ديرن ك چوار ساڵ ئايه‌نده تايبه‌ت بكريه‌يگه دامه‌زرانن ده‌زگايل ده‌وڵه‌ت و ڕاسه‌وكردن وه‌زع ژيانيان وه له‌شوون ساڵه‌يل جه‌نگ و گه‌ماروو و سه‌ختيه‌يل ، بايه‌د يه‌كيگ بايگه نوا و عيراق بنه‌يگه شوون ڕاس خوه‌ی و هوير بكه‌يگه عيراقيه‌يل جوور ملله‌تيگ ك سه‌ختيه‌يليگ كيشانه تا ئيسه هويچ كه‌س وه ئه‌و ئه‌ندازه سه‌ختی نه‌يه . عيراق وڵاتيگه ك دارايه‌يلی خراو كريان و بنه‌وای ئابووری ويران بوی و سه‌دان هه‌زار له جايه‌ل جوانه‌يل و هاووڵاتيه‌يلی له سه‌رده‌م به‌عس گووروه‌گوور كوژيان و ئه‌ی كرده‌وه‌يل تاوانبارنه له‌شوون رميان ئه‌و ده‌سه‌ڵات ديكتاتۆريه له ساڵ 2003 وه‌ردوام بوی و كوتايی وه‌پی نه‌هات . وڵات ئيمه وه كه‌سايه‌تيگ هه‌وه‌جه ديريگ ك له‌دريژه‌ی ساڵه‌يل وه پاكی كار بكه‌يگ تا عيراقيش بتويه‌نيگ جوور وڵاته‌يل ئه‌ڵمانيه و يابان ك جه‌نگه‌يل فره سه‌ختيگ وه‌چه‌و دوين سه‌رله‌نوو بوسيگه‌پاوا و شوون ناوده‌وڵه‌تی خوه‌ی وه‌ده‌س باريگ . عيراقيه‌يل كه‌سايه‌تيگ توان ك له‌وه‌راوه‌ر پرۆسه‌ی سياسی بوسيگ و هه‌سته‌يل نيشتمان په‌روه‌رانه‌ی راسه‌قينه سه‌رله‌نوو به‌رزه‌و بكه‌يگ . بريارده‌ر عيراقی له‌ی قۆناغه باوه‌ته‌يل فره گرنگيگ هاله‌وه‌رده‌می ك بايه‌د يه‌كلايانه‌و به‌كه‌يگ و له چوارساڵ ئايه‌نده بايه‌د ژيان به‌خته‌وه‌ر و ئاراميگ ئه‌را هاووڵاتيه‌يل عيراقی زامن بكه‌ن و ده‌وڵه‌ت يعراق كه‌رامه‌ت و ژيان و ئازادی ئه‌را هاووڵاتی زامن بكه‌يگ وه گشت توانايی خوه‌ی وه‌كار بوه‌يگ ئه‌را وسيان له‌نوای گه‌ناته‌كاری ئيداری و دارايی وه له هه‌ر عيراقيگ توايگ له‌ی بارو وه‌زعه كار بكه‌يگ پشتگيری بكه‌يگ و ده‌سميه‌تی بيه‌يگ . بايه‌د هه‌ر خێزان عيراقيگ بتويه‌نيگ شوون نيشته‌جا بوينيگ ئه‌را خوه‌ی زامن بكه‌يگ وه سه‌رله‌نوو به‌شداری له جه‌نگ و كوشتن ئاده‌ميزاد نه‌وده مه‌رجيگ ئه‌را خێزان عيراقی تا بتويه‌نيگ سه‌قفيگ ئه‌را نيشته‌جا بوين وه‌ده‌س باريگ.