شەفق نیوز- کەرکوک
سەرۆک کۆمیسیۆن ئاسایش و وەرگری لە ئەنجومەن پارێزگای کەرکوک، ئەحمەد رەمزی کۆپەرلو، ئمڕوو چوارشەممە، دووپاتکرد پەلامارەگەی کۆتایی کە هێزەیل پۆلیس فیدراڵی لە قەزای حەویجە کردە ئامانج، وەردەوامی رخداری خانەیل بیدەنگ چەسپنێد، و داوای خەسکردن تەقەلا هەواڵگرییەیل و ئۆپەرسیۆنە ئەمنییەیل کرد ئەرا ریگریکردن لە دوارەبوین ئێ پەلامارەیلە.
کۆپەرلو وە ئاژانس شەفەق نیوز وت: "هەوەجە کەێد هویچ دەرفەتیگ وە ئێ خانەیلە نەدرێد ئەرا رێکخسن کڕەیلیان قۆرغکردن بڕیگ ناوچەی دوورەدەس ئەرا ئەنجامدان پەلامار وە ئامانجگردن هێزەیل ئەمنی و مەدەنییەیل"، و دیاریکرد ئەرا گرنگی وەردەوامبوین هەماهەنگی لەناوەن دەزگا ئەمنییە جیاوازەیل و ئاڵشتکردن زانیاری لەبان جویڵەی توومەتبارەیل و کەسەیل گوماناوی.
دیاریکرد "هێزەیل ئەمنی خاوەن توانا و ئامادەیی تەواون ئەرا لێدان ئی خانەیلە و هشککردن سەرچەوەیلیان"، و دووپاتکرد "ئەنجومەن پارێزگای کەرکووک وەردەوام بوود لە پاڵپشتیکردن و دەسمیەتی دەزگا ئەمنییەیل وە مدوو جویلەیلیان، وەگەرد وەردەوامبوین پەیوەنی و هەماهەنگی وەگەردیان ئەرا پاراستن ئاسایش پارێزگاگە و دانشتگەیلی".
ئی لێدوانەیلە دویای ئەوەگ هات کە کەرتیگ لە پۆلیس فیدراڵی لە ئاوایی بەڕغەلیەی دەنادیش لە سنوور قەزای حەویجە رویوەروی پەلاماریگ چەکداری بویە، کە بویە مدوو کوشتن پۆلیسیگ و زەخمداربوین چەن کەسیگ ترەک، بیجگە لە وە ئامانج گردن بڕیگ لە کامێرا گەرمییەیل، لە رووداویگ کە رووشنایی خەێدە بان چالاکی خانە چەکدارەیل لە ناوچەیل ئاوایی و دویرەدەس.