کی زانێد، هاتێ نەفت ژیر زەوی، جویر روینیگ بوود، بکەفێدە ناوبەین سەنگە گەپەیل، و نەیلێد گەرمی باێدە بان، و گەرمی زەوی بمژێد، و هاتێ نەیلێد ئەو سەنگەیل فرە گەپە بیەن لەیەک و بەڵاچە لەلیان باێدە بان زەوی، و بوودە تەکان قایمیگ، و بوودە زەویلەرزە.

کی زانێد، چەنیگ ئاو بایەتە تەکان بیەن، تا شوین ئەو نەفتە پڕەو بکەن، تا باێدە دەیشت، ئیجا تا ئەو نەفتە بسزێد، و بوودە گاز ژەهراوی، و ژینگە پیس بکەێد.

یەیش لەوەخت قەیران ئاو، و قەیران ژینگە.

گشتمان زانیمن، ک تەڵا لە نەفت خاسترە، چوینکە گرانترەر و تەڵا هویچ کار بەدیگ وە ژینگە نیەکەێد، وەلێ خەڵک ئاوای (تامبو) لە وڵات پیروو، قسەیگتر داشتن.

 ئاواییگ بوی، وەناو (تامبو) گراندی لە وڵات ( پیروو)، مەردم ئەو ئاوایە، لەبان شەوخەف تەڵایی گەورەیگ خەفتیان، و خوەیان نیەزانن تەڵا پڕ ژیر ماڵیانە.

تا رووژیگ هات، و حکومەت پیروو ئاگادار وەی دەوڵەمەنیە بوی، و فەرمان چووڵکردن ئاوایەگە دا، و خەڵک ئاوایەگە، هەناێ لە خەو هەڵسیان، وەخوەیان زانستن، ک ئاوایەگەیان وە ئەمریکا فرووشیاگە، ئەرا کۆمپانیایگ وەناو «مانهاتن مينرالز كوربوريشن».

وەخەڵک ئاوایەگە وتن: ئەوەسا گشت تاکە کەسیگ بوودە ملیاردێر، وەلێ خڵک ئاوایەگە پاپەی ئی مزگانیە نەوین، و نەکفتنە تەما.

 لە ئەنجام ریفراندۆمیگ، خەڵک ئاوای تامبو گراندی، بڕیار دان، ژیان خوەیان وەبان ئەڤوکاتو، و مەنگا، و لەیموون، و میوەیل باخەیلیان وە رەنج شان خوەیان گوزەران بکەن.

خەڵک ئاوایەگە خاس زانستن، ک تەڵا لەعنەت خەێدە شوینەگە، و داینامیت زەویەگە کەێدە ئەشکەفت و چاڵ، و ژەهر (سیانۆر) خەێدە ناو چەمەیل، و ئاو زەڵاڵی نیمەینێد.  

هاتێ ئەوەیش زانستن ک تەڵا شیت مەردم کەێد، چوینکە تەڵا تیر هەرسناکی نیەکەێد.