رخه‌وبردن و جه‌مكوشی ته‌نيا هووكار مه‌ندنه‌وه‌ی بوی له‌و ماوه‌ی دويرودريژه له‌ده‌سڵات ك هه‌ر رووژيگی ئه‌را عراقيه‌يل وه ساڵيگ بوی .
ديارترين تاريف و تايبه‌تمه‌نديه‌يل ده‌سڵات به‌عس و ، وه‌تايبه‌ت قوناغ حوكم سه‌دام حسێن ، ئه‌ويش قه‌وره‌يل وه‌جه‌م و كيمياواران و ئه‌نفال و كوشتن و بی سه‌روشوونكردن وه‌جه‌م خه‌ڵك عراق بوی . ئيسه‌يش ك عراق له‌و رووژه‌يل سيه په‌ڕيه‌سه‌وه‌و كووتايی هاتگه وه قوناغ دكتاتۆريه‌ت و ده‌سڵات به‌عس ، شوونه‌واره‌يل ئه‌و حزبه له‌ناو وده‌يشت عراق خه‌و وه رووژگاريگ گوزه‌يشت و ئه‌وسای خوه‌يانه‌وه دوينن و هيمان ده‌سوه‌ردار هوير دكتاتۆريه‌ت نه‌وينه‌و ئاماده نين وه‌ك حاڵه‌تيگ ژياری يا حزاريانه‌و شيوه‌ی ئيسه له‌ناو حزب و ريكخرياگه‌يل سياسی و ته‌نانه‌ت ده‌سڵاته‌يل ره‌سمييش هويريگ له‌گوزه‌يشت خوه‌يان بكه‌ن و بانه بان وه‌زع ئيسه‌ی تازه له‌ی عراق ئمڕووه ، ك له‌يوا دياره له‌چوارچيوه‌ی ئی جووره پرووسه‌يگ ديمه‌نه‌يل خويناوی گوزه‌يشته‌يان شه‌رمه‌زاری ئه‌ڕايان تيه‌ريگ و زانن له‌ماوه‌ی ده‌سڵات خوه‌يان وه‌رانوه‌ر وه ملله‌ته‌گه‌يان چه ئه‌نجام دانه .
ئه‌وان ئيسه‌يش له‌ناو عراق خوين رشنن و پرووسه‌ی جه‌مكوشی له‌ناو شوونه‌يل گشتی و بازاڕ و شوونه‌يل كاركردن و جه‌مه‌وبوين مه‌ردم ئه‌نجام ده‌ن و ، له‌ده‌يشتيش سه‌ركرده‌يليان پلان ئه‌رايان دانه‌ن و حكوومه‌ت وه‌همی ئه‌را وه‌خت هاتنه‌دی خه‌و هاتنه‌وه‌يان دانه‌ن و نيه‌توان له‌ناو خه‌وه‌يليانيش هاوكار و شه‌ريك داشتوون له‌ناو ده‌سڵات و پرووسه‌ی سياسی . ئيسه‌يش ئه‌و حزبه باوه‌ڕ وه‌ی هه‌ڵوژاردنه‌يله نه‌يريگ و هه‌ر ئه‌وه ها له‌هه‌گبه‌ی ك له‌سه‌رده‌م ده‌سڵاتی داشته‌سه‌ی .
له‌ی رووژه‌يله ك قسه‌و باس له‌بان بڕياره‌يل ده‌سه‌ی داد و پرس وپرسكاری كريه‌يگ له‌باوه‌ت دويره‌وخستن به‌عسيه‌يل و ئه‌وانه‌ك بانگه‌واز كه‌ن ئه‌را هوير به‌عس له‌به‌شداری هه‌ڵوژاردنه‌يل وه‌ك كانديد يا موره‌شح ناو قه‌واره‌يل ، ك ئه‌و چاره‌سه‌ريشه فره‌جار خريه‌يگه روی ك كريه‌يگ به‌عسيه‌يل له‌ناو پرووسه‌ی سياسی عراق تازه به‌شداری داشتوون وه‌ه‌و مه‌رجه تاوانه‌يل گوزه‌يشت سه‌ركرده‌يليان دژ وه ملله‌ته‌يل عراق رسواو مه‌حكووم بكه‌ن و دگان وه‌غه‌ڵه‌ته‌يليانا بنه‌ن و دويای ئه‌وه‌يش قه‌وڵ ئه‌وه بيه‌ن ك كار سياسيان له‌چوارچيوه‌ی ريڕه‌و ديموكراسی و ته‌وافقی نيشتمانی بووگ ك عراقيه‌يل له‌بانی پيكهاتنه‌و ده‌ستوور هه‌ميشه‌يی عراق له‌بانی دانرياگه ، وه‌لی كيشه‌گه ها له‌ورا هيمان ئه‌وانه‌ك خوه‌يان وه ميراتگر حزب به‌عس زانن و خه‌و هاتنه‌وه‌يان ئه‌را بان كورسی ده‌سڵات له هويريان چه‌سپياگه نيه‌توان واز له فكره‌ی خوه‌يان بارن و ئاماده نين له هويچ حاڵه‌تيگ رووژگاره‌يل گوزه‌يشتيان بخه‌نه هوير خوه‌يان ئه‌را ئه‌وه‌ك كاولكاری و تاوانه‌يليان بوينن و دوياخر وه‌ك غه‌ڵه‌ت تاريخی بزاننه‌ی . مه‌عنای ئه‌وه‌سه به‌عس وه‌ك حزب و ئايدۆلۆژيا نيه‌تويه‌نيگ ده‌سوه‌ردار هويرو ئه‌ڕای چوين و سايكۆلۆژيای شه‌ڕه‌نگيزانه‌و باڵاده‌سی خوه‌ی بووگ و ئاماده‌س ملله‌ت و نيشتمان و گشت به‌رژه‌وه‌نديه‌يل وڵات بكه‌يگه قوربان وه‌ديهاوردن ئامانجه‌يل و مه‌رام خوه‌ی .