شەفەق نیوز- واشنتۆن/ مستەفا هاشم
شیەوکەر لە پەیمانگای واشنتۆن و وەرپرس وەرین لە ئەنجومەن ئاسایش نەتەوەیی ئەمریکی، ئەندرۆ تابلەر، ئمڕوو یەکشەممە، دووپات کرد کە ئاییندەی پەیوەندییەیل ناوەین بەغداد و واشنتۆن وەرەو دروسکردن پەیوەندییگ ستراتیژی و دوولایەنەی راسەوخۆ چوود، و دووپاتیش کرد لەبان ئەوەگ کە ئارامی عراق و توانای لەبان کۆنترۆڵکردن خاکەگەی هوکاریگ بنەڕەتیە ئەرا وەردەوامبۊن ئی هاوبەشییە.
تابلەر، لە دیداریگ تایبەت وەرد ئاژانس شەفەق نیوز، وت، وڵاتە یەکگرتگەیل "هەوەجە وە پەیوەندییگ ستراتیژی وەرد عراق دیرێد"، و دیاری کرد کە سەختیەگە پەیوەندی دیرێد وە توانای حکومەت عراقی ئەرا وەدیهاوردن سەقامگیری و کارکردن وەرد واشنتۆن ئەرا کەمەوکردن دەسەڵات ئیرانی، و هیشتن ریخریاگ داعش وە لاوازی و وەدیهاوردن بەرژەوەندییە هاوبەشەیل.
وتیش کە بۊین حکومەتیگ عراقی کە تەقلا ئەرا ئی بەرژەوەندییەیلە نەیەێد، چ لە بەغداد یا واشنتۆن، شایەت بوودە مدوو خەراوبۊن پەیوەندییەیل، وەلی وەیجۊرە دوینێد کە پەیوەندییەگە "لە وەخت ئیسە وە خاسی مینێد".
لە ناوەین هاوسا و هیزە هەرێمییەیل
لەباوەت ئەگەر ئەوەگ پەیوەندییە ئابوورییەیل عراق وەرد ئیران و تورکیا و رووسیا و چین گەرمتر بوود دۊای کشیانەو ئەمریکی، تابلەر وت کە عراق "وڵاتیگە جەهان دەورەی دایە"، و سروشتییە کە پەیوەندییەیل تونیگ وەرد گشت لایگ دروس بکەێد.
وەلی دیاری کرد کە ناسکترین رخەیل لای واشنتۆن پەیوەندی وە ئیران و بەرزەوبۊن تونڕەوی ئیسلامی چۊ داعش دیرێد، و هوشیاری دا لەوەگ نزیکەوبۊن عراق وە شیوەیگ فرە لە ئیران خەێدەی وەرانوەر "کیشەیل ئاییندەیی وەرد واشنتۆن"، و ئومید خوەی نشان دا ئەرا وەردەوامبۊن حکومەت عراقی لە هاوسەنگکردن ئی بەرژەوەندییەیلە.
کوردستان دۊای کیشیان
لەباوەت شوینەوار کشیانەو ئەمریکی لەبان هەرێم کوردستان، تابلەر وت کە کارەیل "سەختتر بوون" لەوەر ئەوەگ هەرێم کوردستان هاوبەشیگ فرە نزیکە ئەرا وڵاتە یەکگرتگەیل، وەلی لە خود وەختەگە دووپات کرد لەبان ئەوەگ هیزە کوردییەیل لە خاسترینم لەڕوی مەشقپیداین لەناو عراق.
وەرپرسە ئەمریکییەگە، داوا لە حکومەت عراقی کرد بنووڕێدە ئی هیزەیلە چۊ "هاوپەیمانیگ قایم و بنەڕەتی" لە رۊوەڕۊبۊن تونڕەوی و هیشتن دەسەڵات ئیرانی وە دۊری.
ئاسایش نەفت و لۊلەیل
لەباوەت رەوانەی نەفت عراقی، و وە تایبەت وەرد گەورابۊن رۆڵی چۊ رێڕەویگ جیگر ئەرا هەناردەکردن نەفت کەنداو لەڕی کڕەیل لۊلە، تابلەر وەیجۊرە دی کە لۊلەیل نۊنەرایەتی هوکاریگ کەن ئەرا رەدبۊن لە گەروو هورمز، وەلی یەیش هەوەجە وە ئامادەکارییەیل ئەمنی تونیگ دیرێد.
