عیسام ئەکرەم فەیلی/ وەرجە ساڵەیل نزیکیگ، نیە هویرم وەبۆنه‌ی چە بوی، شایەت ئەو رووژەس ک ناوی نان وە رووژ قودس، یا شایەت بەزمیگ تر بوی، خودا زانێد، دویلە رویدان خوەی ئەو دەمپایلە لەلام گرنگ بوی، هیچ ئەڵاجەوید ناێد چوونکە ئیمە وەخاتر ئەوەگ بخەێمنە هویرمان، ک شایەت رووژیگ بویدە ئاغای خوەد، ناو بۆنەگە وە قودس دەسکردیا پی، یا فەلەستین، رووژ قودس، روووژ ئەقسا، روووژ کەعبە، رووژ خودا، وەراسی نێزانم، چوونکە روووژەگان فرەوەبوین تا هیچ روووژیگ ئەرمان نەیشتنەو وە ئارازوی خوه‌مان ژیانی بکەیمن.
بڕیەل فرەیگ لە بەغداد گردەو بوین، وینەگر وپەیامنێر کەناڵەگان، دەو کەن تا رووداوەگە تۆمار بکەن، ئاڵای ئیسڕائیل و ئەمریکا سزیەن، وبەشیگیان لەبان زەوی کیشیانە، و کردۆسەیل رز کریاگ ویەک شیوە لە دڵنگەیلیان لە باڵیل و موجاهدەیل حەشد ک پاڵەوانیەگان وەخوینیان تۆمار کردن، تا ئیسە گرفتیگ نیە، چوونکە شیوەی ئازادیگە ئەرا باسکردن لە رای خوەیان، بیجگە ئەوەگ ئیمە پشتگیری لە را بکەیمن، یا نەکەیمن، یا چالاکیەگە پەیوەندی وە منەو داشت یا نەیاشت جوور هاوڵاتیبگ خاک وکەرامەت وماف خوریاگ ک لە گەندەڵترین وڵات ژیه‌م.
ئەوەیگ هیشت ئی بۆن کەورا لە هویرمەو بچوود، و دەمپاگە لەهویرمانم بمینێد، خوەی بڕیگ کەس بوی ناو خوه‌یان وە ( شێخ یا تشماڵه‌یل فەیلی) - دویلە رویدان- ئاشکرا کردن، ک ئەو رووژە یەک رکیگ لەلیان دیم ئەرا پشتگیری فەلەستین، ک وەو شیوە وەرێژەی یەک لەسەد لەلیان نەیمە، وەختا یەکیگیان دەسکردە هەڕەشەداین وە دەرکردنیان لەناو خاک و ماڵ وباخ داد خوەیان!
وەڕاسیەو فرە خەفەتبار بویم ک ئەو شێخەیل دووشەشە لەو رووژە هاتن تا رزگار قودس بکەن وجەنگ دژوە ئیسرائیل، بکەن بوینە هەنەکی رووداوەگە، چوونکە هاتن ئەرا بەشداری لە جەنگ ئیسڕائیل لەناو ئەو پوستاڵیل و دڵنگەیل یەکڕەنگە و دەمپا ( شەحاتە) کردنەسە پا!، وهەمیش کەفتنە وەردەم رزەگان وەتەمای وێنەگردن، وفرە لە برادەرەیلم لە پەیامنێرەیل کەناڵە ئاسمانیەگان فچاننە پیم لەباوەت ئەو وینەی فەیلی ناشازە.
ئەو رووداوە و رکه لەو فەیلییەیلە هاتە هویرم ک راپەڕین ئەرا فەلەستینیگ کردن لە گەلیگ لە فرەترین ئەوانەگ لەش گەنیاگ خوەیان تەقاننەو لە بازاڕ وناوچە جەماوەریگانمان و مەکتەوەیل مناڵەیلمان، وەختا نووڕستمە بەڵگە نامەی فەرمییگ لە وەزارت خوەنەواری باڵا دەرچگە، چڕ لە شۆڤینی دویرەوخەر، و هەناسیگ بەعسی پیسیگ هەڵاڵێد، وفرە بیزارم کرد وخەوەگەی دوەیەشەو لە دەسم برد، وتا ئی چرکەیلە ک لەناویان نووسم، تا خوسەیلم بڕشنم بەشکی خەوم بوەێدەو، ونێووشم بەشکی ئەو دویچگەیلە بوونه خاوەن دەنگ و هەڵوێستیگ ئەرا خوەیان، نەگ ئەرا فەلەستینیگ پیس پەیکەر ئەرا سەدام دروس کەێد، وجادە ومەیدانەگان وەناو سەدام دانەێد، و پرسە و کوتەڵ ئەرا سەدام سازێد.
بەڵگەنامەی وەزارەت خوەنەواری باڵا ، لە ژمارەی ٣١٢٦٦١-تم٣/ت/٢٠٥٣ لە ٢٠٢٠/٣/١٧ ک ئاڕاستە کریاگە ئەرا ( گشت زانکۆەگان) لە تەوەر ٢ لە دویای پێشەکییگ باس لە بڕیاریگ وە تاوانەگان حزب بەعس لە بەڕنامەیل خوەنستن لە گشت کولێژەگان کەێد ئووشێد:
٢- داناین ووردەگان تاوانەیل حزب بەعس ک ( دەسەی پسپۆڕەگان) داگەسەی پیمان، لە کولێژەیل یاسا و کولێژەیل زانستە سیاسییەگان، وبەرنامەیل ماف مرۆڤ لەو کولێژەگان تر.
