شەفەق نیوز/ دیارە ک سیمای وەناوچگن کۆشک حکومەتی و ئەو رویداویلە ک لەپشتی لەناوچەی خەزرا وە ماوەی شەویگ ونیم رووژ بوین، لە رووژەیل ٢٩-٣٠ ئاب گوزەشتە،  ئەوەسا هەر لە یاد ئەو رووژنامەوانەیلە مینێد ک لەناو ئەو رویداوەیلە بوین، نەگ تەنیا جویر لایەنیگ تا باس راسیەگە بکەن، باوجی جویر بەشیگ لەو سیمایل رخبردنە ک هاتە روییان، ک هەکاتی فیلمەیل هۆلیوود، کەفتنە وەر دەسدرویژی مادی و لەشییگ هیمان بەشیگیان زیان لەلی دوینێد، یەک شەو و نیم ئی رووژەگە ک ناوچەی (خەزرا)ی سەوز بویە ناوچەی سووریگ وە گشت واتەیل ووشەگە.

پەیامنێر ئاژانس شەفەق نيوز: مەرگ وەچەو خوەم دیم

حەیدەر شێخ پەیامنێر ئاژانس شەفەق ئویشێد: لە ساعەت پەنج ئیوارەی دووشەممەی ٢٩ ئاب ٢٠٢٢، هەنای توومار مانگگردن لایەنگرەیل رەوت سەدر کردیام، و هەنای خوازیم لەنزیک پیەڵ موعەلوق وەرەو بینای ئەنجومەن نوینەرەیل لەناو ناوچەی خەزرا بچم، و مەوقەی کیشانەوە و دەرچگن لە ناوچەی خەزرا، بومب دویکەڵ وگاز کەفتە نزیکم، و بڕیگ لە ناڕەزایل لە وەردەمم کەفتن، چوینکە وە گازەگە تاسیان، بیجگە گولەی پلاستیکی و گولەی زنی، و لەی مەوقە مەرگ وەچەو خوەم دیم.

حەیدەر شێخ هەمیش ئویشێد" هەنای تەقەلا دام تا بڕەسمە دەروازەی ناوچەی خەزرا، و هەنای رەسیمە بینای پەرلەمان، کەفتمە وەر گولەی لاستیک و گولەیگ لە دەس چەپم دریا، ک مۆبایلمیش شکیا، و هەمیش لۆگۆی ئاژانسەگە شکیا، و چەن ئامیریگ لەلیم گوم بوی، ئیجا ناڕەزایل ئەرا خەسخانەی کیندی بردنەم.

لە مەوقەی توومارکردن، ودویای ئەوە ک رخەیل ئەمنی زیایەو بوین، ئیدارەی ئاژانس شەفەق نیوز داوا لە حەیدەر و مەجتەبای وینەگر کرد وە کوتپڕ لەوناوە نەمینن، و دووپات کرد ک ژیانیان لە توومارکردن رووژنامەوانی گرنگترە.

هەکاتی شەوەیل ساڵ ٢٠٠٣ و سەختتر لە جەنگ مووسڵ

سەرمەد قاس پەیامنێر کەناڵ حوڕە ئەرا ئاژانس شەفەق نیوز ئویشێد: هەنای لایەنگرەیل رەوت سەدر پارچەیل کۆنکرێت نزیک کۆشک حکومەتی رمانن، و چوینکە خوەینشاندان وەرجەیە توومار کردمە، زانستم ک دویای رمیان پارچە کۆکریتەگە ئەوەسا بوودە خوین و تەقەکردن، و لە چگنم ئەرا کۆشکەگە دوودڵ بوێم،  هەرچەن سیماگە ئەوە هان دەێد بڕەسێدە دویرتیرن خاڵیگ، و لەناوڕاس جادەگەی ناوبەین کۆشک حکومەتی وپەرلەمان کیڤەی گولەیگ فرە لە نزیکم رەسیە گووشم، و ئەو مەوقە بویە بڕیاریگ  ک کەمیگ خوەمان بخەیمنە دیریگ لە چگن ئەرا ناوچەگە، چوینکە لەیرایش توومارکردن هەس، و هەمیش چوینکە ئێ کارە پەیوەندی وە بیوەیی پیشەیی دیرێد.

