عه‌ره‌ب ئه‌را كه‌ركووك زه‌نگیگ مه‌ترسیه و ڕه‌خنه یا ئنتقادیش له پارێزگار یا موحافز كه‌ركووك گردیه، ك ده‌سڵات ده‌ركردن ئه‌و خێزانه‌یله دیرى؛ وه‌لى ده‌سڵاته‌گه‌ى وه‌كار نیه‌تیه‌رى و یه‌یش نیه‌زانى ئه‌را؟!
له دریژه‌ى ڕه‌خنه‌گه‌ى له پارێزگار كه‌ركووك ئه‌و كاروه‌ده‌سه ئویشى : "ئه‌گه‌ر هه‌ردوگ حزب(یه‌كێتى و پارتى) و كه‌ركووك و كوردستان نه‌ویاتا، وه حه‌یاتى ئه‌و پارێزگاره نه‌ویاده فه‌رمانبه‌ر گه‌ورایگ له شار كه‌ركووك"
زیاتریش ئویشى ك:"پاره‌ى فره‌یگ هاوه‌ده‌س پارێزگاگه‌وه، وه‌لى ئه‌را پاكه‌وكردن شاره‌گه، یه زیاتر له هه‌یشت مانگه مشتومڕ ئه‌وه كه‌ن بیه‌نه‌ى چ قونته‌راتچییگ و شاره‌گه له‌وه‌ر پاكه‌و نه‌كردنى، بووگه‌نى و پیسى خواردیه‌سه‌ى، ئه‌وه سه‌ربار هاتن عه‌ره‌به‌یل له دیاله و خانه‌قین و جه‌له‌ولا ئه‌را كه‌ركووك و كه‌سیش نوایان نیه‌گرى و پرسیاریش كه‌ید ك ئه‌گه‌ر ئى شاره بى حاكمه تا بزانیم؟!!
له ئاخریشه‌و ئى كاروه‌ده‌سه هه‌ڕه‌شه‌ى وه‌كار هاوردن چه‌ك ده‌ید و ئویشید ك وه‌كارهاوردن هێز چه‌كدار دژ وه‌ى سیاسه‌ته‌یله هیمان وه‌ختى نه‌هاتیه، وه‌لى ئه‌گه‌ر وه‌ختى باید، ئه‌وه له لایه‌و وه‌ك ئاوخواردنه...
ئیمه وه‌ك هاووڵاتیه‌یل كورد له ده‌یشت هه‌رێم كوردستان بایه‌سه چه‌ن پرسیاریگ بكه‌یمن ك باوه‌ڕ كه‌م هه‌ق خوه‌مانه!!
یه‌كم: مه‌گه‌ر هه‌ر وه‌قسه‌گان خوه‌دانه‌و دیار نیه، ك خوه‌دان ئى كاروه‌ده‌سه‌یله ڕه‌سانینه‌سه ئى پۆسته‌یل گه‌ورا له شار كه‌ركووك، ئه‌ى دى ئیسه چه قومیاس، تا ئه‌وه‌نه ئى كابرایه‌یله خه‌مسه‌رد بوون له بان مه‌سه‌له‌یگ نه‌ته‌وه‌یى، ك خوین هه‌زاران شه‌هید و ماڵویرانى و ئاواره‌یى مه‌ردم بیچاره كریاسه قوربانى؟؟
دویم: یه‌كیگ له خاڵه‌یل تایبه‌ت وه ئاده‌میزاد كورد ئه‌وه‌سه ك هه‌میشه دووس پاكى وته‌میسى خوه‌ى وده‌ورو گردى دیرى؛ ك مایه‌ى سه‌رسوڕمان لایه‌نه‌یل وه‌رانوه‌ره، و هه‌میشه دگان نه‌نه ئى ڕاسیه و ئویشن : وه‌ڵا برا ئیوه‌ى كورد فره‌پاك و ته‌میسین و خوه‌زه‌و وه‌و كه‌سه هاوساییدان كه‌ید!! ئه‌رى ئى كاروه‌ده‌سه‌یله توان وه‌ى شیوه ئه‌و مه‌ردم هاورده له‌ى شاره بیزار بكه‌ن ك وه قه‌وڵ ئه‌و كاروه‌ده‌س گه‌ورا بووگه‌ن و پیسه... دیاره یه چه‌ك نوویگه و بایه‌سه (به‌رائه‌ت ئختراع) ئه‌را كاروه‌ده‌سه‌یل كورد له كه‌ركووك ده‌ربكه‌یمن!!
