شەفەق نیوز- بەسرە

خاو مامناوەند بەسرە بەرزەوبۊنیگ دیار لە نرخەیل وەخوەیەو دی لە ماوەی مانگ ئەیلول 2026، تا ناوەند نرخەگەی بڕەسێدە 108.93 دۆلار ئەرا هەر بەرمیلیگ، لە بەراورد وە 82.04 دۆلار لە مانگ ئاب، وە زیایبۊنیگ مانگانە کە رەسیە 26.89 دۆلار، و یەیش وەپەی راپۆرت ریخراو دەوڵەتەیل هەناردەکار نەفت "ئۆپێک" ئەرا مانگ تشرین یەکەم ئیسە.

 ئاژانس شەفەق نیوز، چەوی کەفتە راپۆرتەگە کە نیشانی دا، کە سەوەتەی بنەڕەتی ئۆپێک بەرزەو بۊە ئەرا 110.59 دۆلار ئەرا هەر بەرمیلیگ لە ئەیلول، لە وەراورد وە 86.44 دۆلار لە مانگ گوزەشتە، وە زیایبۊنیگ کە رەسیە 24.15 دۆلار ئەرا هەر بەرمیلیگ.

 لەبان ئاست خاوەیل ترەک، نرخ خاو مامناوەند بەسرە بەرزەو بۊ ئەرا ئاستیگ نزیک لە خاو سووک عەرەبی کە رەسیە 109.02 دۆلار ئەرا هەر بەرمیلیگ، لە وەختیگ خاو موربان ئیماراتی 115.39 دۆلار تومار کرد، و خاو برێنت 116.89 دۆلار، و خاو مامناوەند خوەرئاوای تەکساس ئەمریکی 96.38 دۆلار ئەرا هەر بەرمیلیگ.

 ئۆپێک بەرزەوبۊن نرخ خاوە جەهانییەیل بەساو وە شڵەژانەیل دابینکردن و رخەیل بارکردن لەڕی تەنگەی هورمز، بیجگە لە زیایبۊن داواکاری لەلایەن پاڵاوگە ئەوروپییەیلەو لەبان سەرچەوەیل دابینکردن جیگر لە نەفت خاو، وەرد کاریگەربۊین ئەو دابینکردنەیلە کە لە خوەرهەڵات ناوڕاسەو تیەن.