به‌دبه‌ختى و كوشتن و بڕین و ده‌رده‌سه‌رى و ماڵویرانى فره‌یگ بوینه‌وه، تا كاره‌گه ڕه‌سیه ئه‌وه‌ك سه‌دام و داروده‌سه‌و خوینمژه‌یلى وه‌ته‌واوى ئنتقام له‌مه‌ردم بیتاوان بكه‌ن.
كورد و عه‌ره‌ب و توركمان و كه‌مینه‌یل تر له‌سایه‌ى رژیم به‌عس زنهار بوین وه‌ده‌س گرتن و كوشتنه‌وه، ده‌س بى ڕه‌حمانه‌و زاڵمانه‌ى پیاوه‌یل رژیم وه‌رده‌وام له‌بان سه‌ر بیتاوانه‌یل بوى، ئازادى و خوه‌شگوزرانى وجوود نه‌یاشت ته‌نیا ئه‌را دارو ده‌سه‌ى خوه‌یان نه‌وگ، سه‌ركوتكردن و زندانى و له‌سێداره‌داین ڕوڵه‌یل ملله‌ت فه‌وتان، كووچ زووره‌ملى و ته‌عریب و كاولكردن شار و ئاوایه‌یل به‌رنامه‌یگ په‌یڕه‌وكریاگ و خواست ده‌سڵات بوى، چه‌ك كیمیاوى و بایلۆجى و ئه‌نفالكردن ساڕیژ زه‌خم سه‌دامیه‌یل بوى. گشت ئى كاره‌ساته‌یل چه‌سپیا له‌بان ملله‌ته‌یل جووراجوور عراق و كه‌سیش نه‌تویه‌نست نق بكا.
وه‌لى ئه‌ڵڵاجه‌وه‌ى ها له‌وه‌را هه‌ر چینیگ و هه‌ر تایفه‌و ملله‌تیگ وه‌چه‌و خوه‌ى ئه‌و هه‌مگه زوڵم و زوورداریه دى، گشتمانیش جویر یه‌ك چه‌وه‌ڕى ڕووژ ڕووشنایگ كردیم و خفه‌ت ئه‌را یه‌كترى خواردیایم، ئه‌وه بوى ئى عراق زه‌خمداره له9 نیسان ساڵ 2003 وه‌یه‌كجارى قورتارى بوى له‌ده‌سڵات دكتاتۆریه‌ت به‌عس و گشتمان جویر یه‌ك هه‌ناسه‌ى خوه‌شى هه‌ڵكیشایم.
دویاى ئه‌وه‌یش حكوومه‌ت تازه‌ى وه‌ختى دامه‌زریاو ده‌ستوور تازه‌یش چه‌سپیاو زوورم مه‌ردم عراق ده‌نگ به‌ڵى ئه‌ڕاى دان، ئاواره‌یل فره‌یگ وه‌باوان و شوون وماواى خوه‌یان شاده‌و بوین و ئاره‌زووه‌یل خاسیگیش هاته‌دى ئه‌را به‌شیگ له‌مه‌ردمان عراق، وه‌لى له‌هه‌مان وه‌خت بى وژدانى و بى ئنسافى گه‌ورایگیش ده‌رهه‌ق وه چین كورده‌یل فه‌یلى كریاو تائیسه‌یش كریه‌یگ ، یه‌یش ئاشكراو دیاره ك تادویه‌كه ئۆپۆزسیۆن فره‌یگ قه‌وڵ هاوردنه‌وه‌ى شوناسنامه‌و ماڵ و موڵك زه‌فتكریاگ فه‌یلیه‌یل دان، وه‌لى ئه‌وانه‌ك هه‌ر ده‌سیان له‌پۆست گیر كرد كورده‌یل فه‌یلى له‌هویره‌و بردن.
ئیمه زانیم حكوومه‌ت به‌عس كورده‌یل فه‌یلى وه ته‌به‌عیه‌ى ئیرانى دا قه‌ڵه‌م، هووكاره‌گه‌یشى ئاشكراو دیار بوى، ئمجا هه‌ر خود ئى وه‌رپرسه‌یل ئیسه له‌وه‌خت ئۆپۆزسیۆن و له‌وه‌خته‌یل ئاواره‌یى له‌وڵاته‌یل په‌سه‌ن ئى ناوناینه نه‌كردن و گشت وه‌ختیگ له‌به‌رنامه‌یل تایبه‌ت و له كه‌ناڵه‌یل ئاسمانیه‌وه له‌ده‌یشت وڵات باس له عراقیه‌ت و ڕه‌سه‌نایه‌تى كورده‌یل فه‌یلى كردیان و هه‌میشه وه زوڵملیكریاگ ناویان بردیان و له‌گشت قسه‌و باسیگیان هه‌ر وتیان بایه‌سه له‌شوون رمیان سه‌دام یه‌كسه‌ر بڕیار تایبه‌ت وه‌كیشه‌ى فه‌یلیه‌یل ده‌ربچووگ و زه‌خمه‌یل ئه‌وان وه‌رجه گشت ملله‌تیگ ساڕیژ بووگ، وه‌لى مه‌سه‌له‌گه دیاره چه‌واشه‌وه بوى و تاڕووژگار ئمڕوو له‌لایه‌ن حكوومه‌ت تازه‌وه دگان ته‌واوى وه‌كیشه‌و شوناسنامه‌ى ئى چین زوڵملیكریاگه نه‌نریاگه‌و له‌یوا دیاره چه‌وه‌ڕى به‌ڵگه‌ى راسه‌قینه‌یگ كه‌ن تا جویر سه‌ده‌قه‌ى سه‌ر بڕیاریگ ده‌ربكه‌ن.
