شەفەق نیوز/ گوڵاڵە نووری، خانمە شاعر و نۊسەر جەهانیە، و خوەی کوردە، خەڵک شار کەرکوک، و ئیسە لە ئەمریکا جیگرە، وەزوان عەرەوی نۊسێد و هەمیش لە زوانەیل کوردی و ئینگلیزی و رووسی وەرگێڕان کەێد،  چەن کتاویگ شعر و چیرۆک چاپ کردگە، ئەرا ئاژانس شەفەق نیوز باس یاد رووژەیلیگ کرد، ک ناچار بۊ لە ئۆکرانیا بمینێد. 

گوڵاڵە لە باسەیلی ئەرا ئاژانس شەفەق نیوز ئۊشێد " جەنگ رووسیا لەبان ئۆکرانیا،  چشتەیلیگ خستە هۊرم هەنای لە ئۆکرانیا بۊم، ک لە ساڵ ٢٠٠٧  مکیس ئەرا ئامدەبۊنم لە زانکۆی ئەدنبرە لە سكوتلاند/ ئینگلتەرا داشتم، تا لە هەفتانەی روشنهۊری عراقی ئامادە بووم، و بایەت بۊ بچمە کیێڤ پایتەخت ئۆکرانیا چۊنکە باڵیۆزخانەی بەریتانیا لەورا رووژیگ ئەرام دانا تا فیزاگە موور بکەم، و دۊای کلکردن کاغەدەیلم، بایەت بۊ وە قەتار شەوانە لە شار رەنگین ئۆدیسا ئەرا پایتەخت بازرگانی و گەشتوگوزاری ئۆکرانیا وەبان بەندەر ناودەوڵەتی گرنگ لەبان دەریای سیا رەد بووم، ک کەشتەگەی ناوبەین ئی دوو شارە ١٢ ساعەت وەپی چوود.   

رەسیمە ئەولا، و پاسپۆرت عراقی خوەم نشانیان دام، و لە ئەنجام، چگنم ئەرا بەریتانیا پۊچەڵ کریا، چۊنکە عراقییم، و شایەت هەر لەیرا بمینم و داوای پەنابەری بکەم، و ئەو نەهامەتیەیلە هاتە هۊرم لە سەردەم سەدام وەسەرمان هات، و ئەو جەنگەیل سەختە، ک لەو سەردەمە عراقیەیلە کەفتنە وەرسگی، و کەشتکردن قەیەغە بۊ.   

ئەرا ئەو دۊتە باس کردم ک خەوەر رەتکردنەگە دادە دەسم: من گرنگی وە ئینگلتەرا نەیامە، من گرنگی وە هەفتەی روشنهۊری ئەورا دامە، ئایا من خوەنەوارەی خوەم وەخاتر بەریتانیا لەدەس دەم تا دووارە لە هۊچ دەسوەپی بکەم؟ و هەمیش وتم: بنووڕو پاسپۆرتەگەم پڕە لە فیزای شنگن ئەرا ئەوروپا و لەناو هۊچ دەوڵەتیگ جیگر نەۊمە، و هۊر نەکردمە دۊتەگەم بیلمە جی. 

(جی باسەک دۊتەگەی گوڵاڵە خان ناوی "ئەناسی"ە و خاوەن دەنگیگ فرە خوەشە، و ئیسە هالە توومارکردن گورانی)  

وەزۊی خوەم خستمە ناو تەکسییگ، تا لەناو جادەگە نەگیرم، و داوا لە رانندەی تەکسیەگە وە دەنگ کزیگ کردم  بوەێدەمە ویستگەی قەتارەگە، و ئەسرم جۊر واران رشێد، ک چۊنکە عراقییم کەفتمە وەر هەس ئەو هەمکەی سووکایەتیە.  

