عەلی حسێن فەیلی/ کارەگە ئەوە نێخوازێد خوەد گوما بکەێ وە ئومید ئەوە ک ئەواکان تو بویننەو، یا وەکوشتن خوەشحاڵبوی تا وە زوانە داڵگیەگەد بچڕنەد!.

زیانەگان ستەمدیدەیل ئی وڵاتە، رەنگ وبون ودەنگ نەێرن، ونە نیرن ونەیش مایە، چوونکە دابەش بویەسه بان هەردوگ رەگەزەگە وگشت تەمەن وچینەگان کۆمەڵگاگه، لە گشت ئاین ونەتەوەگان، بەزەیی ئەو کەسەیلە ک بەشیان لە زیان کەڵەکە نەویه‌ تەنیا لە دووقاتی دەیان ساڵ لە ئاوارەیی وبارکردن، بەڵکم لە شوونەیل پەیا بوینیان و زێدی خوه‌یان کەڵەکە بویه‌ ك  ودەسپیچگ بی ئاوی وبی کەهرەبا، پەک ئاسایش ویەکسانی کەفت وهیچ کەس هویرەو نێکەێدە ئەو مێژووە ک جوور شناسنامەیگ ئەرا گەل ستەمدیدە دانریەێد.

ئی راسیەیلە فەیلیەگان خەێدە هویرمان ک خوەیان پێویستی  دیرن وه‌ چالاکی وەردەوام لە وەبەرهەمهاوردن هویر و خەوەرەیل وباوەتەگان، ونووسانن ئەوەگ وەسەریان هاتگە.

ئووشن؛ راگەیانن رزگار گشتی کەێد ونوڕیوێدە پیەو جوور دەرفەت گەورایگ لە سای ئی کرژەو بوینە، وەهەرچەن کەسیگ نێتویەنێد غەدر لە کورد فەیلی بکەێد چەنه‌ خوەیان له‌  خوەیان كه‌ن، بەڵکم هەمیش راگەیانن غەدر لەلیان کەێد، چوونکە لە کار راگەیانن چشتە پەیوەندیدارەگان وە کورد فەیلی، تەنیا کەمیگ لەلیان نووەوکردن وەخوەی دی، و گشتی دووارەکریاگە و لە چەن باوەتیگ دیاریکریاگ زیاتر نیە، و هەمیشە خەریک وەره‌و دویاچگنە.

ئەرا دووارە نووسین مردنیگ تریان، مانشیت پانیگ نێخوازێد، وەوجوورە ک ئەرا ژمارە کردن خوەیان، نووەوکردن ژیان وئارازوەیل وباوت فەیلیەگان خستنە کنار.

گشت حکومەت و دەسەڵات ورێکخروا ودامەزراوە پەیوەندیدارەگان وەی باوەتە هانە دەیشت بازنەگە، چوونکە گشتیان هانە بان هێڵەگە تەنیا ئەرا ئەوگ کەسیگ ویژدانیان نەجوولنێد و کەمیگ لە توومەت کەموکوڕی نەخەێدە بانیان، ک لەلای خوەیانەو گرنگ نیە ئەگەر ژیان لایەنیگ چارەسەر کریاوید یا لە هویرەو چگە. لە راسی گرفتەگە هالە ئەوە ک ستەمدیدەگە بایەسە غافڵ نەوود لەی راسیە  ک راگەیانن چەکێگە دوو روی دیرێد، ئەو پەیوەندی بی کۆتاییە ک راگەیانن روبەرەگان کەمەوکرد بەڵکم گرفتەگان وشیوەیگ گەوراتر ئاڵۆز کرد.

کۆتایی بەعس دەرفەت باس کردن وئازادی وەبی چەودیری کردن وترس لە ئاشکراکردن هاورد، هەرچەن شیوەی نەگونجیاگ لە راگەیانن ئومیدەگان و پڕۆژەیل ئاوەدان کردنەگان رمان، چوونکە دەسەڵاتداریش پەنا وە راگەیانن بەێد.

لە عراق هاوچەرخ، فرەی فەیلیەگان ئەو هەوڵدانەیلە خوازن ک پەیوەندی وە وەرگری لە مافەیلیان و شناسنامەیان دیرێد، لە مەیدانەیل راگەیانن هیمان ئەو دەرفەتە نەوڕیاگە، لە وڵاتیگ ک هیمان ئاگر کەێدەو ئەرا سزانن بەڵگەنامەیل مافەیلیان، بایەسە دەنگی بەرزەو بکەێد، وچەوەڕی ئەو پەیمانەیلە نەکەێد ک کردەوە لە شوونیان نیە.

پرسیارەگە ئەوەسه؛ راگەیانن فەیلیەگان وەرگری لە چە کەێد؟ ئەو ئایەمەگ گرنگی نیەیێدە زوان ومافەیل خوەی و دەسشوردیە لە ئەو چشتەیلە ک شناسنامە وەپی دەن، و پەنای ئارامیگ  ئەرای دروس کەن، وبوودە سەنگەریگ ئەرا کەرامەت ومقەیەتی ژیان، چوون بڕەسێدە ئەو قۆناغە ک لەتی بفامێد ک خوەی پێویستی وە راگەیانن دیرێد، هەرچەن خوەی ئەرک قورسیگە وکار ناسکیگە، بەڵکم هەوڵداین لەی باوەتە دەسمیەتکارە لە خوەی چەسپانن، و دیارکردن داواکاریەگان و وەزنی مەنین باوەتەگەی.