خاسترین به‌ڵگه ئه‌را ئسپات مه‌زڵومیه‌ت كورده‌یل فه‌یلى ئه‌وه‌سه ك دادگاى باڵاى تاوانه‌یل له‌باوه‌ت له‌ناوبردن وه‌جه‌م كورده‌یل فه‌یلیه‌وه دادگایى سه‌ران رژیم به‌عس كرد له‌و تاوانه‌یله ك ئه‌نجامى دان ده‌رهه‌قیان، ئمجا ئایا ئى دادگاییكردنه به‌س نیه ئه‌را ئسپات ره‌سه‌نایه‌تى و عراقیه‌ت ئى چینه؟ ئایا چ ملله‌ت وچینیگ جویر كورده‌یل فه‌یلى جینۆساید كریا؟ ئایا ڕووژیگ له‌ڕووژان ته‌رم ڕوڵه‌یگ فه‌یلى هاوریاوه ئه‌را كه‌س و كارى یا هیمان چاره‌نویسیان نادیاره‌و كه‌س نیه‌زانیگ له كوورا زنگ وه‌چاڵ كریان؟ئایا وه‌رپرسه‌یل ده‌وڵه‌ت تازه‌ى عراق نیه‌زانن ك تاریخ فه‌یلیه‌یل له‌عراق كویه‌نتره له‌تاریخ ئه‌وان؟ ئایا ئه‌وه‌ك وه‌عراقى نیه‌زانیگه‌مان، به‌ڵگه‌یگ جویر ئیمه دیریگ ؟
له‌ڕووژ 14ى نیسان 2009 نویسه‌ریگ وه‌ناو (بهلول الكوردى) كویه‌نترین به‌ڵگه‌ى تاریخى ك تایبه‌ت بوى قه‌واڵه‌ى تاپوو (سند عقار – سند خاقانى) یه‌كیگ له‌خیزانه‌یل كورد فه‌یلى له یه‌كیگ له سایته‌یل ئه‌لكترۆنى په‌خشه‌و كردویگ و تاریخ ئه‌و سه‌نه‌ده له ده‌زگاى توومار تاپوو(دائره التسجیل العقاری) چووگه‌وه ئه‌را (2 /مارت/ 1034 ك) ، ئمجا ئى تاریخیشه ئه‌گه‌ر ئاڵشتى بكه‌یم ئه‌را ساڵ و مانگ زاینى بووگه(2 / ئادار /1613 ز) ك عومر ئى تاپووه 397 ساڵه.
ئمجا ئایا ئه‌وانه‌ك خوه‌یان وه‌عراقى زانن و مه‌ردمان تر وه ده‌ره‌كى، ئى به‌ڵگه به‌س نیه ئه‌را ئه‌وه‌ك هس له‌خوه‌یان بكه‌ن و گشت هه‌قه‌یل زه‌فتكریاگ و مال َو موڵك فه‌یلیه‌یل وه‌بى به‌ڵگه‌و شایه‌تى بارنه‌وه ئه‌را خاوه‌نه‌یلیان؟ ئه‌گه‌ر هه‌ق له‌بان ناهه‌ق زاڵ بویاتاگ، یا حوكم وژدان كار بكرداگ، یا ژان دویه‌كه‌ى گشت ملله‌ت عراق جویر له‌وه‌رچه‌و بگیریاتاگ، ئه‌وه بیگومان و بى چه‌وه‌ڕیكردن بایه‌سه یه‌كسه‌ر هه‌ق كورده‌یل فه‌یلى بدریاتاگ و شوناسنامه‌و مال َو موڵك و زه‌وى و كارخانه‌یل زه‌فتكریاگیان گشت باتاگه‌وه‌و قه‌ره‌بوو یا ته‌عویز گشت زه‌ره‌ده‌یلیان بكریاتاگ. چوینكه مه‌حاڵه وه‌بى دابینكردن و هاوردنه‌وه‌ى هه‌ق كورده‌یل فه‌یلى ئى عراقه سه‌قامگیر بووگ، له‌وه‌ر ئه‌وه ئه‌وان به‌شیگن سه‌ره‌كى له‌پیكهاته‌ى عراق و هه‌ر ئه‌وان تویه‌نن جموجویل بخه‌نه بازاڕه‌یل و مه‌سه‌له‌ى بیكارى كه‌مه‌و بكه‌ن و بازرگانى به‌رقه‌رار بكه‌ن و فه‌قیرو نه‌داریش له‌سایه‌ى ئه‌وانه‌وه بڕه‌سنه مه‌تڵه‌و.