رانندەگە چەوی کەفتە ئەسرەیل چەوم، و خوسە و خەفەتم زانست، و لەلیم پرسێد ئەگەر دەسمیەتییگ خوازم،  باوجی من تەنیا ئەسرەیلم زیاترەو بۊن، و رانندەگە وت: ئایا فیزاگە وەپید نەیان؟ منیش زەخمم کولیاوە و جۊر زاڕوو گیرستم و پا کوتیامە بان زەۊ.   

ئەو رانندە تەقەلا دا خەفەتم کەمەو بکەێد، و وەپیم وت؛ جاری وەخت فرە مەنیە تا سوار قەتار بۊێ، با گڕد بیەمە شۊنەیل خوەشیگ لە کیێڤ، منیش وەیەو ئەسرم وسیاوە، و ئەو رانندەی دڵپاکە تا ماوەی سێ ساعەت لەناو جادەیلیگ رانێد ک موزەخانە و ئۆپڕا  و پارک و تەپەیلیگ هاناوی، و ئەرام باس شۊنەیلە کەێد هەرلە بینایلە تا زانکۆیلە تا شاعرەیلە، و باس ئانا ئەخماتۆفا ئەرام کرد ک لە ئۆکرانیا لەداڵگبۊە، و هانم دەێد بنووڕمە ئەو وڵات رەنگینە، و وەپیم وت: ئەرا خەفەت ئینگلتەرا خوەێ، و خوەد هایدە ئی شۊن رەنگینە، بنووڕو ئی دارەیل گەپە.  

وەیجۊرە خوەسی دڵم لەهۊرم برد، چمان پەرییگ بۊ و ئەرا من لەی شۊنە داوەزی.  ئیجا مکیسم لەبان چای  لەلای یەک کۆفی ئاسانیگ لەبان تەپەیگ کرد، ک کیێڤ پایتەخت لەژیری رەنگین دیار دەێد، و شۊنەگە فرە خوەش بۊ، و خاوەن کۆفیەگە برادەر رانندەگە بۊ، و لە ئەسر و گیرستن و خەفەت، هاتمە پزگەخەنە. 

ئیجا وت: تۊنێ ئەرا ئۆدیسا گلەو بخوەێ و لەورا بخوەنێ و بنۊسێ، و با ئینگلتەرا بچوودە دووزەق ک تو هایدە ئۆکرانیا.  

شایەت بپرسین، ئەو کابرای رانندە، نیاز خەراویگ وەگەرد تو داشتگە، چۊنکە تو ژن جوانیگ بۊێ، باوجی هۊچ لەی چشتەیلە لەلام دەرنەکەفت، و منیش لەو رەفتارەیلە زانم، چۊنکە ناخاڵە نییم، و فرەیگ لەو نموونەیل نیاز خراوە هاتیەسە تۊشم، تەنانەت لە عراق و خوەرهەڵات ناوڕاس وەگشتی.

و هەمیش رخم  لە رانندەیگ ئۆکرانی نەچگ ک تا ماوەی سێ ساعەت لەناو جادەیلە گڕم دەێد، چۊنکە کامیرایل باڵیۆزخانەگە توومار گشت ئەو ماشینەیلە کەن ک لەوەردەمی وسیانە، و هەمیش توومار هەر کەسیگ سوار بوود یا داوەزێد، ئەراوە بایەتە ئی رانندە هۊچ نیازیگ تاوانی نەیرێد ک لە وەردەم باڵیۆزخانەی بەریتانیا وسیاگە. 

ئەو کابرای رانندە، رازی نەۊ هۊچ پۊلیگ بوەێد، چۊنکە جۊر دڵشکیاگ هامە وڵاتەگەی، و خوازی دووس ئۆکرانیا بیاشتام، وەگەرد ئەوەیش، وەرجەیە سوار قەتار بووم، شمارەی تەلەفۆنەگەی داگە پیم، ئەگەر چشتیگ خوازم، وەلێ وەداخەو ک ئمڕوو ئو شمارە لەلام گوم بۊە، تا لەی جەنگ سەختە هەواڵی پپرسم. 

یەیشە بەشیگ لە وینەیل ئەو ماوەسە ک لە ئۆکرانیا بۊم: