رابه‌ره‌یل گه‌ورایان له‌و زاته‌یله‌نه ك روح خودایى له‌تیان جیگیر بویه‌و هه‌ر یه‌كیگ له‌لیان له‌قوناغ و سه‌رده‌م جیاجیا كاریگه‌رى فره گه‌ورایگ داشتگه له‌بان په‌خشه‌وبوین و گه‌شه‌سه‌ندن ریچه‌ڵه‌ك یارسان ، ك یه‌كیگ له‌و رابه‌ره‌یل گه‌ورایشه (بالویل مایى) بویه.
وه‌گووره‌ى ئه‌وه‌ك له‌كتاو پیرووز سه‌ره‌نجام دیارده‌یگ ، بالویل مایى یه‌كه‌م كه‌سیگ بویه ك هه‌وڵ په‌خشه‌وكردن ریچه‌ڵه‌ك یارسان داگه ، ناو ته‌واو بالویل (عه‌مر كوڕ له‌هه‌ب)و له‌ناوڕاس سه‌ده‌ى دویم كووچى له لوڕستان هاته‌سه دونیا ، هه‌ر له‌سه‌ره‌تاى مناڵیه‌وه هه‌وڵ ئه‌را وه‌ده‌سهاوردن زانست داگه ، دویاى ئه‌وه‌یش كار كردگه له‌وه‌ر خاتر داناین ریچه‌ڵه‌ك دینى ك وه‌جووریگ تایبه‌تمه‌ندیه‌یل دینى كویه‌ن له‌تى مقه‌یه‌تیكریاگ بووگ ، ئه‌را ئى مه‌به‌سیشه له‌زێدوماواى خوه‌یه‌وه رویكرده‌سه هه‌ورامان و دڵنیا بویه له‌وه‌ك له هه‌ورامان مه‌سه‌له‌ى كاركردن ئه‌ڕاى گونجیه‌یگ و هاوڕاز و هاوفكره‌ى له‌و ناوچه فره‌ن ، دویاخریش وه‌مه‌به‌س خوه‌ندن زیاتر وه‌ل قه‌یریگ له یاره‌یلیا رویكرده‌سه به‌غداو له‌ورا له‌خزمه‌ت (ئیمام جه‌عفه‌ر سادق) سڵام خودا له‌لى بویه‌و له‌ژیر ده‌س ئیمام جه‌عفه‌ر خوه‌ندگه . بالویل مایى له‌دانیشتن و رى و ڕه‌سمه‌یل دینى ئه‌و سه‌رده‌مه ئه‌ڕاى چوینه‌یل عرفانى خوه‌ى ده‌رخستگه‌و هه‌ر له‌وه‌وه له‌لایه‌ن هاروون ره‌شیده‌وه فه‌رمان كوشتنى دریاگه وه‌تاوان (گومڕاو زندیق) ، ئمجا له‌بان راسپارده‌ى (ئیمام جه‌عفه‌ر سادق) خوه‌ى كرده‌سه شیت تا شمشیر له مل خوه‌ى دویره‌و بخه‌یگ و هه‌ر وه‌هاوكارى ئیمام جه‌عفه‌ر سادق تویه‌نستگه له‌به‌غدا ده‌ربچووگ و بڕه‌سیگه هه‌ورامان . ئمجا له‌ورایشه‌وه چیه‌سه‌ڕا (قرماسین = كرماشان ئیسه)و له‌تى نیشته‌جى بویه‌و ده‌سكرده‌سه په‌خشه‌وكردن ریچه‌ڵه‌ك دین یارسان و شماره‌ى فره‌یگ له په‌یڕه‌وكاره‌یل له‌ده‌ورى جه‌مه‌و بوینه . پایه‌ى دینى ئى زاته له‌لاى یارسانه‌یل فره گه‌وراس و له‌سه‌رده‌م خوه‌ى موریده‌یل فره‌یگیش داشت جویر (باوه لوڕه‌ى لوڕستانى ، باوه ره‌جه‌ب لوڕستانى ، باوه حاته‌م ، باوه نجووم لوڕستانى) ، ئمجا له‌وه‌ر خاتر زیاتر ئاشنابوین وه‌ى زاته یه‌كیگ له شاعر و عارفه‌یل گه‌وراى یارسان وه‌ناو (ده‌وریش نه‌ورووز سۆرانى) ك دانه‌ر یه‌كیگه له كه‌لامه‌یل یارسان وه‌ناو (كه‌لام دوریش نه‌ورووز سۆرانى) باس له بالوویل مایى كردگه‌و پله‌و پایه‌ى دینى به‌رزیگ داسه‌پى ، وه‌لى ئویشیگ سه‌ره‌تا مه‌ردم وه نه‌زان و دیوانه زانستنه‌سه‌ى ، هه‌ر له‌ى باوه‌تیشه‌وه له‌وه‌ر خاتر جواو ئه‌و مه‌ردمه ك ئى بالویل ماییه وه نه‌فام یا نه‌زان و دیوانه دانان ، ده‌وریش نه‌ورووز له‌تاریفكردن بالویل مایى وتگه : كى دیه كه‌سیگ دیوانه وه‌شیوه‌ى ئه‌و زاته له‌مه‌یدان گه‌ردوون ئه‌وه‌نه زاناو دانا بووگ ؟ دى ئه‌وه ده‌ركه‌فتگه له كتاو پیرووز یارسانه‌یل ك بالویل مایى یه‌كیگ بویه له‌و رابه‌ره‌یل گه‌وراى یارسانه ك هه‌وڵ زنگه‌وكردن دین كویه‌ن ئیران داگه له قاڵب تازه‌یگ.