قاقەزەگان: سەرەکیەگان ک لەبانەو ئاماژە وەپیان دریاگە.
ئیسە بایمنە باس ( قاقەزەگان) ک وەدوو لاپەڕە نیاز هوکارەکردن وەزارەتەگە لە زانکۆگان وەناونشان ( تاوانەگان حزب بەعس) ک بوودە شەش ناونشان سەرەکی، ک خوەیان ئەو تاوانەیلەن ک زیان وەئازادی سیاسی دەن، وتاوانەیلیگ لە دروس کردن ئاژاوەی تایفەیی، وتاوانەیل دژوە ژینگە، ودژوە مرۆیی، ودژوە هەست ئاینی، وتاوانە ناودەوڵەتیەگان.
ئی فەیلی راپەڕین کار ئەرا فەلەستین ک خوازێد وەدەمپا (شەحاتە) جەنگ دژوە نەوەوی (ئه‌تۆمی) دیمونا بکەێد، چە پێشبینی کەێد، وچەنیگە نەهامتیەگەد لەی دەرو تەوەرەیل وبەندەیلە؟ ئەرزش خوین باواند ک لە هەڕین وتاقیکردنەوەی کیمیاییە چەس؟ ئایا تۆڕە بوێ ئەگەر وەتمە پید ک هیچ ئەرزشیگ نەیرێد؟!
هەرچەنی لە رەشبینی هەڵگردمە ک رەوشەیل ژیانم چەسپانەی لە مناڵیەو تا دوەیکە ک چیمە ناو تەمەن پەنجاگان، مەزەنە کردم ک نەهامیەتەگانمان لە یەکەم تەوەرەگان بوینم لە ژیر بەند (تاوانەیل دژوە مرۆیی- جینۆساید) بارکردن سەدان هەزار و بیسەروشوون کردن دەیان هەزار لە گەنجەیل ستەمدیدە و تاواننیان وە تیزاب و له تاقیگه کیمیاییەگان، بەڵکم وەداخەو تەنیا حەڵەبجە و راپەڕین شەعبانی دیم، بەڵکم تەنانەت ناو باوانەگەم لە کوردستان وەفرە دین، و نووسین لە تەوەر ١ لە بەند چوارەم ( ناوچەیل باکوور) لە جیای کوردستان.
با بویشم شایەت پەسەندکردن تەنیا هەڵەبجە وراپەڕین جوور تاوانەیل جینۆساید لەرێکەفتن هاتگە یا جوور نموونەیگ، بەڵکم چوون دەسپیچگ ئەرایان بوینمەو هەنای نووڕمە (گەنیاگییگ) بوونەگەی خنکنێدەم لە تەوەر ٤ لە بەند چوارەم ک ئیجووره هەڵاڵێد:
٤ - دەرکردن یاسایلیگ ك بایەدە عراقیەگان تەڵاق هاوسەرەگانیان بیەن لەوانگ لە بنچینەی ئیرانیین، و ئی باسە وهەناسەی ژەهرینە هەر خود دەقە بی قیمەتەگەس ک لە بڕیار ئەنجومەن فەرماندەی شۆڕش شوونبڕیاگە.
تەوەر ٥ لە خود بەند چوارەم، هەمیش وە دەمپاگەی فەیلیەگە دژوە فەلەستین هاورد وە:
٥- دەرکردن یاسایلیگ وە سڕین شناسنامەی عراقی لەبان ئۆپۆزسیۆنەگان یا ( ئەوانەیگ شناسنامەی خوەیان وە عراقی کردنە).
بنووڕە نامەردی وشۆڤینی ئەوانەگ ئی دەقە نووسانن، ک هیمان ئووشن تو عراقی نید وته‌نیا شناسنامە وه پید دریایه!
ئەوانگ وەپشتگووش خستنەمان، وپایان نانە بان نەهامەتی وقوربانیمان ئەندام فەرماندەی (قوتڕ= هه‌رێمایه‌تی)ی نیین لە حزب بەعس، ونەیش ئەفسەرن لە ئەمن و هەواڵگیری سەدامی، ونەیش لە حاییم وایزمن و غۆلدا مائیر وموشێە دایان وئیسحاق رابین ونتنیاهو، بەڵکم ئی زلە وئی هەناسە ک سوکایەتی وەپید کەێد ئەی دووچکەگە خوەی عەڕەفات و ئیسماعیل هەنیەن ک دروسکریاگ هاوبەشەیلە لە ئایین وخاکه، و ئەگەر تو فەیلییگ بی توانا بوید لە یەک دەنگ پەرلەمانی زیاتر نەیرێ، ئیجا براگاند لە نەتەوەگە چوون ک شەست دەنگ دیرن!، و ئیجا براگاند لە مەزهەبەگە چوون ک یەک لە سێ بەش تەقەگە دیرن!؟، و ئەگەر ئەیە ئەنجام وەزارەت خوەنەواری ( باڵا) بوود، ئەی نزمەگە چە ئەنجامیگ دەرکەێد!؟