شه‌فه‌ق نيوز/ سه‌عاتيگ له وه‌خت ته‌رخانكرياێ له وه‌رپرسه‌يل يا هه‌ر كه‌سايه‌تييگ تر له‌ى وڵاته ئه‌را لاكردنه‌وه وه‌لاى كيشه‌و گرفت هاووڵاتيه‌يل ناڕه‌حه‌ت كه‌سيگ ناكا! ئه‌ويش له‌وه‌ر ئه‌وه‌گ وه‌خته‌يل و داراييه‌يل خه‌رجكرياێ له ديداره‌يل پرۆتۆكۆڵى و نمايشكارى بى به‌رهه‌م هويچ هساويگ ئه‌راى ناكريه‌ێد! چوينكه جيوه‌جيكردن دادگه‌رى هه‌وه‌جه وه فه‌زايگ خوه‌ڵه‌كه‌وه‌يى يا ساف ديرێد ك يه‌يش له‌ى وڵاته وجوود نه‌يرێد.
وه دريژايى ته‌مه‌ن عراق له‌دوياى ده‌سڵات به‌عس، حكومه‌ت و وه‌رپرسه‌يل وه وه‌رده‌وامى بڕيار قويته‌وداين ماف كورده‌يل فه‌يلى ئه‌يه‌ن، ئه‌ويش ته‌نيا وه‌خاتر ئداره‌كردن دوسيه‌ى سته‌م، نه‌ك له‌وه‌ر خاتر جيوه‌جيكردن ياساى له‌ناوبردن شوونه‌وار تاوانه‌يل.
يه‌يش ديار وئاشكراس له‌و وازييه ك سياسيه‌يل و وه‌رپرسه‌يل حكومى له به‌غدا مه‌شقى ئه‌كه‌ن، ته‌نانه‌ت ئامانج له خستنه‌ڕوێ دوسيه‌ى له‌ناوبردن وه‌جه‌م(جينۆسايد)كورده‌يل فه‌يلى وه‌سه‌ربردن وه‌خت و ئداره‌كردن دوسيه‌ى مه‌سه‌له‌گه‌ي نه‌ك له‌وه‌ر جيوه‌جيكردن ياساو دادگايى ك شوونه‌وار ئه‌و تاوانه كوشنێده‌و.
وه‌پرسه‌يل ئه‌تويه‌نن چه‌ويان وه‌پيمان بكه‌فێد يا نه‌كه‌فێد، ئه‌تويه‌نن قسه له‌باره‌مان بكه‌ن يا نه‌كه‌ن و سپاس ئه‌رايان! وه سه‌رمايه‌ێ فريه‌ێ چه‌ن خوله‌كيگ يا چه‌ن سه‌عاتيگ له ديداريگ پرۆتۆكۆڵى ئه‌تويه‌نن كورده‌يل فه‌يلى گه‌شبين بكه‌ن و ئوميد ئه‌را ئاينده داشتوون يا وڵيان بكه‌ن جوور سه‌رگه‌ردان له بياوان قه‌وڵه‌يل! ك يه‌يش ده‌رئه‌نجام ئى دوسيه‌سه وه دريژايى ساڵه‌يليگ.
ئمجا بيلا ئه‌وه له‌هويرمان نه‌چوود بارودوخ سته‌م ك ئاڵشت نادێ، ئسپات ئه‌وه ئه‌كا ك رزگاركه‌ره‌يل خاك عراق له‌بان ده‌س جه‌هان ئازاد وه‌بى بڕيار بوێ له ئازادكردن فكره‌يل و ديد ئاده‌ميزاد و خاسه‌وكردن ژيان و چه‌سپانن يه‌كسانى له مافه‌يل!
تائيسه كه‌سه‌يليگ هه‌ن چه‌ويان وه ئه‌و باوه‌ڕه واز كردنه ك ئه‌وانه‌گ شوون ده‌سڵات زوڵم گرتنه ته‌نانه‌ت خوه‌شيان له زوڵمليكرياگه‌يل گوزه‌يشته‌يش نايه‌ێد! دى بيلا كه‌ميگ هويره‌و بكه‌يم جوور ئه‌وه‌گ خاوه‌ن ده‌سڵاته‌يل هوير ئه‌كه‌ن له به‌غدا تا بزانيم ماناى يه‌كسانى و هاوڵاتيبوين له مسته‌ڵحه‌يليان ته‌نيا مانايه‌يل نمايشكارى ئه‌گرێده‌و نه‌ك راسه‌وكردن ياسا و نه‌رته‌يل كۆمه‌لايه‌تى ك جارجاريگ بوو سه‌رده‌مه‌يل كوچگين له‌لێ ئه‌يه‌ێد يا وه‌تاڵانبردن ئابوورى ك وه داستان فه‌رهوود شيه‌و ئه‌كريه‌ێد.
له‌وه‌ر خاتر حاڵ حازريش، ته‌نانه‌ت چه‌وديريه‌يل حكومى به‌تاڵن له مانايه‌يل ئه‌و فه‌رهه‌نگ سياسيه ك به‌شدارى ئه‌رامان ده‌سه‌وه‌ر ئه‌كا له مه‌يدانه‌يل ژيان، چوينكه مه‌يدان سياسه‌ت شوونيگ نيه ئه‌را گه‌يايكردن هاوردنه‌وه‌ى مافه‌يل.
له‌باره‌ى دوسيه‌ێ فه‌يليه‌يليش، ئه‌گه‌ره‌يل ئه‌وه ئه‌كريه‌ێد وه‌زع ئيسه جوور خوه‌ێ بمينێد ئه‌را پانزه ساڵ تر، ئه‌ويش ته‌نيا له وه‌رزه‌يل هه‌ڵوژاردن و دامه‌رانن حكومه‌ته‌يل يا ئه‌را هه‌ر ده‌سپيچگيگ تر، ك ديداره‌يليگ جوور خه‌ريككردن وه كاره‌يليگ دوباره‌كرياێ ئه‌دێده ده‌سكه‌فت، وه‌لێ وه مه‌ندنه‌وه‌ى سزايه‌يل و تاوانه‌يل و نه‌مه‌ندن خاوه‌نه‌يل ئى دوسيه ك بوو ره‌سه‌نايه‌تى له‌ليان ئه‌يه‌ێد ته‌نيا له سته‌م، له ئاينده قه‌وڵ ئاهه‌نگ سازكردن ئه‌يه‌ن وه ياد كاره‌ساته‌يل و حكومه‌تيش هه‌وه‌جه وه جيوه‌جيكردن هويچ ياسايه‌يليگ نه‌يرێد ك زوڵم لاوه‌ێد.
عه‌لى حسێن فه‌يلى