شه‌فه‌ق نيوز/ هه‌لاجى پيشه‌يگه له پيشه‌يل باو ك له‌زوورم شاره‌يل عراق ناودارى داشت، ك هه‌رچه‌نى ناوچه‌يل مه‌ردمى زياتر مامڵه وه‌ليا كرديان.
ئى پيشه له‌وه‌رده‌م پيشكه‌فتنه‌يل ته‌كنۆلۆجى ئامێره‌يل تازه‌يش هه‌ر مقه‌يه‌تى له خوه‌ى كرد و هه‌ناسه‌ى خوه‌ى وه‌رده‌وامه له‌ژيان له نه‌وه‌يگه‌و ئه‌را نه‌وه‌يگ تر له‌رێ ميراتگه‌رى له باوگه‌يله‌و ئه‌را رووڵه‌يل.
هه‌لاج ئه‌و كه‌سه‌سه ك هه‌وه‌جه‌يل ئسراحه‌تى ئه‌را گشت فه‌رشه‌يليگ ئه‌رامان ئاماده ئه‌كا جوور پاڵشت و مه‌نده‌ر و لاف و جه‌وده‌لى، ئمجا وه‌ى تاريفه ئه‌را ئى پيشه‌ى كلتووريه ئه‌وه ئه‌رامان ده‌ركه‌فێد ئى پيشه پيشه‌يگه وه‌ل په‌ره‌سه‌ندن ژيان يه‌يش په‌ره‌سه‌ند و وه‌شيوه‌يگ وه‌رفراوان بڵاو بوى و هويچ كويچه‌و ناوچه‌يگ نيه له‌ى هه‌ر پاريزگايگ له پاريزگايه‌يل عراقى به‌تاڵ بدێ له‌ى پيشه، ك وه‌شيوه‌يگ وه‌رفراوان پيشه‌ى هه‌لاجى له‌تيان دوينريه‌ێد.
هه‌لاج له يه‌ك وه‌خت دوو كار ئه‌كا ك پيكهاتگه له دويرانن و نه‌خشه‌كيشى، چوينكه فه‌رشه‌يل دويرنێد وه‌گشت جوانييگ و ره‌سم و زخره‌فه‌يش له‌بان لاف دروس ئه‌كا. هه‌لاج خاس بايه‌سه دويراننيش بزانێد و بزانێد چوينن ده‌رزى وه‌كار ئه‌يه‌رێد و نه‌خشاسازى فه‌رشه‌يل بكا وه‌شيوه‌يگ جوان و په‌سه‌ن، ك وه‌گووره‌ى سه‌رڕشته‌ى له پيشه‌گه‌ى ناودارى په‌يا ئه‌كاو مه‌ردم زياتر روێ له‌لى ئه‌كه‌ن.
هه‌لاج چه‌ن ئامێره‌يليگ وه‌كار ئه‌يه‌رێد جوور دار نه‌رم ك له‌ى دار ئه‌نار وه‌كارى ئه‌يه‌رێد و كه‌وانه‌يى ئه‌دێ و ته‌ليگ كانزايى له‌خوه‌ى گرتگه وه‌ل چه‌كوشيگ ته‌خته‌يى ك هه‌لاجه‌گه وه‌پى هه‌لاجى په‌مگ ئه‌كا له‌وه‌ختيگ په‌مگه‌گه له‌رێ ته‌له‌گه‌وه ئه‌يه‌رێده كار, يه‌يش بيجگه ده‌رزى و دليوان و مه‌چير و كشته‌وان ك ده‌رزيه‌گه‌ى وه‌ناو په‌مگه‌گه وه‌پى ره‌ى ئه‌كا و بيجگه قه‌مچييگ ك هه‌لاجه‌گه وه‌پى فه‌رش و پاڵشت په‌مگين و پاڵشت خورى وه‌پى دروس ئه‌كا وه‌ل كار په‌رده‌يى و دويراننى.
جووره‌يل فريه‌يگ له په‌مگ هه‌ن، ته‌نيا هه‌لاجه‌يل ناسنه‌ى، ك ئه‌ويش جياوازه له‌ڕوێ خاسى و نرخه‌وه، ئمجا په‌مگ لۆكه‌ى گرده‌كانى نرخى 3000 ديناره و په‌مگ شه‌راحى نرخى 2500 ديناره و په‌مگ فانيله وه 1500 ديناره‌و په‌مگ روينين وه 500 ديناره ك جووره‌گه‌ى ئه‌وه نه خاس نيه.
يه‌يش وه‌هه‌مان شيوه ئه‌را خوريه‌يل جوراوجوور ك پيكهاتنه له خورى په‌تووه‌يل ك نرخه‌گه‌ى 1500 ديناره‌و خورى په‌تگ ك يه‌يش جووريگه ئه‌رزان و ره‌واجى فريه‌يگ ديرێد له‌لاى خيزانه‌يل فه‌قير حاڵ و ئه‌يه‌رنه‌ى كار ئه‌را فه‌رش ناوماڵ.
