شه‌فه‌ق نيوز/ حكومه‌ته‌يليگ هاتنه‌سه به‌غداو حكومه‌ته‌يليگ چينه، ده‌يان ساڵ وه‌سه‌ر چى و كينه‌ت شوفێنى وه‌رانوه‌ر كورد هيمان هه‌ر جوور خوه‌ێ مه‌ندگه‌و بگر فريه‌جاريش زاێ كرد، كورده‌يل فه‌يلييش به‌ش گه‌وراێ ئه‌و كينه‌ته‌يله كه‌فته پييان و هيمان تائيسه‌يش تام ئه‌و تيه‌ڵه‌يل سياسه‌ت دوشمنكارانه ئه‌كه‌ن و ده‌نگ نه‌شاز و ئاوازه‌يل دڵڕه‌نجن و ئه‌و وتاره‌يل سياسيه ژنه‌فن ك كينه‌ت ده‌فنكار له دژيان تير ئه‌كاو بوو پيسى و حه‌قاره‌ت و بوو فكر به‌عسى سدامى گوڕ وه‌گووڕ له‌لى ئه‌ياد و هيمان تويش هه‌مان زوڵم ئه‌يه‌ن ك ده‌زگايه‌يل نه‌فانى ئه‌نجامى ديان له دژيان و پڕ له نه‌فامى بوێ تا سقان له‌گشت چشتيگ.
جام ئه‌وه ها له‌تى له‌لى تكيه‌ێد، يه‌يش هه‌وه‌جه وه به‌ڵگه‌و چه‌سپانن نه‌يرێد، ئه‌وه‌كيش ژنه‌فتيم له‌و هه‌ڕه‌شه‌يله ك روێ وه ڕويمان كريا له‌لايه‌ن نه‌فامه‌يل و ئه‌و ئنتهازيه‌يله ك ملله‌ت سه‌رقاڵ ئه‌كه‌ن ئه‌را له‌هويره‌وبردن قه‌يرانه‌يل ئابوورى و سياسى و كۆمه‌لايه‌تى و خزمه‌گوزارى وه‌بى چه‌ودێرى و هساو و كتاو وه گشت ئاشكرايگ ئاماژه وه زيايبوين ئه‌ميبى فكر شوفێنى و دڕندانه ئه‌كه‌ن و له گووشه‌ێ هاوردنه‌وه‌ى قنووت و په‌يڕه‌وكارى له چاڵاو ( أمة العربية الواحدة ذات الرسالة الخالدة ) ك چاڵاويگه هيمان نه‌فامه‌يل له‌تى وجوود ديرن له‌وانه‌گ بى توانان له په‌يوه‌سكردن راسيه‌يل و هه‌ڵويسته‌يل و رينمايه‌يليگ ك له‌بانى هووكاره بوينه له سه‌رده‌م به‌عس چڵكن، ك يه‌يش هه‌ڕشه‌سه له ئاشتى و هانداين ره‌گه‌زى و خوسه‌و كينه‌ت و ناكووكيه‌يله له‌ناونى هاووڵاتيه‌يل و ته‌سنيفكردنيان ئه‌را پله‌يليگ وه گووره‌ێ ئنتمايان ئه‌را نه‌ته‌وه‌و تايفه‌و مه‌زه‌و.
دوياخريش يه‌كيگ له‌وانه وه ئاماده‌گێ سه‌خاوه‌تمه‌ندايگ ك باڵه‌فڕه كه‌ێد له ئاسمان تايفى و جياوازى و ديوانه‌گێ و نه‌فامانه و له لێدوانه‌يلى به‌شيگ له‌و خراوه فكرى و شيه‌وكردنيه به‌تاڵ كرد وه ئه‌وه‌گ چاره‌نويس كورد له به‌غدا ته‌هجير كردنه له شوون راپرسى له‌بان سه‌روه‌خوه‌يى كوردستان.
بيگومان ئى هه‌ڕه‌شه‌ێ ته‌هجير و دويره‌و خستن و ته‌سليبه قسه‌ێ ئيسه‌ێ نيه‌و جوور هه‌ر هه‌ڕه‌شه‌يل تر فريه‌يگه ك ژنه‌فتيمنه‌ێ له ره‌سانن و له‌بان ماڵپه‌ڕه‌يل په‌يوه‌ندێ كۆمه‌ڵايه‌تى كه‌فته وه‌رچه‌ومان ك پڕ بوێ له خود به‌رزى و ته‌كه‌بور و له‌خودبايى عه‌ره‌بى و گه‌مه‌كردن و گومان و بويچگه‌وكردن ملله‌ت كورد، ك يه‌يش خراوكاريه ده‌رهه‌ق گشت عراقيه‌يل و جى ناكووكيه‌و كينه‌ت ئه‌خاده ناونى كورد و شيعه و له هه‌مان وه‌خت له‌يوا له كورده‌يل فه‌يلى ئه‌كا فيشتر په‌يوه‌س بوون وه كورايه‌تێ ره‌سه‌نياان و به‌شداريكردن كاراو حه‌ماسيه‌ت فيشتر له راپرسى ك بڕياره له ئه‌يلوول ئاينده ئه‌نجام بگرێد.
ئى هه‌ڕه‌شه‌ێ ته‌هجيركردن تازه ته‌هجيركردن كويه‌ن خيزانيگ كورد له كه‌ركوك له وه‌خت سه‌ردام نه‌فام ئه‌خاده هويرم ك شه‌هيد داشت له قادسيه‌ێ سه‌دام، ئه‌ويش هه‌ناێ ك خاوه‌ن خيزانه‌گه چڕين ئه‌را منه‌زه‌مه‌ێ به‌عسى و ئاگادارى وه بڕيار ته‌رحيل كردن و يه‌يش وته‌پيان: من كوڕه‌گه‌م له قادسيه شه‌هيد بويه ئايا ته‌رحيل ئه‌كريه‌م.. ئه‌وانيش وتنه‌پى: كوڕه شه‌هيده‌گه‌د وه‌ل خوه‌ده‌و بووه ئه‌را هه‌ولێر.
ئى به‌خت نابه‌ختوه‌ره ك له پشت موختار سه‌رده‌م وسيه‌ێد و مه‌شووره‌ت وه‌پى ئه‌ياد، قوربانيه‌يل و مێژوو شه‌ره‌فمه‌ندانه‌ێ كورده‌يل فه‌يلى له هويريه‌و چيه وه‌ل بيس هه‌زار شه‌هيد كورد فه‌يلى، هه‌ر وه‌و خاتريشه زووان دريژى كرد له‌وه‌ر ئه‌وه‌گ ريشگ به‌عسى ها پيه‌وه‌و باوه‌ڕ وه فكره‌يل عه‌فله‌قى نه‌فره‌تكرياێ ديرێد و حه‌تمه‌ن گوزاره‌ێ وه‌رپرسه مونه‌زه‌مه حزبيه‌گه‌ێ به‌عس دوباره‌وه ئه‌كاو ئويشێد: شه‌هيده‌يلدان وه‌ل خوه‌دان بووه‌ن ئه‌را كوردستان.
سوبحى ساڵه‌يى