ داناو دامه‌زرنه‌ر ده‌وڵه‌تيگ وه‌هيز و ئه‌ندازيار ئاشتی و وه‌خشين ده‌نه‌ی له‌قه‌ڵه‌م . ئمڕوويش له‌يوا دياره (ئه‌ردوغان) مه‌يل ئه‌وه داشتووگ ئه‌و ده‌وره بوينيگ ، ك ئه‌ويش وه‌مه‌به‌س قه‌يريگ هووكار خودی و باوه‌تی پرووژه‌ی وازبوين يا ئنفتاح وه‌ڕوی كوردا پيشكه‌ش كرد و تائيسه‌يش وه‌رده‌وامه له‌بان ئه‌نجامداين گفتوگوو زياتر وه‌ل معارزه‌يل پرووژه‌گه‌و دياره ئاشكرا بوی ئه‌ڕايان ك هه‌ڵوژاردن ريگه‌چاره‌ی سه‌ربازی شكه‌ست هاورد له‌سه‌ركوتكردن جموجويل رزگاريخواز كورد له‌توركيا و نه‌تويه‌نست كووتايی وه‌و په‌شيويه باريگ ك له‌ناوڕاس هه‌يشتايه‌يل سه‌ده‌ی گوزه‌يشته‌وه هه‌ر وه‌رده‌وامه‌و تائيسه‌يش هويچ رووشناييگ ئه‌را كووتاييهاوردنی نيه‌كريه‌يگه دی ، وه‌ل ئه‌وه‌يشا له‌ی دونيای ئيسه دی نيه‌كريه‌يگ توركيا خوه‌ی گووشه‌گير بكه‌يگ و ده‌ور پاسه‌وانيگ بوينيگ ئه‌را ريگرتن له جموجويل رزگاريخواز ملله‌ت كورد له‌و وڵاته‌يله ك كوردستان له‌بانيان دابه‌ش كرياگه ، ك ئه‌ويش بووگه سه‌به‌ب له‌ده‌سداين فره‌يگ له به‌رژه‌وه‌نديه‌يل ئابووری و سياسی توركيا ، وه‌تايبه‌ت له‌ی سه‌رده‌م ئيسه ك توركيا خوه‌ی وه‌بی ده‌سڵات دوينيگ وه‌رانوه‌ر وه‌پيشكه‌فتن مه‌سه‌له‌ی كورد له كوردستان باشوور و له‌سايه‌ی دگان وه‌پيناين هه‌ريم كوردستان وه‌ك هه‌ريميگ فيدراڵی و چه‌سپانن هه‌قه‌يل كورد له‌ده‌ستوور عراق و رازيبوين زوورم لايه‌نه‌يل عراقی وه‌و ده‌سكه‌فته‌يل كورده له‌عراق .
ئمجا ئه‌ردوغانيش دياره هس كردگه وه فشار ناوده‌وڵه‌تی ئه‌را چاره‌سه‌ركردن كيشه‌ی كورد و پشتگيريكردنيان و له‌هه‌مان وه‌خت پشتگيری مه‌ردمييش ديريگ وه‌گووره‌ی ئه‌وه‌ك پارته‌گه‌ی خاوه‌ن زوورم كورسيه‌يل په‌رله‌مانه‌و له‌ماوه‌ی حوكمڕانی پارته‌گه‌ی تويه‌نستگه ده‌سكه‌فته‌يل فره‌يگ ئه‌را وڵاته‌گه‌ی باريگه ده‌س وه‌تايبه‌ت له‌مه‌يدان ئابووری و سياسی .