عەلی حسێن فەیلی/ هەر میدیایگ راگەیانن هەناێ دویرەو لە راسی کەفێد، ئەو مەوقە دەسکەێدە وەرەو دویاچگن، و هەڵبەت هەر باوەتیگ توومارکردن بیاشتاد و خوەی بەێدە دەس راسی، هەمیشە وەڵام گونجیاگ و گرنگ و دادپەروەرانە ئەرا خوازینەیل مەردم دیرێد.
دەسەڵات و لایەنەیل سیاسی ماف خوەیانە هەرچوینیگ بنووڕنە پابەندبوین نیشتمانی و نەتەوەیی و رەوشتی، وەلێ وەپییان نیەکریەێد خوەیان لە مدووەیل شکستهاوردن ئەو پڕۆژەیل رووشنهویری و راگەیاننە درارن، کە وەناو پێکهاتەیل دروس کریانە.
شیوەی قسەکەردن و واژەیل وتارەیل لەی وڵاتە ئەوە چەسپنێد کە بەدترین رەفتار و هویرکردن هیمان وەکارە، و وە شانازیەو باسیان کریەێد لە جیوازی رەنگ و باوەڕ و بنچینە و خوین و…، و لە فرەی باوەتەیل، هەرچەن گشت دروشمەیل وە شارستانیەت دریەنە قاڵب، باوجی کردەوەیل نەتەوەگەرییە!.
دویای بیس ساڵ، تەقەلای پیرووز وەردەوام ئیمە هەر لە سەرەتاوە، ئەوە چەسپنێد کە ده‌زگای شەفەق وەشیوەی گشتی و گۆڤار فەیلی وەشیوەیگ تایبەت، روی کردن میل کارکردنی لەوە گرنگتر بوی کە وەزویتر بکەفێدە ری، و ئمڕوویش ئەو ریگری و نواگیریەیلە هویچ واتەیگ ئەرایان نەما هەناێ گۆڤارەگە هەر جویر ریتم تایبەت خوەی وەشیوەیگ جیاواز تیەێدە دەر، و لە راسیەو ئی تەقەلایلە وەتەنیا پاڵەوانیگ دروس نیەکەێد تا وەرگری لە ناسنامە و میژوو فەیلی بکەێد، وەلێ هەناێ هویر و باوەڕمان بوودە کار و کاریگەریی و وەردەوامیی بوودە پەیمانەی سەرکەفتن، چوینکە پڕۆژەگە دەرفەتیگ وەو کەسەیلە دا کە بوینە هاوبەشیگ لەی دەرئەنجام گەورە، و لەلیانیش لەی دنیا دەرچگن و وەداخەو لەلیمان دویرەو کەفتن.
لە کار پیشکەشکردن خزمەت ئەرا کورد فەیلی و کۆمەڵگا وەگشتی، لە شەفەق بەش و باوەتەیل فرەیگ دەرچگ و گەورە بوین و ئەوزەڵ کردن، جویر: ئێزگە، هەفتەنامە و گۆڤار، سایتەیل ئەلیکترۆنی و ئاژانس خەوەری وەچەن زوانیگ، و چینەیلیگ جیاجیا لە چالاکی و جویلەی مەدەنی کە لەناو ئی هەمکەی هویرکردنەیل زاڵە لەلای (شەفەق) شوین خوەیان پەیا کردن، تا لێرا شوینیان قایم بوود، و پەلامار مەیوسی و مەینەتی وەپییان نەڕەسێد.
نیگەرانی لە بەدترین رسوومەیل دریەێدە قەڵەم، بەڵکم وەگەرد گوماکردن وەخوەیباوەڕی کەموکوڵی گەورەترەو بوود، کە وەداخەو نەوەیگ هاتیەسه دی، وەبی ئەوەگ جادەگە هاوخوم بیئومیدییان بوود، کار راسەوکردن و شانازی وه سەرکەفتنەیل گوزەشتە نیەناسن، و هەناێ مینەی خوەیان کەن ئویشن: نە رەنج و نەیش جەنگ پشت ئیمە گرد، چوینکە ئیمە بویمنە قوربانی پشتگوووخستن و لەهویرچگن.
بیس ساڵ لە کار بیهوچان، رەسیە ئەنجام دروسبوین تەپەی بەرزیگ لە لەش فرەی تیم کارەگەمان، و خوەشبەختانە، ئەو تەمەن درویژە کە گۆڤار فەیلی دیرێد هیشتەی بتوەنێد پەیام هاوبەشیەیل لەناو ئەو هویر و رای لەیەکەو دویرە دروس بکەێد کە لەناو کۆمەڵگا بڵاو بویە، و وە ئازاییگ لە نویسین و وەردەوام لە دەرچگن و بڵاوبوین بویشێد: بڕ ٢٤٠ شمارە لەی گۆڤارە باوەڕی وە پرس و رینماییگ پیرووز پەیا کەێد.
لەڕی گشتگیری و راسگووی، وەبی نووڕستن ئەرا رەگەز و بنچینە و ئاین یا لایەنگری سیاسی، گۆڤارەگە باس هویریان لەباوەت گشت مەودایل ژیان کرد وە پابەندبوین مرۆیی و پیشەیی، و وەهاوردن ئی راسیەیلە گۆڤارەگە ناوی (فەیلی)ه وەلێ ئەرا گشت پیکاتەیل وەشیوەیگ پیشەیی کار کرد، و پڕ بوی لەو باوەتەیلە کە کە هەمەڕەنگی عراق وە سەرمایەی گەورەیگ زانێد ئەرا بیناکردن ئیسە و بانان.
لە ئەنجام کۆتایی، گۆڤار فەیلی مەلیۆنا واژەی رەنگاوڕەنگ وەباوەش گرد تا پەیام خوەی لەی ساڵیاد بیسەمە بڕەسنێد: دەرچگن ٢٤٠ شمارە پیشکەش وە گشت ئەو کەس و لایەنەیلە کە خوەیان و خاوەن ئی چەپکە گوڵ بووخوەشە زانن.