سێیم : فره‌كه‌س له‌و جه‌ماوه‌ر كورده ك له سه‌ره‌تاى ڕمیان ڕژیم وه‌رین وه دڵخوه‌شیه‌و هاتنه‌و ئه‌را ئه‌و ناوچه‌یل ڕه‌سه‌ن خوه‌یانه ك وه‌زوور له تى ده‌ركریان و خه‌و وه‌وه دین ك سه‌رده‌م زوڵم و سته‌م گوزه‌یشت و سه‌رده‌م خوه‌شى و شادى ده‌سكرده‌پى و خوین شه‌هیده‌یلیان و قوربانیداینیان له كیس نه‌چوى، وه‌تایبه‌تى له كه‌ركووك و خانه‌قین و مه‌نه‌لى و ئه‌و ناوچه دابڕیایه‌گانتر كوردستان، وه‌لى دویاى ماوه‌یگ ئه‌را فره كه‌س ئاشكرا بوى ك كاره‌گه وه‌ى جووره نیه و، شماره‌یگ وه‌رچه‌و له‌لیان دوباره هه‌وگله‌و بوین ئه‌را شوونه‌یل غه‌ریبى، ك ده‌یان ساڵ وه ئه‌زره‌ته‌و بوین له‌لى قورتار بوون!!!
هه‌قمانه بپرسیمن تاوان كیه: 1- كاروه‌ده‌سه‌یل كورد ؟2- تیرۆر و تاقمه‌یل توندڕه‌و؟ 3- فه‌رق و جیاوازى كردن له ناوبه‌ین قوربانى و جه‌لاد؟ چوینكه وه‌گووره‌ى مادده‌ى 140 ده‌ستوور (ك هیمان كاروه‌ده‌سه‌یل كورد خه‌و وه جیوه‌جیكردنى دوینن)، 20 ملیۆن دینار و پارچه‌یگ زه‌وى ده‌یده جه‌لاده‌گه و ته‌نیا نیمه‌ى ئه‌وه ده‌یده قوربانیه‌گه، ك هیمان ماڵه‌گه‌ى خوه‌ى نه‌سه‌نیه‌سه‌وه و، جه‌لاده‌گه دویاى وه‌رگردن پویله‌گه‌یش قه‌بوول نیه‌كه‌ى كه‌ركووك بیلیده جى.
چوارم :ئیمه‌ى كورد، وه جه‌ماوه‌ر و كاروه‌ده‌سه‌یله‌و، هه‌میشه له‌بان ئه‌و ڕاسى تاریخییه جه‌خت كه‌یمن و ئویشیمن ك كه‌ركووك شاریگ كوردستانیه و كورد له‌تى تا ئیسه‌یش زۆرینه‌س؛ وه‌لى له ئاكامه‌گان هه‌ڵوژاردنه‌گان 7 ئادار ئه‌را په‌رله‌مان عیراق، نیمه‌ى كورسیه‌گان كه‌ركووك كه‌فته ده‌س لایه‌ن وه‌رانوه‌ر ...هووكار ئه‌یه چه‌س؟ئایا ئیمه درووزنیمن؟ یا لایه‌ن وه‌رانوه‌رمان وه گووره‌ى به‌رنامه‌یگ كاریگه‌ر كار كه‌ید ئه‌را چه‌سپانن ئه‌و درووه ك ڕژیم وه‌رین ده‌یان ساڵ ئه‌راى كار كرد و كورد له كه‌ركووك وه‌كه‌مینه شماره‌كرد؟
په‌نجم :وه‌گووره‌ى ئه‌و هه‌واڵ و ده‌نگوباسه‌یله ك ڕووژانه له كه‌ناڵه‌یل ته‌له‌فزیۆنى جیاجیا دوینیمن و ژنه‌فیمن، بارووه‌زع ئاسایشى یا ئه‌منى شار كه‌ركووك گه‌نه و هه‌میشه ته‌قینه‌وه‌و و تیرۆر كردن له‌تى ئه‌نجام گرید، وه‌تایبه‌تى له‌و ناوچه‌یله ك زوورینه‌یان عه‌ره‌به، و هه‌میشه لایه‌ن كوردى شانازى وه‌وه كه‌ید ك گه‌ڕه‌كه كوردیه‌گان كه‌ركووك تیرۆر و تیرۆریست له‌تیان نیه و بار ئاسایشییان خاسه ... له‌یرا پرسیارمان ئه‌وه‌سه ك ئه‌راچه خێزانه‌یل عه‌ره‌ب وه‌ى شماره‌ى گه‌ورا ڕوى كه‌نه شار كه‌ركووك و ئه‌و شوونه‌یل خوه‌یانه وه‌جى هیلن ك ئه‌را خوه‌یان فره ئارام و خاسه و تیه‌ن له شاریگ نیشن ك وه‌گشت پێوه‌ره‌گان وه‌كار نیشتن نیه‌تیه‌ى ئه‌رایان و بار ئاسایشى له‌تى خه‌راوه... ئایا ئه‌یانه چ قه‌وڵ و واده‌یگ له لایه‌ن وه‌رانوه‌رمان وه‌رگردنه ك وه‌ى شیوه مل بنه‌ن ئه‌را شار كه‌ركووك وچ ئه‌جندایگ هاوه شوونیانه‌و؟!!