قاس هەمیش ئویشێد: وەگەرد نزیکبوین ساعەتەیل شەو، وەگەرد تەقەلای دەرچینمان لە بینای پەرلەمان، هیزیگ تەقە لەلیمان کرد، و لەناو گیر هاتیمن، وتەقەکردن فرەیگ بوی، و بومبیگ دەنگی دیم وەرەو هوتێل رەشید وەشیا، وئی تەقەکردن و وەردەوەردە تا شەفەق وەردەوام بوی، ک شەوەیل ٢٠٠٣ خستە یادم، و هەمیش ئەو تەقەکردنە لە ساڵەیل ٢٠٠٥ و ٢٠٠٦ خستە هویرم، و توەنم بویشم ئی شەوە لە توومارکردن جەنگ رزگارکردن نەینەوا لە چنگ داعش سەختتر بوی، چوینکە لەورا سیستەمیگ ئەرا کارەگە بوی، باوجی لەیرا نیەزانێد کی تەقە کەێد، و ویرەیش نییە ک بویشێ توو رووژنامەوانیێ، چوینکە هاتێ وەکوتپڕ بکریەێدە ئامانج، و ئەرا یەکەم جارە کڵاو و قەڵغان کردیمنە وەر، ک یە یەکەم جارە ئی کارە لەناوچەی خەزرا بوود.

رووژ سێشەممە: لاییگتر لە باسەگە

موستەفا لەتیف پەیامنێر کەناڵ دیجلە ئەرا ئاژانس شەفەق نیوز ئویشێد: لە ساعەت دوانزەی نیمەڕو رووژ سێشەممە، دەسکردیمنە توومارکردن ئاسایی ئەرا رویداوەیل بەغداد،  ئیمە لە چواڕیان تەشریع بویمن، لە نزیک بنکەی پۆلیس ساڵحیە، و داشتیمن رەوانگەی وەردەوەردەی ناوبەین مانگگرەیل وهیزەیل ناوچەی خەزرا کردیمن، کەفتیننە وەر گولەی هاوەن، ک لەوە دەمچەو و ملم زەخمدار بوین، وهیمان پەراشە لە دومچەوم مەنیە، و لەبان ئەوە بریامە خەسخانەی کەرامە ئیجا هەواڵەم کریا خەسخانەی کازمیە، و لەورا وتن تەندروسیم خاسە، و بایەتە مقەیەتی خوەم بکەم، تا ئەوەنە پەراشەیل درارن.

پەلامار و دویکەڵ وهیزیگ دەمپیچیاگ نەناسریاگ

وە گلەوخواردن ئەرا رویداوەیل رووژ دووشەممەی ٢٩ ئاب ٢٠٢٢، پەیامنێرەیل بڕیگ لە کەناڵەیل ئاسمانی ک توومار ئەو رویداوەیلە کردن، باس زانیاریەیلیگ هاوشیوە لە باوەت کەفتنیان لەوەر دەسدرویژی لەلایەن هیزەیلیگ کردن ک ناسنامەیان نەناسریاگە و نیەزانن ئەرا دەسدرویژی لەلیان کریا، هەرچەن بەڵگەی راگەیانن داشتنە.

عەمار غەسان پەیامنێر کەناڵ رەشید ئەرا ئاژانس شەفەق ئویشێد: هەنای کۆشک حکومەتی چووڵ کریا، دەسکریا تەقەکردن لە دەیشت کۆشکەگە، و بومب دەنگی وبومب دویکەڵ وەشیا ناو کۆشکەگە، و ناڕەزایەیل وەرەو ناو کویچەیل واین، و ئیمەیش وەگەردیان چگیمن، چوینکە نیەزانیمن ئی ریەیلە وەکوو دەرچن، ئیجا بویە وەشانن گولەی زنی.

