شەفەق نیوز- بەغداد

فەرماندەیی پرۆسەیل بەغداد، ئمڕوو چوارشەممە، راگەیان بەسانن دوو کارگەی بی مووڵەت و لاداین 8 شوین کە کۊرەی تاوانن کانزایەیل لەخوەی گرێد، وەگەرد دەسگیرکردن شەش سەرپێچیکار لە خاوەنەیلیان، لە ناوچەی سەبع قسوور لە خوەرهەڵات پایتەخت.

 فەرماندەییەگە لە بەیاننامەیگ کە رەسیە ئاژانس شەفەق نیوز دیاری کرد، کە دەسەی فەرمان دیوانی (241285)، وە هاوبەشی وەگەرد مەفرەزەیل دەزگای ئاسایش نیشتمانی و پولیس ژینگەی رەسافە و شارەوانی شەعب، ئەرکەیلیگ ئەرا هۊردبینیکردن و بەسانن کارگەیل و کۊرەیل تاوانن کانزا بی مووڵەتەیل جیوەجی کردنە.

وتیش کە هەڵمەتەگە بۊە مدوو بەسانن دوو کارگە ئەرا بەرهەمهاوردن قاپوقاچاخ ماڵ، لەوەر پابەند نەۊنیان وە رێنماییە کارپیکریاگەیل، و لاداین هەشت شوین کە کۊرەیل تاوانن کانزایەیل لەخوەی گرێد لەوەر سەرپێچیکردنیان لە مەرجە ژینگەییەیل، لەوەر ئەوەگ بۊنەسە مدوو زەرەدەیل لەبان تەندروسی و بیوەیی هاووڵاتیەیل.

 فەرماندەییەگە باس  دەسگیرکردن شەش سەرپێچیکار لە خاوەنەیل ئەو شوینەیلە کرد، و دووپات کرد کە ئی رێکارەیلە لە چوارچیوەی کەمەوکردن پیسبۊن ژینگەیی تیەێد کە لە دەرچگن گازەیل و بووەیل هاوڕێ وەرد پرۆسەیل بەرهەمهاوردن کەفێدەو.

 لە وەختیگ زۊتر لە ئمڕوو، روانگەی "عراق سەوز" تایبەتمەن وە کاروبارەیل ژینگە، هوشداری دا لە دووارەبۊن دیاردەی بڵاوبۊن بووە گەنەیل لە بەغداد لەماوەی رووژەیل ئایندە دا، و ئەوەیش گلەو دا ئەرا وەردەوامبۊن سەرچەوەیل پیسبۊن و چارەسەرنەکردنیان وە شیوەیگ بنەڕەتی.

دانیشتگەیل بەغدای پایتەخت داد کەن لە بڵاوبۊن بووە گەنەیلیگ کە بڕیگیان وەسفی کردن وە تیکەڵبۊگ وە بوو کبریت، لە وەختیگ دانیشتگەیلیگ لە ناوچەیل باشوور پایتەخت دەسنشان کردن ئەرا ئەگەر گریەدانی وە سزانن گەناڵخە لە ناوچەی نەهرەوان و شوینەیل نزیک لە سەربازگەی رەشید.