زوان حزب به‌عس قسه كه‌ن له‌گشت هه‌واڵ و باوه‌ت و نویساننه‌یلیان، وه‌لى نیه‌زانیم وه چ فكره‌یگه‌وه ئى قسه‌یله كه‌ن و توان ڕوى وه‌ڕوى قه‌یران و گرفته‌یل بوونه‌وه! ك له‌ساڵ 2003 له‌وه‌خت هاتن له‌شكر ئه‌مریكا ئه‌را عراق حزبیگ وه‌و توانایى و گه‌وراییه‌وه ك خاوه‌ن ئه‌زموون و شاره‌زایى فره‌یگ بوى نه‌زانست چوین خوه‌ى قورتار بكا له‌ده‌س ئه‌و كاره‌سات مه‌ردمیه ك رویداو شوونه‌وار خراو له كوشتن و به‌دبه‌ختى هیشته‌جى. ئه‌وه بوى ده‌س خراویگ له‌لى وه‌شیاو هه‌ڕه‌كیا، له‌شوون ئه‌وه ئه‌وه‌یش كه‌فته شوون هووكار ئه‌و كاره‌سات و ڕویداگ سه‌خته‌و دویاخریش له‌وه‌ختیگ له نیسان 2003 وه ته‌واوى رمیا بایه‌س بوى سه‌ركرده‌یل به‌عس دگان وه هه‌قا بناتان وه بوونه‌ى غه‌ڵه‌ته‌یل گوزه‌یشته‌یان و دى خاستر ئه‌وه بوى ئاڵشتكارى و راسه‌وكردن بنه‌ڕه‌تى بكردان له‌قسه‌و ختابه‌یلیان و له‌هه‌مان وه‌خت هووكاره‌یل شكه‌ست كویه‌نیان وه كرده‌وه‌ى تازه ئه‌را واقع تازه ئاڵشت بكردان و زوان هه‌ڕه‌شه‌و قسه‌ى خراو ناوردانه كار و باوه‌ڕ وه زوان مه‌نتق و گفتوگوو دیموكراسى بكردان نه‌ك وه‌ل نه‌یاره‌یل حزبه‌گه‌یان، به‌ڵكوو وه‌ل ئه‌ندامه‌یل خوه‌یاناو گشت گوزه‌یشته‌یگ فه‌رامووش بكردان جویر دژایه‌تیكردن و زوڵم و زوور و خراوه‌كارى و له‌هه‌مان وه‌خت كاریگ بكردان ك متمانه‌ى خوه‌یان باوردانه‌وه ئه‌را مه‌ردمان ملله‌ته‌یل عراق له تازه‌وه.
وه‌لى ئه‌وه‌ك ئمڕوو له به‌عسیه‌یل دوینیمه‌ى چشتیگ تره‌و زویتر ڕوى نه‌یاگه، ك ئه‌ویش ئه‌وه‌سه حزب به‌عس تواس وه زوور پویل و چه‌ك دوباره خوه‌ى بچه‌سپنیگ له‌شوون ئه‌وه‌ك شكه‌ست هاوردو ده‌سڵات حزبه‌گه نه‌مه‌ند و گشت بنه‌ماو سه‌ركرده‌یلى ته‌رفتوینه بوین و گوم بوین له‌ناو ده‌ریاى ترسناك سه‌رده‌م و بوینه چشتیگ له گوزه‌یشت جویر ئه‌وه‌ك هه‌ر نه‌ویه، ك ئه‌ویش وه‌ك حزب موسلینى و حزب هتله‌ر و حزبه‌یل تر سه‌رنه‌كه‌فتگ له تاریخ. وه‌لى حزب به‌عس یا ئه‌وانه‌ك مه‌ندنه‌وه له‌لى، بڕیار ئه‌وه دان خوه‌یان بخه‌نه زندانیگ ك خود خوه‌یان دروسى كردن و له‌شت دیواره‌یل ئه‌و زندانه‌وه چشته‌یلیگ بكه‌ن ته‌نیا ده‌نگیان بژنه‌فیه‌یگ و هویچ تر و دى له‌یوا له‌لیان بایگ ك خه‌و بوینن وه‌و ماڵ و باڵه‌خانه‌یله ك له‌كنار ئاوه‌یل و له‌و شوونه‌یل خوه‌شه دروسى كردوین ئه‌را خوه‌یان و نیه‌توان باوه‌ڕ وه ئه‌وه بكه‌ن ك خانه‌نشین (تقاعد)كریان و له‌كار كه‌فتن و ملله‌ت عراق گشت ئه‌و ڕووژه‌یل گوزه‌یشته خسته پشت خوه‌ى و پیشوازى له خوه‌ر تازه‌و ڕووژگاره‌یل خوه‌ش كرد.