غەسان هەمیش ئویشێد: وینەگریگ دیم گولە رەسیە پای، و هیزیگ دەمپیچیاگ وە بەرگ سیا وەبی هویچ نشانەیگ پەلامار من و وینەگرەگە دان، ک دویای ئەوە دەسگیر وینەگرەگە کردن، و هەنای تواستم قسە وەرد ئەفسەریگ دەمپیچیاگ وە پلەی رائد و سەربازەیلی بکەم، و وەپیان وتم ئیمە کەناڵیگ ئاسمانییمن، ئەڕا وینەگرەگە دەسگیر کەین؟، وەشکیانە پیم وە کوتەک وسۆندە، و هەنای لەدەسیان دەرچگم بومبیگ دویکەڵ ئەرام وەشانن،  هەرچەن ئیمە تەنیا لایەنیگ راگەیانن بویمن، و وەگەرد هویچ لایەنیگ نییمن.

مەهدی غەریب پەیامنێر کەناڵ وای نیوز ئەرا ئاژانس شەفەق نیوز ئویشێد:  گرووپە چەکدارەیل ک بەرگ سیا پووشن دەس لە ناڕەزایل وە شیوەیگ هەڕمەکی وەشانن، ودیانە لەشیان و سەریان، و هەنای ئی وینە توومار کردیام، بومبەیل دویکەڵ کەفتن، ونزیک بوێ یەکگیان بەێدە بان سەرم، و تویش تاسیان تیژیگ هاتم، و برادەرەیل بردنەمە خەسەخانە.

غەریب دیاری کرد ک نزیک بوی ئی رویداوە لە هووشمان بوەێد یا بکوشێدەمان، و هەمیش ناوزگم لە دەوکردن و رخ لە بومبەیل دویکەڵ هەڕەمەکی و گولەی زنی ژان وەپی رەسێد.

پەیامنێر کەناڵ جەزیرە راستەوخۆ حسێن عەلی ئەرا ئاژانس شەفەق نیوز وت: مەوقەی توومارکردن زنی لەو شوینە ک مانگگرەیل چینە ناو کۆشک حکومەتی و پارچەیل کۆنکرێت رمانن، رەسیمە دەروازەی کۆشکەگە لە پەخش زنی، و دەنگ گولە و بومب دویکەڵ رەسیە گووشم، و نووڕیمە مانگرەیل وەدەو لەناو کۆشکەگە گلەو خوەن،  و کەسەیلیگ زەخمدار کەفتنە نزیکم، و وە توکتوک هەڵیان گردن، و لەناو دەڵەک و گولەگە، کەفتمە وەر بومبیگ دویکەڵ وگاز، و پارچەیگ لە کامیرای (reciver) لەی دەڵەکە گوم بوی.

سیمایلیگ هۆلیوودی: مریمن؟ نە نیەمریمن

بەدر رکابی پەیامنێر تەغییر ئەرا ئاژانس شەفەق نیوز ئویشێد: وەرجە دەرچینمان لە کۆشک حکومەتی، کەفتیمنە وەر گولە وبومب دویکەڵ و گاز و دەنگ گولە وەشانمان رەد بوود، ودەنگ کیڤەی ژنەفیمن، و هەر مەوقەیگ وتیایمن ئیسە گولە دەێدەلیمان، تا خوەم وکادرەگە لە رخەو جیاوە وبویمن، و هیزیگ کەفتە شوینمان وە بەرگ سیا و ئەوانیش گولە لەلیمان وەشنن، و لەناو دوو لایەن گیر هاتیمن و هەردوگیان گولە وەشنن، و لەژیر پارچەیگ کۆنکرێت خوەم شاردمەو.

رکابی هەمیش ئویشێد: وینەگر کەناڵیگتر زیڕە کرد، و خوازیم ئارامی بکەم، و وەپیم وت: ئەوەسا مریمن، باوجی تواستم دڵی ئارام بکەم، و وەپی وتم: ئەوەسا مینیمن، و بایەتە لەیرا بویمن تا زەخمدار نەویمن.

