حكوومه‌ت و به‌ژه‌وه‌ندیل گشتى په‌ك خست، وه‌تایبه‌تى له مه‌یدانه‌یل خزمه‌تگوزارى.
هاووڵاتیه‌ل عیراقى ك وه‌ده‌س گه‌رمى تاوسان و كه‌مى ئه‌و وزه‌ى كاره‌با ك ده‌وڵه‌ت ده‌یده‌ى پیان ناڵنن، ڕه‌خنه‌ى گه‌ورایگ له‌ى دویاكه‌فتنه گرتن دویاى ئه‌وه‌گ به‌شدارى له‌و هه‌ڵوژاردنه‌یله كردن ك له مانگ ئادار ئه‌نجام گرت و فره سوخت و تویڕه بوینه و تویش دڵڕه‌نجیان گه‌ورایگ هاتنه.
ده‌زگاى شه‌فه‌ق ڕاپرسییگ له‌ى باوه‌ته ئه‌نجام دا تا هه‌ڵوێست هاووڵاتیه‌یل عیراقى بزانید له‌و حاڵه‌ته ك ئى هه‌ڵوژاردنه‌یله دوباره‌وه بكریه‌ن و له‌ى ڕاپرسه فره‌كه‌س وتن به‌شدارى نیه‌كه‌ن و بڕیگ وتن ڕاى خوه‌یان ئاڵشت كه‌ن و كوت كه‌میگیان له وتن له‌بان ڕاى خوه‌یان مینن.
ئه‌را ئه‌وه‌گ زیاتر ڕووشنایى بخه‌یمنه بان ئى مه‌سه‌له چه‌ومان كه‌فته چه‌ن هاووڵاتییگ ك گوزارش له ڕاو ئه‌راى چوین خوه‌یان كردن.
هاووڵاتى موحسن عگێلى ئویشى:" په‌نج مانگ وه‌بان هه‌ڵوژاردنه‌گانه‌و ڕه‌ى بوى و هیمان سیاسه‌تمه‌داره‌یل نه‌تویه‌نستنه حكوومه‌تیگ دامه‌رزنن، و ئیمه‌یش سه‌رمان سوڕ مه‌نیه ك ئه‌گه‌ر هه‌ڵوژاردنه‌گان دوباره‌وه بكریه‌ن كى هه‌ڵوژنیمن؛ یا شایه‌د هه‌ر به‌شدارى نه‌كه‌یمن؛ یا ئه‌و كه‌سه‌یله هه‌ڵوژنیمن ك خه‌م نیشتمان و هاووڵاتیه‌یل هه‌ڵبگرن و بتویه‌نن چاره‌سه‌ر ئه‌را كیشه و گیرو گرفته‌گان بویننه‌و، نه‌گ خوه‌یان بوونه به‌شیگ له‌و گیروگرفته‌یله".
له‌لاى خوه‌یه‌و هاووڵاتى محه‌مه‌د عه‌بد حه‌سه‌ن وت:" ئه‌گه‌ر هات و هه‌ڵوژاردنه‌گان دوباره‌وه‌كریان من ڕاى خوه‌م ئاڵشت كه‌م ، چوینكه ئى ئه‌زموون یا ته‌جروبه ئه‌وه چه‌سپان ك ئه‌وانه‌گ هه‌ڵوژاردیمنه‌یان مایه‌ى متمانه و شایان ده‌نگه‌یلمان نه‌وین... من ئویشم به‌شدارى كردن له هه‌ڵوژاردنه‌گان كاریگ گرینگه له خاتر گوێڕانكارى و ئى كێشه و قه‌یران حازریه تاوان ده‌نگده‌ره‌یل نیه ، به‌ڵكوو تاوان سیاسه‌تمه‌داره‌یل هه‌ڵوژریایه".
هه‌ڵسووڕاو یا چالاك له كوومه‌ڵگاى شارسانى محه‌مه‌د ئه‌وسى جه‌خت له‌بان ئه‌وه كرد ك :" هه‌ڵوژاردن دیارده‌یگ ئه‌رێنى یا ئیجابیه له وڵاته‌یل پیشكه‌فتى، وه‌لى ئه‌وه‌گ له وڵاته‌گه‌مان ئه‌نجام گرت تویش مه‌ویسیمان كرد له‌وه‌ر پیشنه‌كه‌فتن ئۆپه‌راسیۆن سیاسى و دانه‌مه‌زرانن حكوومه‌تیگ بڕه‌سیده هاناى هاووڵاتیه‌یله‌و له لایه‌نه‌یل خزمه‌تگوزارى و زندگانى".
ئه‌وسى زیاتر وت:" سیاسه‌تمه‌داره‌یل خستنه‌مانه گیژاوه و تویش دڵڕه‌نجیانمان هاوردن دویاى ئه‌وه‌گ قه‌وڵه‌یل فره جوانیگ دانه‌پیمان، وه‌لى ئیمڕوو خه‌ریك زوورانن له بان كورسى و پۆسته‌یل، و ئه‌وه له هویریانه‌و چویه ك ئیمه ملله‌تیگیمن شایان ژیان ئازاد و كه‌رامه‌تداریگیمن جوور گشت ملله‌ته‌یل له وڵاته‌یل دیموكراتى پیشكه‌فتى".
له‌لاى خوه‌یه‌و نویسه‌ر و په‌یجووریكه‌ر زیا شه‌كه‌رچى وه‌ى جووره له‌ى مه‌سه‌له باس كرد:"ئه‌زموون ئه‌و هه‌فت ساڵه ك ڕه‌ى بوین وشیارى سیاسى نه‌ڕه‌سان ئه‌را ناسین ڕاسیه‌گه‌ى سیاسه‌تمه‌داره‌یل و هێزه‌یل سیاسى و هاووڵاتى و ده‌نگده‌ر عیراقى وه نیاز و حه‌ز گوێڕانكاریه‌وه چوى ئه‌را هه‌ڵوژاردنه‌گان و وه‌ختى هه‌ڵوژارد، كردار گوێڕانكارى ئه‌نجام نه‌یا ، به‌ڵكوو وه‌هه‌مان دیدگاى وه‌رین هه‌ڵوژارد ، و ئیمه ئه‌گه‌ر بویشیمن شایه‌د هه‌ڵوژاردنه‌گان دوباره‌وه بكریه‌ن له‌وه ترسیه‌یم ك هاووڵاتى له ئه‌زموونه‌یل وه‌رین په‌ند وه‌رنه‌گردوى".
شه‌كه‌رچى ئه‌وه‌یشه ڕووشنه‌وكرد ك :" ئیمڕوو هاووڵاتى تویش دڵڕه‌نجیان هاتیه دویاى ئه‌وه‌گ نووڕست ك ئۆپه‌راسیۆن سیاسى دویاى په‌نج مانگ له هه‌ڵوژاردنه‌گان هیمان له شوون خوه‌ى نه‌جمیه و گشت هێزه‌یل سیاسى تاوانبارن له‌ى باوه‌ته....".