به‌ش سێيه‌م
شه‌فه‌ق نيوز/ له پرووسه‌يگ سياسى جوور هه‌ڵوژاردنه‌يل ك سه‌ركه‌فتن ته‌نيا ئامانجيگ له‌تى پيك ئه‌يه‌رێد، ئه‌و پرسياره ئه‌ياده هوير ك ئه‌راچه ته‌نيا كورده‌يل فه‌يلى شكايه‌ت له‌بان شكانن ده‌ستوور ئه‌كه‌ن وه ديد كويه‌نه‌و؟ وه‌لێ پرووسه‌ى له‌ناوبردن ناسنامه وه‌رده‌وامه وه شيوازه‌يل فريه‌يگ ك له‌ده‌يشت چوارچێوه‌ى ده‌ستووره. ئاشكراس له عراق هه‌ناى ك ده‌رفه‌ت كه‌م بدێ و ماف جموجيل سڕكرياێ بدێ له مه‌يدانه‌گه له‌بان ئه‌وه‌گ ئويشێد ك نزيكه‌ى 100 كه‌سايه‌تى فه‌يلى خوه‌يان ئه‌را هه‌ڵوژاردنه‌يل كانديد كردنه له‌بان روێوه‌ر گشت ليسته‌يل مه‌ده‌نى و راس و چه‌پ، ئه‌وه زوورمينه‌يش ناچارن به‌شدارى له هه‌ڵوژاردنه‌يل بكه‌ن و له‌بان پاى نه‌ته‌وه‌يى و مه‌زه‌وى وسيانه!
له پرووسه‌ى هه‌ڵوژاردن ده‌رفه‌ته‌يليگ هه‌ن ئه‌را هانداين و توڵه‌سه‌ندن و ته‌حريفكردن، وه‌لێ ده‌رفه‌ته‌يل سه‌ركه‌فتن گشت وه‌خته‌يليگ له‌وه‌رده‌س نيه‌و نيشتمان فه‌يليه‌يليش وه‌رده‌وام جى نفوز نه‌ته‌وه‌ييه، وه‌لێ شوونيگ ئه‌را ده‌سڵات نيه‌و هه‌ر لايه‌نيگيش پايه‌ى خوه‌ى ديرێد وه پشتبه‌سانن وه قورسايى نه‌ك قه‌واره‌ى ملله‌ته‌گه‌ى.
سياسه‌ت له‌ى وڵاته ئه‌وه‌نه فريه‌س وه‌ته‌مامى بيفايده بويه، ئايينيش ئه‌وه‌نه پلكياسه سياسه‌ته‌و گشت پيرووزى و متمانه‌يگ وه‌ليا له‌ده‌سداگه ك له‌ساى گوزه‌ر كردياد. هويچ كه‌سيگ كيشه‌ى سياسى وه‌ل مه‌زه‌و و ديانه‌ت نه‌يرێد، كيشه‌گه له‌وه ده‌ركه‌فێد هه‌ناى ك ئاڵشت ئه‌كريه‌ێد ئه‌را ته‌كفيركردند. كورد فه‌يلييش ك نازانێد چوێن وه‌ره‌ڕوێ سه‌ختيه‌يل و نگه‌رانيه‌يل بدێده‌و وه‌ى سياسه‌ته‌وه هويچ ئاينده‌ێگ ئه‌را نيه!
ئاماژه ئه‌را فه‌يلى وه پيكهاته‌يگ به‌تاڵ ساخته‌كاريه ئه‌را ناسنامه‌و دزين مافه‌يل ياسايى، ئمجا زاراوه‌ى "پيكهاته" حه‌شر ئه‌را كردنه‌وه‌ى گريه‌ى نه‌ته‌وه‌يى له فه‌يلى كريا، ئامانجيشى دروسكردن قه‌يران و كيشه‌ى ناسنامه‌س ئه‌را نه‌وه‌ى ئيسه وه‌ل مه‌ترسى له‌بان ئاينده‌ى نه‌وه‌يل تر.
گشت كه‌مينه‌يل له‌ى وڵاته له‌وانه‌يش ئايينى و نه‌ته‌وه‌يى، هه‌ر له زويه‌و نوێنه‌ره‌يل خوه‌يان ديرن له ئه‌نجومه‌ن نوێنه‌ره‌يل، وه‌لێ له به‌هه‌يشت ناژيه‌ن! ئاماده‌گى خواسته‌و ره‌واس، له گوزه‌يشته‌يش نوێنه‌ره‌يل فه‌يلى داشتيم له ئه‌نجومه‌ن نوێنه‌ره‌يل، وه‌لێ وجوودمان له ناوه‌ند نويسانن بڕياره‌يل وه ماناى توانايى ده‌ركردن ياساى كووتاييهاوردن وه مه‌ينه‌تى و دژه زووردارێ وجوود كرده‌وه‌ييگ نه‌ياشت!
