کەنعان موڕاد/ هونەرمەنیگ شیوەکاری، چەن کڕیگ کیشێد، نە روخسار کەسیگە، نەیش دار ودرەختیگە، نەیش ئاو چەمیگە، یا ئەور و ئاسمانیگە، وەلێ قەیریگ تەماشای کەیمن، و هاتێ رووژیگ وە مەلیۆنا دۆلار بفرووشیەێد.
وەیجویرە، جاروبار هەس کەێ ک یەی چشتیگ خوازێ بویشێ، باوجی ووشەیگ نییە تا ئەو هەسە وەپی باس بکەێ، نیەزانێ چوین ئاشکرای بکەێ تا کەسیگتر لەو هەسە بڕەسێدەو، ئایا وە دەس و چەو یا هەر وە گشت لەش جویلە بکەێ تا ئەڵگەردان ئەو قسەیلە بکەێ؟.
شایەت، هونەر سەماکردنیش، هەر شیوەیگە ئەرا ئاشکراکردن ئەو هەسەیلە ک جویر دەنگ دهوڵ هیلێد سەما بکەێ، ک وە قسە نیەکریەنە باس.
شایەت، هەناێ شاعرەیل پەنا وە ووشەیگ (سومبلی) بەن، ئەو بیچارەیلە هەمیش کەفتنەسە گیچەڵ هەسەیلیگ ک ووشەیل روون وئاشکرا تامیان نیەڕەسنن.
هەمیشە ئەو شعرەیلە ک ئاشکرا نیین، رسوای هەس قویلیگ کەن، و هەمیشە وە زنی مینن، لە وەختیگ هەرچەگ راپۆرت و خەوەر رووژانە نویسیەن، گشتیان مرن.
ئەو میوزیک ژەنە، ک کلگەیلی قسە کەن، کام قسە کەن؟، هەڵبەت ئەو قسەیلە کەن ک وە زوان نیەکریەێد.
وەلێ قسەیل هەسیش تەمەن خوەیان دیرن، ئەو هەسەیلە لەناخ گەنجەیل جویر ئەوە نییە ک لەلای پیرەیل پەیا بوون، چوینکە پیرەیل وە شیوەیگ پڕ لە ئەزموون، یا پڕ لە بیئومیدی، هەمیشە کپ وبێدەنگتر بوون، ک دیارە ئەو هەسەیلە لەلایان زاڵترە، ئەراوە واز لە تەقەلای ئاشکراکردنیان هاوردن.
فەیلەسوف ئەڵمانی ئەرتور شۆپنهاوەر ئویشێد: "ئایەم دویای وەخت دیریگ زانێد ک گشت خوازین وئارەزووەیلی ک ئەرایان رەنج دا، و سەرکەفتن لەلیان وەدەسهاورد، دی ئەرای نەگوجیاگە، و وەگەرد کەسیگ ک رووزگارەگە گلوپلی کرد نەپووڕیاگە، ک دی خوەی ئەو کابرا نییە ک جارانی وە رکیگ پلان دانا، ودەسکردە ئەنجامدانی.
ئویشێدیش: رووزگار شەکەت ئایەم کەێد وتوانایلی کەمەو کەێد، و هەمیش ئەو ئەزموونەیلیە ک دویای رەنجەیل گەورەیگ کەڵەکە بوینە، و هەناێ کەفێدە دەسی دی توانای چنین بەرەیلی نیەمینێد تا دڵی وەپیان خوەش بوود، تا رەسێدە ئەو باوەڕە ک رەنجی بیوەر بویە.
ئەو کەسەیلە هەکاتی ئەوەگ گران وئەرزان ئەرا وەرگردن پۆستیگ پیشکەش کرد، و هەناێ پۆستەگە کەفتە دەسی، دی هازی نەمەن، و ناچار بوی واز لەلی بارێد.
هەر وەیجویرە، ئەو چشتیەیلە لەوەخت دیریگ وەدەسمان کەفن، یا بویشیمن، ئیمە دویای وەخت دیریگ رەسیمنە پییان".
ئەراوە، هەمیشە تەقەلا بیەیمن کەسەیلیگ وەتەمەن باریمنە دەنگ، وەخاتر شعریگ زنی، یا مۆسیقایگ دڵگیر، یا سەمایگ بی دهوڵ.