رکابی دیاری کرد ک هیزەگە رەسیە لامان و کوتەک ودۆنکی وەدەسیان بوی، و پەلامارمان دان، و لەدەسیان وایمن وهەر کەفتنە شوینمان و گاز ئەرامان وەشانن، تا رەسیمە دەروازەی دەیشتینە تا هوچانیگ بخوەم، و نووڕیمە وینەگرەگە ک لەلای پارچە کۆکریتەگە لەلام بوی، و وت؛ دەس لەلیم وەشاننە و ئامێرەیلی شکاننە، و پەیامنێرگە گردنە، و رەسیمنە جوندی مەجهول و ماڵ میوانی ئەنجومەن وەزیرەیل،  و هەنای شەکەت بویم، و هیزەگە هاتە نزیکم، چیمە ناو کویچەیگ ولەورایش هیزیگ سەربازی بوی، دی لە پشت پارچە ئاسنیگ (چینکۆ) نیشتم، و وەپیان وتم تویش شەکرە هاتمە، تا قورتار خوەم بکەم، و هیزەگە ناچارم کرد لەو شوینە بچمە دەیشت، چوینکە وەرپرسایەتی سەڵامەتییم هەڵنیەگرێد.

٣،٥ کیلومەتر وەپای پەتی بڕێم

موستەفا سگەر پەیامنێر ئێن ئاڕ تی عەرەبیە لە بەغداد  ئویشێد: ناچار بویم وەگەرد نزیکەی ٢٥ لە رووژنامەوان و ناڕەزایل وەرەو دەر پشتینەی کۆشک حکومەتی بوایمن، و هەنای رەسیمن کەسەیلیگ ئەرامان دەرچگن کوتەک وسۆندە هادەسیان، ودڵنگ سیا پووشینە، و دەموچەویان شاریاسەو، و هەرکەسیگ تەقەلا دەێد لە دەرەگە بچوودە دەیشت ئەوان پەلاماری دەن، و چوینکە بویە دەڵەک ودەسوەشانن، گشت چشتەیل رووژنامەوانیم گوم کردم.

سگەر هەمیش ئویشێد" هەنای جمیام تا لە دەروازەی کۆشکەگە بچمە دەیشت، بومبیگ گازی کەفتە نزیک نیم مەتر لەلیم، دی هەناسم نەما و تاسیام، و دویای ئەوە وە تلیان لەژیر پای مەردمەگە هاتمە هووش، و لەورا کەوشەگەمیش گوم کردم.

رەوانگەیگ پسپۆر: حکومەت سزا نەیریا و سەندیکا بیدەنگە

لەلای خوەییش،  رەوانگەی عراقی ئەرا ماف مرۆڤ، راپۆرتیگ دەرکرد، وت: گشت لایەنەیل ئەو ململانە لەناوچەی خەزرا، جویر دوژمنیگ نووڕینە رووژنامەوانەیل و میدیایل راگەیانن، و وە ڕاستەخۆ پەلاماریان دان، و بەشیگ لەو پەلامارەیلە ئەرا کوشتن بویە، و سەندیکای رووژنامەنویسەیل هویج جویلەیگ وەرانوەر ئەو دەسدرویژیە لەبان رووژنامەنویسەیل نەکرد، یە نشانەی رخبەریگە وەرانوەر سەندیکاگە، و بایەتە ئەندامەیلی هوشدار وە دامەزراویان بوون.

راپۆرتەگە وتیش" گشت لایەنەیل ململانەگە وە شیوەیگ ڕاستەخۆ رووژنامەوانەیل کردیانە ئامانج، و دیارە رووژنامەنویسەیل وە دوژمن دانانە، ئی رەفتار و کردەوەیلە نوو نیین، و ناش دویاچگن رووژنامەنویسی لە عراق دەن، و رووژنامەنویسەیل مەیدانی کەفنە وەر بڕیگ مەترسی، وداخەو ک حکومەت موستەفا کازمی کار لەبان مقەیەتیکردن رووژنامەنویسەیل نەکرد، ک سزای کەسیگ لەو تاوانکارەیلە نەیا، تەنانەت ئەوانیش ک هانە دامەزراو سەربازی و بەڵگە لەبانیان هەس.

دیارە رووژنامەنویسەیل و مقەیەتیکردنیان لە لیست هویچ حکومەتیگ عراقی نییە، هەرچەن ئازادی رووژنامەوانی خوەی پشت هەر رژیمیگ دیموکراتیە.