ئه‌را مه‌یدانیگ یا مه‌سه‌له‌یگ وه ڕه‌وا بزانیدو ئه‌را مه‌یدانیگ تر وه گوناه و تاوان. دیموكراسیه‌ت وشه‌یگ لاتینى هاوچه‌رخه، وه مه‌عناى حوكم ملله‌ت ئه‌را نیشتمان، وه‌لى له‌هه‌ر وڵاتیگ و جووریگ گوزارش له‌لى كریه‌یگ.
وڵات هه‌س دیموكراسیه‌ت پوخته‌و كردگه له‌گشت مه‌یدانه‌یل ژیان، وڵاته‌یلیگیش هه‌ن دویرن له دیموكراسیه‌ت و بانگه‌واز دیموكراسیه‌تیش كه‌ن. ئه‌و وه‌زع مه‌عنه‌ویه نیشانه‌و ناوه‌ڕووك راسه‌قینه‌ى شووڕش و ئازادى و ڕزگارى ملله‌ته‌یله، وه‌لى وه‌گووره‌ى له‌یه‌كه‌وداین و ڕویه ڕاسیه‌گه‌ى ئه‌و ئازادیه ك هه‌ر ئاده‌میزادیگ له‌بان ئى گووشه‌ى زه‌ویه داواى ئه‌كاو خه‌و دوینیگ وه‌پیه‌وه، ئه‌وه فره كه‌م له‌گووشه‌ى ئى جه‌هانه وجوود دیریگ. دیموكراسیه‌ت ئه‌رك تاكه‌یل كوومه‌ڵكاس بارنه‌ى وجوود، له‌هه‌مان وه‌خت تویه‌نریه‌یگ ئه‌و دیموكراسیه‌ته جویر نه‌فت و سه‌رمایه‌و ئازادى و ئارامى زه‌فت بكریه‌یگ و مه‌ردم له‌لى بیبه‌ش بكریه‌ى. وه‌لى ئه‌و كوومه‌ڵگا ك وه‌ل گونجیه‌یگ وه‌ل دیموكراسیه‌تا، ئه‌وان خوه‌یان ده‌سڵات سیاسى و ئدارى و قانوونداناین دروس كه‌ن و خوه‌یان خه‌ریك وه‌ره‌و نوابردن و گه‌شه‌سه‌ندن راسه‌قینه‌ى وڵاته‌گه‌یانن.
له‌وڵاتیگ ك دیموكراسیه‌ت له‌تى وجوود داشتووگ، ئه‌وه سیاسه‌ت و ئداره‌و دارایى گه‌شه‌كردن خاسیگ وه‌خوه‌یه‌وه دوینیگ، چوینكه دیموكراسیه‌ت راسه‌قینه وه‌ك چوین تاكیگ ئازاد ئه‌كا له‌هویره‌وكردن و جموجویل، وه‌و جووریشه ژیان و ئارامى ئه‌ڕاى ده‌سه‌وه‌ر ئه‌كا. ئمجا مه‌رزداركردن ئه‌و مه‌یدانه خوه‌ى له‌خوه‌ى نیشانه‌ى پاكى و دروسى وه‌زع دیموكراسیه‌ته. ئازادى و دیموكراسیه‌ت هه‌ر تاكیگ ئه‌و وه‌خته دروس بووگ و ره‌سیگه‌جى ك ئاسایش و ئارامى گشت هاونیشتمانیه‌یلى نه‌په‌زنیگ و جویر ئه‌وه‌ك چوین ئه‌را خوه‌ى ژیان خاسیگ توایگ ئه‌را ئه‌وانیش وه‌هه‌مان شیوه. ژینگه‌ى سیاسى و ئدارى تویه‌نن دیموكراسیه‌ت وڵاتیگ بارنه وجوود. ئمجا ئه‌وه‌ك داواى ده‌سڵاتیگ سیاسى ئه‌را ده‌سه‌وه‌ركردن ئه‌و دیموكراسیه‌ته بكا، ئه‌وه فره نادروس و غه‌ڵه‌ته، چوینكه هویچ ده‌سڵاتیگ نیه‌تویه‌نیگ په‌یڕه‌و دیموكراسیه‌ت بكاو به‌رنامه‌یگ له‌لى دروس بكا مه‌گه‌ر ته‌نیا هوشیارى و هویر خاس تاكه‌یل كوومه‌ڵگا ئه‌و كاره بكه‌ن ك یه‌كیگه له بنه‌مایه‌یل سه‌ره‌كى دیموكراسى. له‌وه‌ر ئه‌وه توینیم بویشیم دیموكراسیه‌ت هویچ وه‌ختى وه زوور كوته‌ك نیه‌چه‌سپه‌یگ و به‌ر نیه‌گریگ.