شه‌شم:هه‌میشه سه‌ركرده‌یل عیراق نوو و وه‌تایبه‌تى سه‌ركرده‌یل كورد خوه‌مان باس ئه‌وه كه‌ن ك سه‌رده‌م وه‌كارهاوردن چه‌ك گوزه‌یشت و دى باوى نه‌مه‌نیه و بایه‌سه وه پێوه‌ره‌یل ئى سه‌رده‌مه ك سه‌رده‌م دیموكراسى و دیالۆگ و مشتومڕ سیاسیه ڕه‌فتار و مامه‌ڵه‌ت بكه‌یمن وه‌ل ئه‌و كێشه‌یله ك بوونه تویشمانه‌و... دیاره ئى كاروه‌ده‌سه، تازه تازه ڕه‌سیه‌سه ئه‌و ڕاسیه ك ئه‌وه‌گ وه‌زوور له‌لید بریاس، بایه‌سه وه‌زوور بسینیده‌وه‌ى، چوینكه وه‌ك په‌ند یا مه‌سڵه‌ت كوردى خوه‌مان ئویشى یانه دى : دگانیان خوینین بویه و تازه واز له گه‌نجینه‌یگ نیه‌تیه‌رن ك وه په‌تى كه‌فتیه‌سه گیریان... له‌یرایشه پرسیمن ئایا هه‌ق نه‌وى له‌سه‌ره‌تاى ڕمیان ڕژیم وه‌رین ئه‌و زووره وه‌كار باوردیا ك ئویشى له‌لایه‌و جوور ئاوخواردنه، وه‌تایبه‌تى ك زوورمى ئه‌و هاورده‌یله له ترس هێز پێشمه‌رگه‌ى كوردستان سه‌رخوه‌یان هه‌ڵگردن و تا مه‌ڵوه‌نه‌یل خوه‌یان گت نه‌كردن، ئیسه تازه تازه تواید هه‌ڕه‌شه‌ى وه‌كارهاوردن چه‌ك بیه‌یده مه‌ردمیگ ك وه‌گووره‌ى به‌رنامه‌یگ گه‌ورا ئاماده‌كریانه ئه‌را گشت ئه‌گه‌ر یا ئحتمالیگ ، وه‌تایبه‌تى ك ماكینه‌ى ڕه‌سانن یا ئعلام گه‌ورایگ ها وه‌شوونیانه‌وه و له‌وه سه‌ركه‌فت ك: قوربانیه‌گه (ك كورده) بكه‌یده (جه‌لاد) و جه‌لاده‌گه ك وه‌زوور شاره‌گه داگیركردیه بكه‌یده قوربانى و ڕاى گشتى عیراقى و عه‌ره‌بى و ته‌نانه‌ت جه‌هانییش وه‌ى چشته قانع كردیه، له‌وه‌ختیگ ك لایه‌ن ڕه‌سانن كوردى كز و لاواز یا زه‌عیف بوى له ڕه‌سانن په‌یام ئه‌و مه‌ردم زوڵملیكریایه، ك ده‌یان ساڵ چه‌وه‌ڕى ده‌رفه‌ت تاریخییگ چوى یه بوین، تا جاریگتر بانه‌و ئه‌را خاك شار و نیشتمان خوه‌یان!!!