زوورم هاووڵاتيه‌يل په‌مگ وه‌پيان خاستره‌و بريگيش له ناوچه‌يل دويرنشين له‌شار و ئاوايه‌يل خورى وه‌پيان خاستره له‌وه‌ر ئه‌وه‌گ خوه‌يان له‌لى ديرن و چشته‌يل فريه‌يگ له‌لى دروس ئه‌كه‌ن جوور مه‌نده‌ر و دوشه‌ك و لاف و پاڵشت. دى وه‌گووره‌ى وه‌خت ئى كاره له‌لاى هه‌لاجه‌يل په‌ره سه‌ند و هه‌ڵاج وجوود خوه‌ى له‌ناو گشت كويچه‌و ناوچه‌و خيزانه‌يليگ عراقى ئسپات كرد وه‌گشت پيكهاته‌يلێ، وه‌تايبه‌ت له وه‌رزه‌يل هاوسه‌رگيرى ك هه‌رچه‌نى ته‌كنۆلۆجيايش روێ له پيشكه‌فتن كردگه له‌ئاست پيشه‌سازيه‌يل.
ئمجا له نه‌ريته‌يليگ ك باو بوێ له‌لاى خيزانه‌يل كورد فه‌يلى ئه‌وه بوێ ك يه‌كيگ له رووڵه‌يليان هاوسه‌رگيرى بكردياد، دى خيزانه‌گه‌ى ده‌س كرديانه تازه‌كردنه‌وه‌ى فه‌رش و برتاڵه‌يل ناو ماڵه‌و ئه‌و چشته‌يله ك هاوسه‌ره‌يل هه‌وه‌جه وه‌پى كرديان، دى خيزانه‌يل فه‌يلى هه‌لاجه چڕيانه ماڵ ئه‌را ئه‌وه‌گ هه‌لاجى ئه‌را فه‌رشه‌يليان بكا وه‌گووره‌ى خواست هاوسه‌ر و بايه‌سه ده‌زگاى ته‌واويگ ئاماده بگرياتاد هه‌ر له دوشه‌ك و فه‌رش بگر تا لاف و پاڵشت و چشته‌يل تر، وه‌ختيگيش هه‌لاجه‌گه كوتايى وه كاره‌گه‌ى باوردياد، خيزانه فه‌يليه‌گه ده‌س كردياده چه‌سپانن پويل و شرينى له‌قه‌ى فه‌رش هاوسه‌رگيريه‌گه له‌وه‌ر ته‌وه‌ڕك وه‌ل هه‌ڵهه‌ڵه‌و شادى.
بيگومان پيشه‌ى هه‌لاجى موويگ كلتوورى وه‌رگرت و ده‌سوه‌ردارى زه‌حمه‌ته، ك هه‌رچه‌نى كاڵاى بيگانه كاريگه‌رى فريه‌يگ ديرێد، ئمجا ناوچه‌يل كورده‌يل فه‌يلى له به‌غدا كه‌سه‌يليگ له‌تى هه‌ڵكه‌فت وه جوانى ئى پيشه ئه‌نجام ديان و له‌وانه‌يش ئه‌را نموونه: حسێن له‌ك(ئه‌بو موسا)و موقبل هه‌لاج و حه‌ميد(ئه‌بو عسام)و ئبراهيم(ئه‌بو فه‌وزيه).
له‌و هووكاره‌يليشه ك هه‌ڕه‌شه له‌ى پيشه‌ى كلتووريه وه نه‌مان كرديان، پيكهات له هاورده‌كردن فه‌رشه‌يل ئاماده‌كرياێ ك فريه‌جار له سه‌رچه‌وه‌يگ خراويگ هاورده كريه‌ن جوور چين و تايوان و به‌راوردى وه‌ل فه‌رشه‌يل عراقى جيوازى ديرێد، وه‌لێ وه‌كاربه‌ره‌گه وه‌خاستر زانێده‌ى له‌وه‌ر كه‌ميى نرخه‌گه‌ى و حازرى كاڵاگه، هه‌ر وه‌و خاتريشه ئيسه هاووڵاتى ئه‌را نموونه ناتويه‌نێد چه‌وه‌ڕێ هه‌لاج بكا ئه‌را ماوه‌ى چه‌ن رووژيگ وه‌خاتر ته‌واوكردن دوشه‌ك يا لاف و پاڵشت، مه‌گه‌ر ئه‌و راسيه بزانێد و گشتلايگ زاننه‌ى ك كاڵاى عراقى قايمتر و ته‌مه‌نيشى دريژتره.