* ئه‌را سه‌رجه‌م هاوڵاتیه‌یل نیشتمانپه‌روه‌ر و شه‌رافه‌تمه‌ن عراقی
* ئه‌را بنه‌ماڵه‌و كه‌سوكار شه‌هیده‌یل وه‌ده‌س رژیم رمیاگ به‌عس و كرده‌وه‌یل تروریستی
*ئه‌را گشت ئه‌وانه‌گ ئه‌ڵگر په‌یام گه‌ورای ئنسانین
* ئه‌را سه‌رجه‌م خاون وژدانه‌یل و پشتیوانيكه‌ره‌یل له حه‌ق خوریاگه‌یل
سڵامیگ گه‌رم برایانه
گشتمان زانیم تویژ یاشه‌ریحه‌ی كورده‌یل فه‌یلی ك یه‌كیگ له تویژه‌یل ره‌سه‌ن كومه‌لگای عراقین كه‌فتنه‌سه وه‌ر دڕندانه‌ترین تاوانه‌یل كوشتار و كوچ زوره‌مللی رژیم گوڕ وه گوڕ به‌عس و وه‌گوره‌ی راپۆرت رێكخریاگه‌یل ناوده‌وڵه‌تی ته‌نیا له ساڵ 1980 زیاتر له نیم ملیون ژن ومناڵ و پیروجوان له شوون وه‌تاڵان بردن وه‌زوور ماڵ وموڵكیان وه‌ره‌و سنووره‌یل ئیران بریان و نزیكه‌ی پانزه هه‌زار جوان كورد فه‌یلیش له زندانه‌یل تیه‌ریك به‌عس گله‌و دریان و دویاخر له تاقیگه‌یل یاموخته‌به‌ره‌یل چه‌كه‌یل كیمیاوی و بایولوجی وه‌شیوه‌ی ده‌سه‌جه‌می بی سه‌روشوون كریان و تائیسه‌یش شوون مه‌زاریان په‌یا نه‌كریاگه.
وه‌خاتر گه‌ورایی ئی تاوانه و ئه‌را ئه‌وه‌گ حه‌ق ئه‌را حه‌قدار گله‌و بخوریه‌ێ و تاوانباره‌یل ئه‌و كاره‌ساته وه‌سزای یاسایی خوه‌یان بڕه‌سن دادگایگ تایبه‌ت ئه‌را دادگایی كردن سه‌ران رژیم به‌عس دامه‌زریا و له شوون چه‌نه‌ها دانیشتن و گووش داین وه‌شایه‌ته‌یل تاوانه‌گه و له‌یه‌كه‌وداین ئه‌و به‌ڵگه‌نامه‌یله ك خریانه وه‌رده‌س دادگا, بڕیاره رووژ 29 ئی مانگه دوسیه‌ی كورده‌یل فه‌یلی یه‌كلاوه بكریه‌ێ و حوكم تاوانباره‌یل ده‌رچووگ, وه‌ی خاتره له سه‌رجه‌م هاوڵاتیه‌یل عراقی و گشت خاون وژدانه‌یل زینگ و هه‌میش له حزب ولایه‌نه‌یل سیاسی نیشتمانپه‌روه‌ر عراقی و رێكخریاگه‌یل كومه‌ڵگای مه‌ده‌نی و ده‌زگا ئعلامیه‌گان و سه‌رجه‌م كه‌ساتیه‌یل ئه‌كادیمی و رووشنهوير و ئه‌دیبه‌یل و شاعره‌یل و گشت پێكهاته‌یل ملله‌ت عراق ئه‌خوازیم ك هاوخه‌می و هاوده‌ردی وه‌ل براو خوه‌شكه‌یل كورده‌یل فه‌یلیدان بكه‌ين ئه‌را ئه‌وه‌گ تاوان رژیم به‌عس دژ وه كورده‌یل فه‌یلی وه‌تاوان له‌ناوبردن ده‌سه‌جه‌می یاجینوساید حه‌ساو بكریه‌ێ ئه‌را ئه‌وه‌گ حه‌ق ماددی ومه‌عنه‌وی خوه‌شك و برایه‌یلدان گوم نه‌وگ وحه‌ق وه‌حه‌قدار بڕه‌سیگ. چه‌وه‌ڕی هاوكاری و هاوده‌ریدان كه‌یم له‌ی كیشه‌ی ئنسانیه و ئه‌رادان ئاره‌زووی سه‌ربه‌رزی وسه‌رفرازی خوازیم.
خوه‌شك و برایه‌یل كورد فه‌یلیدان
24/11/2010