شەفەق نیوز - کەرکوک
دەسەیگ تایبەت رەسیە پارێزگای کەرکوک، رووژ دووشەممە، ئەرا لێکۆڵینەوە لە دۆسیەی قاچاخچێتی نەفت، وە رێنمایی لە سەرۆک ئەنجومەن وەزیرەیل عەلی فالح زەیدی.
سەرچەوەیگ ئەمنی ئەرا ئاژانس شەفەق نیوز وت، کە "فەرماندەی ئۆپەراسیۆنەیل کەرکوک لە پیشوازی لیژنەگە بۊ لە وەخت رەسینی ئەرا پارێزگاگە، کە دەس وە کارەیلی کەێد ئەرا دڵنیابۊن لەو زانیاری و دۆسیەیلە کە پەیوەندیدارن وە پرۆسەیل قاچاخچێتی نەفت، و گووشداینە لایەنە ئەمنی و چەودیارییە پەیوەندیدارەیل".
دیاری کرد کە لیژنەگە کار کەێد ئەرا گردەوکردن زانیاری و بەڵگەیل و چەوپیاخشانن ئەرا ئەو ریکارەیلە کە لە ماوەی وەرین گیريانەسە وەر، تا دەرەنجامەیل لێکۆڵینەوە و راسپاردەیلی بەرزەو بکەێد ئەرا لایەنە باڵایەیل ئەرا جیوەجیکردن ریکارە یاساییە هەوەجەدارەیل وەرانەور هەر لایەنیگ کە دەسی لە دۆسیەگە چەسپێد.
رەسین دەسەگە ئەرا کەرکوک لە دۊای وەرگردن سەرۆک وەزیرەیل عەلی فالح زەیدی راپۆرت ئەو لیژنە تیەێد کە ئەرکدار کریاس وە لێکۆڵینەوە لە دۆسیەی قاچاخچێتی نەفت لە ناوچەی جوڕف سەخەر، کە دووپات کرد، وەپەی ئەو زانیارییەیلە کە وەرجە یە ئاشکرا کریان، لەبان بۊین پرۆسەیل قاچاخچێتی و دامەزراوەیل ئەرا پاڵاوتن نەفت لە ناوچەگە.
لە دۊای ئەوە، زەیدی بڕیار دا وە رەوانەکردن ئەو تاوانبارەیلە کە دەسیان لە پرۆسەیل قاچاخچێتی بویە ئەرا دادگا، و لاداین شمارەیگ لە گەورە وەرپرسە ئەمنی و سەربازی و کارگێڕییەیل لە پارێزگای بابل، کە لە ناویان فەرماندەی پۆلیس پارێزگاگە، و وەرپرسەیل لە دەزگایەیل هەواڵگری و ئاسایش نیشتمانی و حەشد شەعبی و پۆلیس وزە و کۆمپانیای کڕەیل لۊلە نەفتەیل هەس.