وتیش کە "نییەکرێد میلیشیای چەکدار بڵاو بوون و کۆنترۆڵ جومگەیل دەوڵەت بکەن و چەوەڕی ئەوە بکەید کە کارەیل خەراوکاری رۊ نەیەن، و کەسیگ بەرهەمکاری لەی پرۆژەیلە نیەکەێد تا ئاسایش قایم و ئارام نەوود، و وە ئەوەیش هەژماری کرد کە وەدیهاوردن یە وە سەخت دەرکەفێد لە سای ئامادەنەۊن باڵەیل ئەرا دانان چەکەیلیان، وەپەی مەزەنەی خوەی.
دانان چەک و چارەسەر بنەڕەتی
لەباوەت چارەسەرەگە، تابلەر، دووپات کرد لەبان گرنگی پەیاکردن سەرکردایەتییگ عراقی کە چارەسەریگ بنەڕەتی دابنەێد ئەرا کیشەی چەک لە دەیشت کۆنترۆڵ دەوڵەت، نەگ تەنیا رێککەفتنیگ وەختی.
دیاری کرد کە وسانن پەلامارەیل ئەرا ماوەیگ وەختی هاوەخت وەرد دروسکردن ژیرخانیگ چۊ کڕەیل لۊلە ریگری لە ئەگەر ئامانجگردنیان لە ئاییندە نیەکەێد، یا دەرکەفتن گرووپەیل ترەک، و داوا کرد ئەرا خستنە ژیر کۆنترۆڵ حکومەتیگ یەکگرتگ ئەرا گشت چەکەیل، یا پارێزگاریکردن لە هیزەیل ئەمنی تون و ناوخۆیی کە نۊنەرایەتی هەمەجۊری عراقی بکەن ئەرا مسۆگەرکردن ئارامی.
گلەوخواردن هیزەیل ئەمریکی
لەباوەت ئەگەر گلەوخواردن هیزەیل ئەمریکی ئەرا عراق لە رەوش خەراوبۊن رەوش ئەمنی لە ئاییندە، تابلەر وت کە ئەوە "چەوەڕیکریاگە"، وەلی گومان خوەی نشان دا لە رۊداینی لەبان هەردگ مەودای کوڵ یا دریژماوە.
لەباوەت توانای هیزەیل عراقی لەبان پاراستن ئاسایش وە تەنیا، وت کە یە شایەتە ئەگەر هەماهەنگی و مەشقپیداین وەرد وڵاتە یەکگرتگەیل دۊای کیشیانی وەردەوام بوود، و هوشیاری دا لەوەگ پشتگووشخستن یە یا رۊداین ناکۆکییەیل سیاسی ناوخۆیی شایەت رەوش ئەمنی بخەێدە وەرانوەر رخ.
دۊای هاوپەیمانی ناودەوڵەتی
لەباوەت بانان هاوبەشی ئەمنی لە ناوەین عراق و وڵاتە یەکگرتگەیل دۊای کووتاییهاتن ئەرک هاوپەیمانی ناودەوڵەتی، تابلەر ئەگەر "پەیوەندییگ دوولایەنەی راسەوخۆ لە ناوەین هەردگ وڵاتەگە" خستە وەرین.
وتیش کە گرنگترین پرسیار خوەی دوینێد لە شوینەوار کووتاییهاتن ئۆپەراسیۆن "ئیرادەی پۆڵاین" لەبان توانای وڵاتە یەکگرتگەیل لەبان چەودیاریکردن ریخریاگ داعش و هیشتنی وە لاوازی، وتیش هیزە کوردییەیل لە شان وڵاتە یەکگرتگەیل لە هەرێم کوردستان و باکوور سوریا ماوەی گشت پەلامارەگە لە دژ ریخریایەگە جەنگینە.
و پرسیار کرد لەباوەت ئەو شیوە کە واشنتۆن لە ئاییندە پشت وەپی بەسێد ئەرا کارکردن وەرد هیزە کوردییەیل دۊای کووتاییهاتن ئەرک هاوپەیمانیەگە.
لەباوەت ئەگەر مەنن هیزەیل ئەمریکی لەناو باڵیۆزخانە یا کونسوڵگەری، تابلەر کووتایی وە قسەیلی هاورد وە وتنیگ کە بڕیگ لە هیزەیل مینن ئەرا پاراستن باڵیۆزخانە و کونسوڵگەرییەگە، وە ئەوەیش هەژماری کرد کە یە چشتیگ ئاساییە، وەلی دیاری کرد کە ئەو شمارە گەوراگانە کە ماوەی جەنگەگە و دۊای ئەوە بۊن وە تەواوی کیشیەنەو.