له‌ناونى 328 كورسى له ئه‌نجومه‌ن نوێنه‌ره‌يل، ماف كۆتا له‌وه‌ر خاتر ئه‌وه ئه‌ياد ك له‌حاڵه‌ت ئاسايى به‌خت له سه‌ركه‌فتن نه‌ياشتوێد، ئه‌ويش وه بوونه‌ى چه‌سپانن تايبه‌تمه‌ندێ و وجوودد ك بايه‌سه سه‌ربكه‌فێد ته‌نانه‌ت ئه‌گه‌ر وه يه‌ك كورسييش بويه. ئاشكرايشه يه‌يش نه‌بايه‌د واز له‌لێ باريه‌ێد و حزبه‌يل گه‌ورايش رێ وه خاوه‌نه‌يل راسكانى كۆتا نايه‌ن و يه‌يش ته‌نيا پيشكه‌شكردن كانديده‌يل دڵسووزه‌و و دوينيده‌يان ژماره‌يگن و خاوه‌ن كيشه‌گه نيين، ئه‌و حزبه‌يليشه كورسى ژمارن نه‌ك كيشه‌و مه‌ينه‌تيه‌يل خاوه‌ن ده‌نگه‌يل. وه‌لێ ئيجاره و له‌ى هه‌ڵوژاردنه‌يله ك ئيمه له‌تى فيشتر ئه‌و لايه‌نه‌يليمنه ك به‌رنامه نه‌يرن ئه‌را هه‌ڵوژاردن و ده‌رمان سحرى ئه‌را چاره‌سه‌ر گشت كيشه‌ى فه‌يليه‌يل دوينرياوه!! ئه‌خوازن له پرووسه‌يگ سياسى كورت ماوه جوور دعايه‌ى هه‌ڵوژاردن بويمنه(پيكهاته‌ى فه‌يلى).
ئاقبه‌ت پڕ كاره‌سات دريژ ماوه‌س، ئه‌گه‌ر ئامانج له پيكهاته بزانيم چه‌س، ئه‌ويش وه به‌راورد وه‌ل قانجاز و زه‌ره‌ده‌يلى، ئه‌وه ئيمه شه‌رمه‌زار بويمنه‌و له شه‌هيده‌يلمان ئه‌گه‌ر نه‌تويه‌نستيم مقه‌يه‌تى له ماف زينگه‌يلمان بكه‌يم و جى داخيشه باج گشت ده‌نگيگيش له‌وه‌ر خاترى پيشكه‌ش كريا شه‌هيديگ قوربانى بويه.
له‌لاى ئيمه، به‌شدارى كورده‌يل فه‌يلى له جموجويل سياسى و رووشنهويرى و ئابوورى ته‌نيا وه قانجازه‌يله‌و په‌يوه‌س نه‌وێ، به‌ڵكوو فريه‌جار زانستيان نه‌ك هه‌ر ته‌نيا قانجاز نه‌يرن، وه‌لێ له‌ى بواره زه‌ره‌د گيانى و ماددييش وه‌پيان ئه‌ڕه‌سێد. مه‌سه‌له‌يگ ئاساييه له جموجويله‌يل سياسى عراقى سه‌رده‌م ك خوه‌ندنگاى نه‌ته‌وه‌ييمان وه بوونه‌ى فريه‌يى شلبوينه‌وه‌و غايببوين مامۆستايه‌يل و خوه‌ندكاره‌يل و شيواز كلاسيكى و له‌وه‌رچه‌و نه‌گرتن به‌رنامه‌و ده‌رسه‌يل، خوه‌يكيشاوه له‌وه‌رده‌م ده‌وام وه‌رده‌وام ناوه‌نده‌يل نفوز مه‌زه‌وى سياسى ك يه‌يش وه ته‌نيا تايبه‌ت وه كورده‌يل فه‌يلێ نيه، به‌ڵكوو سه‌ختتر بوى له‌بانيان.
تائيسه سه‌رمايه‌ى سياسى ئه‌را كورده‌يل فه‌يلى له‌و جووره سه‌رمايه‌سه ك په‌يوه‌سه وه حاكميه‌ت حزبه‌يل و سياسيه‌يل كورد و شيعه. ئى سه‌رمايه‌يشه حاڵى حاڵ سه‌رمايه‌يل ئابوورى يا كۆمه‌ڵايه‌تى له به‌رزى و نزمى دوينريه‌ێد. سه‌رمايه‌ى سياسيمان په‌يوه‌سه وه ئاماده‌بوين سياسيمان. هه‌ڵوژاردنه‌يليش تواناى زيايكردن به‌شه‌يليمان يا كه‌مكردنه‌وه‌ى ديرێد. وه‌لێ له‌ى هه‌ڵوژاردنه‌يله مه‌ردم مه‌يل ديرێد له روێ سياسيه‌و هوير وڕامان بژنه‌فن و چه‌وديرى شماردن ده‌نگه‌يلمان بكه‌ن.
به‌شدارى پيكهاته‌يل نه‌ته‌وه‌و مه‌زه‌وه‌يلى له‌ى هه‌ڵوژاردنه‌يله وه‌ل له‌وه‌رچه‌وگرتن بارودوخ سياسى و وه‌رده‌وامى ململانيه‌يل فريه گرينگه. به‌شداريكردنيش له مه‌يدان ته‌شريع و ژيان سياسى هه‌ليگه ئه‌را فه‌يليه‌يل. هه‌ليگه ئه‌را خوه‌يناسينيان له‌نوو. هه‌ڵوژاردنه‌يل هه‌ليگه ئه‌را ئاشنابوين وه خواسته‌يل و ئه‌و په‌يامه ك ئه‌خوازن بڕه‌سننه‌ى وه خه‌رجيگ كه‌متر. ئه‌و داواكاريه‌يله ك وجوود ديرێد له ياسايه‌يل و له ده‌ستوور عراقێ، وه‌لێ بيهووده عوز (پيكهاته)يش تائيسه ئه‌و داواكاريه‌يله جيوه‌جى نه‌كردگه.
ئه‌وانه‌گ چينه ناو وازى "پيكهاته" وه‌بى ناسنامه، برياريگ زويتر دان و هه‌ر ئه‌وانيش جيوه‌جيكارێ بوين ئه‌را دروسكردن ناسنامه‌ى ساخته‌و ناشايسته ك چاره‌نويس فه‌يليه‌يل وه‌پى بيه‌ن له ديوار.
عه‌لى حسێن فه‌يلى